'ಪ್ರಧಾನಿ ಮೋದಿ ರೀತಿಯಲ್ಲಿ ಗುರಿ, ಹಠ ಇಟ್ಟುಕೊಂಡು ಕೆಲಸ ಮಾಡಿದವರು ಯಾರೂ ಇಲ್ಲ' - ಎಸ್‌.ಎಲ್‌.ಭೈರಪ್ಪ

•   Fri, Sep 18 2020 10:48:12 AM



• ಮೈಸೂರು, ಸೆ 18 (DaijiworldNews/PY): ನಮ್ಮ ದೇಶದಲ್ಲಿ ನರೇಂದ್ರ ಮೋದಿ ಅವರಂತಹ ಪ್ರಧಾನಿ ಹುಟ್ಟಿರಲಿಲ್ಲ. ನರೇಂದ್ರ ಮೋದಿ ಅವರು ಗುರಿ, ಹಠ ಇಟ್ಟುಕೊಂಡು ತಮ್ಮ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಸಾಹಿತಿ ಎಸ್‌.ಎಲ್‌.ಭೈರಪ್ಪ ಹೇಳಿದ್ದಾರೆ.

  

  ಪ್ರಧಾನಿ ನರೇಂದ್ರ ಅವರ ಜನ್ಮದಿನದ ಪ್ರಯುಕ್ತ ಶಾಸಕ ಎಸ್‌.ಎ.ರಾಮದಾಸ್‌ ಅವರು ಗುರುವಾರ ಮೈಸೂರಿನಲ್ಲಿ ಆಯೋಜಿಸಿದ್ದ ನಮೋ ದಿವಸ್‌‌ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಪ್ರಧಾನಿ ನರೇಂದ್ರ ಮೋದಿ ಅವರು ಗುರಿ ಹಾಗೂ ಹಠ ಇಟ್ಟು ತಮ್ಮ ಕಾರ್ಯ ನಿರ್ವಹಿಸುತ್ತಾರೆ. ಈ ರೀತಿಯಾಗಿ ಕಾರ್ಯನಿರ್ವಹಿಸುವ ಪ್ರಧಾನಿ ಈವರೆಗೆ ಹುಟ್ಟಿಲ್ಲ ಎಂದಿದ್ದಾರೆ.

  2024 ಮತ್ತು 2029ರ ಚುನಾವಣೆಗಳಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಪೂರ್ಣ ಬಹುಮತದೊಂದಿಗೆ ಜಯಗಳಿಸಲಿ. ಅಲ್ಲದೇ, 2029ರಲ್ಲಿ ಅವರು ಸ್ವಲ್ಪ ಸಮಯ ಹುದ್ದೆಯಲ್ಲಿದ್ದು, ಬಳಿಕ ತಮ್ಮ ಉತ್ತರಾಧಿಕಾರಿಗೆ ಅಧಿಕಾರ ವಹಿಸಿಕೊಟ್ಟು ಸ್ವಯಂ ನಿವೃತ್ತಿ ಹೊಂದಲಿ ಎಂದು ಹೇಳಿದ್ದಾರೆ.

  ಜಿಎಸ್‌‌ಟಿ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಅವರು, ಜಿಎಸ್‌ಟಿ ಲೆಕ್ಕಾಚಾರವನ್ನು ಬೇರೆ ರೂಪದಲ್ಲಿ ನೀಡಿದ್ದು, ಬೇರೆ ಬೇರೆಯಾದ ಲೆಕ್ಕಾಚಾರಗಳನ್ನು ಅದು ಹೊಂದಿದೆ ಎಂದು ತಿಳಿಸಿದ್ದಾರೆ.

  ಇನ್ನು ಪ್ರಧಾನಿ ಮೋದಿ ಅವರು ಏನೇ ಕಾರ್ಯಮಾಡಿದರೂ ಕೂಡಾ ಅದನ್ನು ವಿರೋಧ ಪಕ್ಷದವರು ಟೀಕಿಸುತ್ತಾರೆ. ಬೇರೆ ದೇಶಗಳಲ್ಲಿ ವಿರೋಧ ಪಕ್ಷದವರು ಈ ರೀತಿಯಾಗಿ ಟೀಕೆ ಮಾಡುವುದಿಲ್ಲ. ಇಲ್ಲಿನ ವಿರೋಧ ಪಕ್ಷದವರು ಈ ರೀತಿಯಾಗಿ ಟೀಕೆ ಮಾಡುವುದು ಸರಿಯಲ್ಲ ಎಂದು ಹೇಳಿದ್ದಾರೆ.