ಸೆ.18ರಂದು ಮೈಸೂರು ಅರಮನೆಯಲ್ಲಿ ಸಿಂಹಾಸನದ ಜೋಡಣೆ ಕಾರ್ಯ

•   Thu, Sep 17 2020 12:22:53 PM



• ಮೈಸೂರು, ಸೆ 17 (DaijiworldNews/PY): ನಾಡಹಬ್ಬ ಮೈಸೂರು ದಸರಾ ಅಂಗವಾಗಿ ಸೆ.18 ರಂದು ಅಂಬಾವಿಲಾಸ ಅರಮನೆಯಲ್ಲಿ ರತ್ನಖಚಿತ ಸಿಂಹಾಸನದ ಜೋಡಣೆಯ ಕಾರ್ಯ ನಡೆಯಲಿದೆ.

  

  ಈ ವರ್ಷ ಅಧಿಕ ಮಾಸದ ಕಾರಣ ಸಿಂಹಾಸನದ ಜೋಡಣೆಯು ಒಂದು ತಿಂಗಳ ಹಿಂದೆ ಆರಂಭವಾಗಿದೆ.

  ಸಿಂಹಾಸನ ಜೋಡಣೆಯ ಅಂಗವಾಗಿ ಚಾಮುಂಡೇಶ್ವರಿ ಪೂಜೆ ಸೇರಿದಂತೆ ಗಣಪತಿ ಹೋಮ ನಡೆಯಲಿದ್ದು, ಬಳಿಕ ಬೆಳಿಗ್ಗೆ 10 ರಿಂದ 10.15ರ ಅವಧಿಯ ತುಲಾ ಲಗ್ನದಲ್ಲಿ ಜೋಡಣೆ ಕಾರ್ಯ ಪ್ರಾರಂಭವಾಗಲಿದೆ ಎಂಬುದಾಗಿ ಅರಮನೆ ಕಾರ್ಯದರ್ಶಿ ಲಕ್ಷ್ಮಿನಾರಾಯಣ ತಿಳಿಸಿದ್ದಾರೆ.

  ಈ ಬಾರಿಯ ದಸರಾ ಉತ್ಸವ ಅ.17 ರಂದು ಆರಂಭವಾಗಲಿದ್ದು, ಅ.26 ರಂದು ಕೊನೆಯಾಗಲಿದೆ. ಈ ವೇಳೆ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್‌ ಅವರಿಂದ ಖಾಸಗಿ ದರ್ಬಾರ್‌‌ ನಡೆಯಲಿದೆ.

  ಪ್ರತಿವರ್ಷದಂತೆ ಈ ವರ್ಷವೂ ಕೂಡಾ ಸಿಂಹಾಸನ ಜೋಡಣೆಯನ್ನು ಅರಮನೆಯ ಸಿಬ್ಬಂದಿ ಹಾಗೂ ಗೆಜ್ಜಹಳ್ಳಿ ಗ್ರಾಮದ ಕುಶಲಕರ್ಮಿಗಳು ನಡೆಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

  ಸೆ.18 ರಂದು ಅರಮನೆಯಲ್ಲಿ ರಾಜಮನೆತನದವರು ಧಾರ್ಮಿಕ ಪೂಜಾ ಕಾರ್ಯಗಳನ್ನು ನಡೆಸಲಿದ್ದು, ಈ ವೇಳೆ ಅರಮನೆಯ ಆವರಣ ಪ್ರವೇಶಕ್ಕೆ ನಿರ್ಬಂಧ ವಿಧಿಸಲಾಗಿದೆ ಎಂದು ಅರಮನೆ ಮಂಡಳಿ ಉಪ ನಿರ್ದೇಶಕರು ಪ್ರಕಟಣೆಯಲ್ಲಿ ಹೇಳಿದ್ದಾರೆ.