ತಿಂಗಳ ಹಿಂದೆ ಮದುವೆಯಾಗಿ ಕರ್ತವ್ಯಕ್ಕೆ ಮರಳಿದ್ದ ಯೋಧ ಸಾವು

•   Sat, Jan 28 2023 06:54:57 PM



• ಮಲಪ್ಪುರಂ, ಜ 28 (DaijiworldNews/DB): ತಿಂಗಳ ಹಿಂದಷ್ಟೇ ಮದುವೆಯಾಗಿದ್ದ ಯೋಧರೊಬ್ಬರು ಕರ್ತವ್ಯಕ್ಕೆ ಮರಳಿದ ಒಂದೇ ವಾರದಲ್ಲಿ ಮೃತಪಟ್ಟ ಘಟನೆ ಕಾಶ್ಮೀರದ ಲಡಾಕ್‌ನಲ್ಲಿ ನಡೆದಿದೆ.

  ಕೇರಳದ ಕುನಿ ಮೂಲದ ಕೋಲೋತ್ತೋಡಿ ನುಫೈಲ್ (27) ಮೃತ ಯೋಧ. ಆರ್ಮಿ ಪೋಸ್ಟಲ್​ ಸರ್ವಿಸ್​ನಲ್ಲಿ ಸಿಪಾಯಿ ಆಗಿದ್ದ ನುಫೈಲ್ ಜನವರಿ 22ರಂದು ಕರ್ತವ್ಯಕ್ಕೆ ಮರಳಿದ್ದರು. ಗುರುವಾರ ಬೆಳಗ್ಗೆ ಪತ್ನಿಗೆ ಕರೆ ಮಾಡಿ ಮಾತನಾಡಿದ್ದರು. ಆದರೆ ರಾತ್ರಿ ಅವರು ಸಾವನ್ನಪ್ಪಿದ್ದಾರೆ. ಪತ್ನಿ, ತಾಯಿ ಹಾಗೂ ಸಹೋದರಿಯನ್ನು ಅಗಲಿದ್ದಾರೆ.

  ಜನವರಿ 2ರಂದು ಮುಕ್ಕಮ್​ನ ಕುಲನಗರದ ಯುವತಿಯನ್ನು ವರಿಸಿದ್ದ ನುಫೈಲ್ ಮದುವೆ ಬಳಿಕ ಸ್ವಲ್ಪ ಕಾಲ ಮನೆಯಲ್ಲಿದ್ದು, ಜನವರಿ 22ರಂದು ಕರ್ತವ್ಯಕ್ಕೆಂದು ಲಡಾಕ್‌ಗೆ ತೆರಳಿದ್ದರು. ಎಂಟು ವರ್ಷಗಳಿಂದ ಅವರು ಸೇನೆಯಲ್ಲಿದ್ದರು. ಕೊಯಮತ್ತೂರಿಗೆ ಸ್ಥಳಾಂತರಗೊಳ್ಳಲು ಅವರು ಇಚ್ಚಿಸಿದ್ದರು. ಆದರೆ ಅನಾರೋಗ್ಯದಿಂದಾಗಿ ಅವರು ಮೃತಪಟ್ಟಿರುವುದಾಗಿ ತಿಳಿದು ಬಂದಿದೆ.