ಸಿಗರೇಟ್ ಹಣ ಕೇಳಿದಕ್ಕೆ ಮಹಿಳೆ ಮೈ ಮೇಲೆ ಕಾದ ಎಣ್ಣೆ ಎರಚಿದ್ದ ರೌಡಿ ಕಾಲಿಗೆ ಗುಂಡೇಟು

•   Sat, Oct 03 2020 02:53:47 PM



• ಬೆಂಗಳೂರು, ಅ. 03 (DaijiworldNews/HR): ಸೈಯದ್ ಹನೀಫ್ ಎನ್ನುವ ರೌಡಿಯೊಬ್ಬ ಸಿಗರೇಟ್ ಪಡೆದು ಹಣ ಕೊಡದೇ ಹೋದ ಆತನನ್ನು ಮಹಿಳೆ ನಿಲ್ಲಿಸಿ ಹಣ ಕೇಳಿದ್ದಕ್ಕೆ ಸಿಟ್ಟಾಗಿ ಬಿಸಿ ಎಣ್ಣೆಯನ್ನ ಆಕೆಯ ಮೇಲೆ ಎರಚಿ ಪರಾರಿಯಾಗಲು ಯತ್ನಿಸಿದ ಆತನ ಕಾಲಿಗೆ ಗುಂಡು ಹಾರಿಸಿ ಸಂಪಿಗೆಹಳ್ಳಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

  

  ಆತ ಮೇಘನಾ ಎಂಬುವರ ಮೈ ಮೇಲೆ ಕಾದ ಎಣ್ಣೆ ಎರಚಿ ಪರಾರಿಯಾಗಿದ್ದು, ಮಾರ್ಗಮಧ್ಯೆಯೂ ಶ್ರೀನಿವಾಸ್ ಎಂಬುವರ ಕಾರು ಅಡ್ಡಗಟ್ಟಿ ಬಿಯರ್ ಬಾಟಲಿಯಿಂದ ಹೊಡೆದು ಹೋಗಿದ್ದ. ಬಳಿಕ ಪೊಲೀಸರ ಮೇಲೆಯೇ ಡ್ರ್ಯಾಗರ್‌ನಿಂದ ಹಲ್ಲೆ ಮಾಡಲು ಮುಂದಾಗಿದ್ದ ಆತನಿಗೆ ಇನ್‌ಸ್ಪೆಕ್ಟರ್ ಮಲ್ಲಿಕಾರ್ಜುನ ಅವರು ಆರೋಪಿ ಕಾಲಿಗೆ ಗುಂಡು ಹಾರಿಸಿ ಸೆರೆ ಹಿಡಿದಿದ್ದಾರೆ.

  ಸೈಯದ್ ಹನೀಫ್ ಅನೇಕ ಅಪರಾಧ ಕೃತ್ಯಗಳಲ್ಲಿ ಭಾಗಿಯಾಗಿದ್ದ ಎಂದು ತಿಳಿದು ಬಂದಿದೆ.

  ಆತನನ್ನು ಅಂಬೇಡ್ಕರ್ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಬಾಗಲೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

  ಇನ್ನು ಗಾಯಗೊಂಡಿರುವ ಮಹಿಳೆ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.