ಸುಶಾಂತ್ ಸಿಂಗ್ ಪ್ರಕರಣ- ಎನ್‌ಸಿಬಿಯಿಂದ ಮುಂಬೈ ಮತ್ತು ಗೋವಾದ 6 ಜನರ ಬಂಧನ

•   Sun, Sep 13 2020 12:41:15 PM



• ಮುಂಬೈ, ಸೆ.13(DaijiworldNews/HR): ಬಾಲಿವುಡ್ ನಟ ಸುಶಾಂತ್ ಸಿಂಗ್ ರಜಪೂತ್ ಸಾವಿನ ಪ್ರಕರಣದಲ್ಲಿ ಡ್ರಗ್ಸ್ ಬಗ್ಗೆ ನಡೆಯುತ್ತಿರುವ ತನಿಖೆಗೆ ಸಂಬಂಧಿಸಿದಂತೆ ಮುಂಬೈ ವಲಯದ ಎನ್‌ಸಿಬಿ ಆರು ಜನರನ್ನು ಬಂಧಿಸಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

  

  ಮುಂಬೈನಿಂದ ಗೋವಾಕ್ಕೆ ನಡೆಯುತ್ತಿರುವ ದಾಳಿಯಲ್ಲಿ ವಲಯ ನಿರ್ದೇಶಕ ಸಮೀರ್ ವಾಂಖೆಡೆ ನೇತೃತ್ವದ ಎನ್‌ಸಿಬಿ ತಂಡಗಳು ಕರಮ್‌ಜೀತ್ ಸಿಂಗ್ ಆನಂದ್ (23) ಅವರನ್ನು ಬಂಧಿಸಿವೆ. ಬಂಧಿತನಿಂದ ಗಾಂಜಾವನ್ನು ವಶಪಡಿಸಿಕೊಳ್ಳಲಾಗಿದೆ.

  ಮತ್ತೊಬ್ಬ ಗಾಂಜಾ ಸರಬರಾಜುದಾರ, ದಿವಾನ್ ಆಂಥೋನಿ ಫರ್ನಾಂಡಿಸ್ ಮತ್ತು ಇತರ ಇಬ್ಬರನ್ನು ಮುಂಬೈನ ದಾದರ್ (ಪಶ್ಚಿಮ) ನಲ್ಲಿ ಬಂಧಿಸಲಾಗಿದೆ. ಎನ್‌ಸಿಬಿ ಬಂಧಿತನಿಂದ ಅರ್ಧ ಕಿಲೋ ಗಾಂಜಾವನ್ನು ವಶಪಡಿಸಿಕೊಂಡಿದೆ.

  ಅಲ್ಲದೆ, ಕಳೆದ ಒಂದೆರಡು ದಿನಗಳಲ್ಲಿ ನಗರಾದ್ಯಂತದ ಕಾರ್ಯಚರಣೆಯಲ್ಲಿ ಅಂಕುಷ್ ಅರೆಂಜಾ (29) ಎಂಬಾತನನ್ನು ಪೊವಾಯ್‌ನಿಂದ ಬಂಧಿಸಲಾಗಿದ್ದು, ಆತನಿಂದ 42 ಗ್ರಾಂ ಚರಸ್ ಮತ್ತು 1,12,400 ರೂ.ಗಳ ಹಣವನ್ನು ವಶಪಡಿಸಿಕೊಳ್ಳಲಾಗಿದೆ.

  ಇನ್ನು ಎನ್‌ಸಿಬಿ, ಗೋವಾ ಉಪ ವಲಯ, ಇದೇ ಪ್ರಕರಣದಲ್ಲಿ ಕ್ರಿಸ್ ಕೋಸ್ಟಾ ಅವರನ್ನು ಬಂಧಿಸಿದೆ ಮತ್ತು ಹೆಚ್ಚಿನ ತನಿಖೆ ನಡೆಯುತ್ತಿದೆ ಎಂದು ಎನ್‌ಸಿಬಿ ಉಪನಿರ್ದೇಶಕ ಕೆಪಿಎಸ್ ಮಲ್ಹೋತ್ರಾ ತಿಳಿಸಿದ್ದಾರೆ.