'ಎಲ್ಲರನ್ನೂ ಎದುರಿಸುವವರು ಸಿಬಿಐ ಎದುರಿಸುವುದಕ್ಕೆ ಆಗಲ್ವಾ?' - ಡಿಕೆಶಿಗೆ ನಳಿನ್‌

•   Sun, Oct 11 2020 08:10:52 AM



• ಬೆಳಗಾವಿ, ಅ. 11 (DaijiworldNews/PY): ಎಲ್ಲವನ್ನೂ ಎದುರಿಸುವ ನೀವು ಸಿಬಿಐ ಅನ್ನು ಎದುರಿಸುವುದ್ಕಕೆ ಆಗುವುದಿಲ್ಲವೇ? ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್‌ ಕುಮಾರ್‌ ಕಟೀಲ್‌‌ ಅವರು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌‌ ಅವರನ್ನು ಪ್ರಶ್ನಿಸಿದ್ದಾರೆ.

  

  ಬೆಳಗಾವಿಯಲ್ಲಿ ಮಾತನಾಡಿದ ಅವರು, ಕಾಂಗ್ರೆಸ್‌ ಅಧಿಕಾರದಲ್ಲಿದ್ದ ಸಂದರ್ಭ ಬಹಳಷ್ಟು ಜನರ ಮೇಲೆ ಸಿಬಿಐ ರೇಡ್‌ ಆಗಿದೆ. ಲಾಲೂ ಪ್ರಸಾದ್‌, ಜಯಲಲಿತಾ ಇವರ ಮನೆ ಮೇಲೆ ದಾಳಿಯಾಗಿದೆ ಎಂದಿದ್ದಾರೆ.

  ಸಿಬಿಐ ಒಂದು ಸ್ವತಂತ್ರ ಸಂಸ್ಥೆ, ಕಾಂಗ್ರೆಸ್‌‌‌ನ ಕಾಲದಲ್ಲೇ ನಿರ್ಮಾಣ ಆಗಿರುವುದು. ಇನ್ನು ಸಿಬಿಐ ದಾಳಿಯನ್ನು ಕಾಂಗ್ರೆಸ್‌‌‌ ರಾಜಕಾರಣ ಮಾಡಿ ಮಾಡಿಸಿದೆಯೇ? ಅವರೇ ಈ ದಾಳಿಯನ್ನು ಮಾಡಿಸಿದ್ದೇ ಆದಲ್ಲಿ ಇದು ಹಾಗೇ ಎಂದು ತಿಳಿದುಕೊಳ್ಳೋಣ ಎಂದು ಹೇಳಿದ್ದಾರೆ.

  ಡಿ.ಕೆ.ಶಿವಕುಮಾರ್‌ ಅವರ ಮನೆ ಮೇಲೆ ಸಿಬಿಐ ದಾಳಿಯಾಗಿದೆ. ಅಲ್ಲದೇ ಐಟಿ ತನಿಖೆಯು ಆಗಿದೆ. ಆದರೆ ಈ ವಿಚಾರವಾಗಿ ನಿಮಗೇಕೆ ಭಯ? ನೀವು ಸರಿಯಾಗಿದ್ದರೆ ಕಾನೂನು ಹೋರಾಟ ಮಾಡಿ. ನೀವು ಯಾಕೆ ಕಾನೂನಿಗೆ ಹೆದರುತ್ತೀರಿ? ನೀವು ಧೈರ್ಯವಂತ ಬಂಡೆ. ಎಲ್ಲರನ್ನೂ ಎದುರಿಸುವ ನೀವು ಸಿಬಿಐ ಎದುರಿಸುವುದಕ್ಕೆ ಆಗುವುದಿಲ್ಲವೇ? ಎಂದು ಕೇಳಿದ್ದಾರೆ.

  ಡಿಕೆಶಿ ಮನೆ ಮೇಲೆ ಸಿಬಿಐ ದಾಳಿಯಾಗಿದೆ, ಐಟಿ ತನಿಖೆಯಾಗಿದೆ. ನಿಮಗೇಕೆ ಭಯ ಬೇಕು? ಯಾಕೆ ಜನ ಸೇರಿಸಬೇಕು. ಜೈಲಿಂದ ಬರುವಾಗ ಮೆರವಣಿಗೆ, ಜೈಲಿಗೆ ಹೋಗುವಾಗ ಮೆರವಣಿಗೆ. ನೀವು ಸರಿ ಇದ್ದರೆ ಕಾನೂನು ಹೋರಾಟ ಮಾಡಿ. ಕಾನೂನಾತ್ಮಕ ಹೋರಾಟ ಮಾಡಿ ಪರಿಶುದ್ಧರಾಗಿ ಹೊರ ಬನ್ನಿ. ಕಾನೂನಿಗೆ ಹೆದರೋದು ಏಕೆ ನೀವು ಧೈರ್ಯವಂತ, ಬಂಡೆ. ಎಲ್ಲರನ್ನೂ ಎದುರಿಸೋರು ಸಿಬಿಐ ಎದುರಿಸಕ್ಕೆ ಆಗಲ್ವಾ ಎಂದು ಡಿಕೆಶಿಗೆ ಪ್ರಶ್ನೆ ಮಾಡಿದ್ದಾರೆ.