ಜಲ್ಲಿಕಟ್ಟು ವೀಕ್ಷಣೆ ವೇಳೆ ಗೂಳಿ ತಿವಿದು ಬಾಲಕ ಮೃತ್ಯು

•   Sun, Jan 22 2023 10:50:37 AM



• ತಮಿಳುನಾಡು, ಜ 22 (DaijiworldNews/DB): ಗೂಳಿ ಪಳಗಿಸುವ ಜಲ್ಲಿಕಟ್ಟು ವೀಕ್ಷಣೆಗೆ ಬಂದಿದ್ದ ಬಾಲಕ ಗೂಳಿ ದಾಳಿಗೆ ಸಿಲುಕಿ ಮೃತಪಟ್ಟಿರುವ ಘಟನೆ ತಮಿಳುನಾಡಿನ ಧರ್ಮಪುರಿಯಲ್ಲಿ ನಡೆದಿದೆ.

  ಗೋಕುಲ್ (14) ಮೃತಪಟ್ಟ ಬಾಲಕ. ತಡಂಗಂ ಗ್ರಾಮದಲ್ಲಿ ನಡೆದ ಜಲ್ಲಿಕಟ್ಟು ವೀಕ್ಷಿಸಲು ಈತ ತನ್ನ ಸಂಬಂಧಿಕರೊಂದಿಗೆ ಹೋಗಿದ್ದನು. ಈ ವೇಳೆ ನುಗ್ಗಿ ಬಂದ ಗೂಳಿಯೊಂದು ಕೊಂಬಿನಿಂದ ಆತನ ಹೊಟ್ಟೆಗೆ ತಿವಿದಿದೆ. ಗೂಳಿ ತಿವಿತಕ್ಕೊಳಗಾದ ಬಾಲಕ ಗಂಭೀರ ಗಾಯಗೊಂಡಿದ್ದು, ಕೂಡಲೇ ಆತನನ್ನು ಧರ್ಮಪುರಿ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಆದರೆ ಚಿಕಿತ್ಸೆಗೆ ಸ್ಪಂದಿಸದೆ ಆತ ಸಾವನ್ನಪ್ಪಿದ್ದಾನೆ ಎಂದು ತಿಳಿದು ಬಂದಿದೆ.

  ಘಟನೆ ಸಂಬಂಧ ಧರ್ಮಪುರಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಈ ವರ್ಷ ಜಲ್ಲಿಕಟ್ಟು ಸ್ಪರ್ಧೆಯಲ್ಲಿ ನಾಲ್ಕು ಮಂದಿ ಸಾವನ್ನಪ್ಪಿದ್ದಾರೆ.