'ಸಣ್ಣ ಮಕ್ಕಳೇ ಸಿದ್ದರಾಮಯ್ಯರಿಗೆ ಭಯ ಪಡುವುದಿಲ್ಲ'-ಶೆಟ್ಟರ್ ವ್ಯಂಗ್ಯ

•   Fri, Jan 20 2023 02:52:22 PM



• ಹುಬ್ಬಳ್ಳಿ, ಜ 20 (DaijiworldNews/DB): ಸಿದ್ದರಾಮಯ್ಯನವರಿಗೆ ಸಣ್ಣ ಮಕ್ಕಳೇ ಭಯ ಪಡುವುದಿಲ್ಲ. ಇನ್ನು ಪ್ರಧಾನಿ ಮೋದಿ ಭಯ ಪಡುವುದುಂಟೇ ಎಂದು ಮಾಜಿ ಮುಖ್ಯಮಂತ್ರಿ ಜಗದೀಶ್ ಶೆಟ್ಟರ್ ವ್ಯಂಗ್ಯವಾಡಿದ್ದಾರೆ.

  ಸುದ್ದಿಗಾರರೊಂದಿಗೆ ಶುಕ್ರವಾರ ಮಾತನಾಡಿದ ಅವರು, ವಿಶ್ವದಲ್ಲೇ ಮೋದಿ ಅವರು ಪ್ರಭಾವಿ. ಅಂತಹ ಮೋದಿ ಸಿದ್ದರಾಮಯ್ಯನವರಿಗೆ ಮೋದಿ ಭಯ ಪಡುತ್ತಾರೆ ಎಂಬುದು ಈ ವರ್ಷದ ಅತಿ ದೊಡ್ಡ ಜೋಕ್. ಸಣ್ಣ ಮಕ್ಕಳು ಕೂಡಾ ಸಿದ್ದರಾಮಯ್ಯರನ್ನು ಕಂಡು ಭಯ ಪಡುವುದಿಲ್ಲ ಎಂದರು.

  ತಾಂಡಾ ನಿವಾಸಿಗಳಿಗೆ ರಾಜ್ಯ ಸರ್ಕಾರದಿಂದ ಹಕ್ಕುಪತ್ರ ವಿತರಿಸಿದ ಕುರಿತು ವಿಪಕ್ಷ ನಾಯಕ ಸಿದ್ದರಾಮಯ್ಯರ ಹೇಳಿಕೆಗೆ ತಿರುಗೇಟು ನೀಡಿದ ಅವರು, ಬಿಜೆಪಿಗರು ತಾವು ಮಾಡಿದ ಅಡುಗೆಯನ್ನು ಬಡಿಸಿದ್ದಾರೆ ಎನ್ನುವ ಕಾಂಗ್ರೆಸ್‌ನವರು ತಾವೇ ಏಕೆ ಬಡಿಸಲಿಲ್ಲ ಎಂದು ಪ್ರಶ್ನಿಸಿದರು.

  ಬಂಜಾರ ಸಮುದಾಯಕ್ಕೆ ನ್ಯಾಯ ಕೊಡಿಸುವ ಬಿಜೆಪಿ ಕಾರ್ಯಕ್ರಮದಿಂದಾಗಿ ಕಾಂಗ್ರೆಸ್‌ನವರಿಗೆ ಹೊಟ್ಟೆ ಕಿಚ್ಚಾಗಿದೆ. ಅನಗತ್ಯ ಟೀಕೆಯನ್ನು ಅವರು ಇದೇ ಕಾರಣಕ್ಕಾಗಿ ಮಾಡುತ್ತಿದ್ದಾರೆ ಎಂದರು.

  ಮುಸ್ಲಿಮರನ್ನು ಹೊರಗಿಡುವ ಕೆಲಸವನ್ನು ಬಿಜೆಪಿ ಮಾಡಿಲ್ಲ. ಎಲ್ಲರನ್ನೂ ಒಗ್ಗೂಡಿಸಿಕೊಂಡು ಮುನ್ನಡೆಯಬೇಕೆಂಬುದು ಪ್ರಧಾನಿ ಮೋದಿ ಆಕಾಂಕ್ಷೆ. ಆದರೆ ಮುಸ್ಲಿಮರನ್ನು ಓಟ್‌ಬ್ಯಾಂಕ್ ಆಗಿ ಮಾಡಿಕೊಂಡು ಇಲ್ಲಿವರೆಗೆ ಕಾಂಗ್ರೆಸ್ ರಾಜಕೀಯ ಮಾಡಿದೆ. ಆನಂತರ ಬಿಜೆಪಿ ಮೇಲೆ ಗೂಬೆ ಕೂರಿಸುವ ಪ್ರಯತ್ನ ಮಾಡುತ್ತಿದೆ ಎಂದವರು ಇದೇ ವೇಳೆ ಕಿಡಿ ಕಾರಿದರು.