'ನನ್ನನ್ನು ಗೆಲ್ಲಿಸಿ ಕ್ಷೇತ್ರದ ಅಭಿವೃದ್ದಿ, ಜನರ ಸೇವೆ ಮಾಡಲು ಅವಕಾಶ ಕಲ್ಪಿಸಿ'- ಹೆಚ್‌.ಕುಸುಮಾ

•   Mon, Oct 26 2020 11:21:12 AM



• ಬೆಂಗಳೂರು, ಅ.26 (DaijiworldNews/PY): ನನ್ನನ್ನು ನಿಮ್ಮ ಮನೆ ಮಗಳೆಂದು ಭಾವಿಸಿ ಈ ಬಾರಿ ಗೆಲ್ಲಿಸಿ ಕ್ಷೇತ್ರದ ಅಭಿವೃದ್ದಿ ಹಾಗೂ ಜನರ ಸೇವೆ ಮಾಡಲು ಅವಕಾಶ ಕಲ್ಪಿಸಿಕೊಡಿ ಎಂದು ಕೈ ಅಭ್ಯರ್ಥಿ ಕುಸುಮಾ ಹೆಚ್‌‌ ಹೇಳಿದ್ದಾರೆ.

  

  ಆರ್‌‌.ಆರ್‌‌ ನಗರ ಉಪಚುನಾವಣೆಯ ಹಿನ್ನೆಲೆ ಭಾನುವಾರ ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಅವರೊಂದಿಗೆ ಪ್ರಚಾರ ನಡೆಸಿದ್ದ ಸಂದರ್ಭ ಮಾತನಾಡಿದ ಅವರು, ಕ್ಷೇತ್ರದ ಹಾಗೂ ಜನರ ಸೇವೆ ಮಾಡಲು ನಾನು ಇಚ್ಛಿಸಿದ್ದೇನೆ. ನಾನು ಎಂದಿಗೂ ಕೂಡಾ ಜನರ ಪ್ರೀತಿ, ವಿಶ್ವಾಸವನ್ನು ಹಣ, ಅಧಿಕಾರದ ಆಸೆಗೆ ಮಾರಿಕೊಳ್ಳುವುದಿಲ್ಲ. ಈ ಆಂಜನೇಯ ದೇವರ ಮುಂದೆ ಪ್ರಮಾಣ ಮಾಡಿ ಹೇಳುತ್ತೇನೆ. ನಾನು ಸದಾ ಜನರ ಕಷ್ಟ-ಸುಖದೊಂದಿಗೆ ಇರುತ್ತೇನೆ ಎಂದಿದ್ದಾರೆ.

  ನಾನು ಈ ಕ್ಷೇತ್ರದ ಅಭಿವೃದ್ದಿಗಾಗಿ ದುಡಿಯುತ್ತೇನೆ. ನಾನು ಕಾಂಗ್ರೆಸ್‌ ಅಭ್ಯರ್ಥಿಯಾಗಿ ಅಲ್ಲ, ನಿಮ್ಮ ಮನೆಮಗಳಾಗಿ ಮತ ಭಿಕ್ಷೆ ಕೇಳಲು ಬಂದಿದ್ದೇನೆ. ಬಿಜೆಪಿಯವರು ಬೆಂಕಿ ಹಚ್ಚುತ್ತಿರುವ ಮಾತನ್ನು ನಾವು ಆರಿಸಿ ದೀಪ ಹಚ್ಚುವ ಕಾರ್ಯ ಮಾಡೋಣ. ಈ ಬಾರಿ ನನ್ನನ್ನ ಗೆಲ್ಲಿಸಿ. ಇದರ ಜೊತೆ ನಮ್ಮ ಪಕ್ಷಕ್ಕೂ ಶಕ್ತಿ ತುಂಬುವ ಕಾರ್ಯ ಮಾಡಿ ಎಂದು ಹೇಳಿದ್ದಾರೆ.