ಶಿವಸೇನೆ ನಾಯಕ ಆದಿತ್ಯ ಠಾಕ್ರೆ ಕಾರಿನ ಮೇಲೆ ಕಲ್ಲು ತೂರಾಟ

•   Wed, Feb 08 2023 11:18:04 AM



• ಔರಂಗಾಬಾದ್ (ಮಹಾರಾಷ್ಟ್ರ), ಫೆ 08 (DaijiworldNews/DB): ಶಿವಸೇನಾ (ಯುಬಿಟಿ) ನಾಯಕ ಆದಿತ್ಯ ಠಾಕ್ರೆ ಅವರ ಕಾರಿನ ಮೇಲೆ ಕಲ್ಲು ತೂರಾಟ ನಡೆದ ಘಟನೆ ವೈಜಾಪುರದ ಮಹಲ್‌ಗಾಂವ್‌ನಲ್ಲಿ ನಡೆದಿದೆ.

  ಈ ಸಂಬಂಧ ಬುಧವಾರ ಹೇಳಿಕೆ ನೀಡಿರುವ ಶಿವಸೇನೆ ನಾಯಕ ಅಂಬಾದಾಸ್ ದಾನ್ವೆ, ವೈಜಾಪುರದ ಮಹಲ್‌ಗಾಂವ್‌ನಲ್ಲಿ ಆದಿತ್ಯ ಠಾಕ್ರೆ ಅವರು ಶಿವಸಂವಾದ ಯಾತ್ರೆ ನಡೆಸುತ್ತಿದ್ದಾರೆ. ರಮಾಬಾಯಿ ಅಂಬೇಡ್ಕರ್ ಅವರ ಜನ್ಮದಿನದ ಮೆರವಣಿಗೆ ಕೂಡಾ ಇದೇ ಸಂದರ್ಭದಲ್ಲಿ ನಡೆದಿದ್ದು, ಈ ವೇಳೆ ಆದಿತ್ಯ ಅವರ ಕಾರಿನ ಮೇಲೆ ಕಲ್ಲು ತೂರಾಟ ನಡೆದಿದೆ ಎಂದು ತಿಳಿಸಿದ್ದಾರೆ.

  ಶಿವಸೇನೆ ಬೆಂಗಾವಲು ಪಡೆ ಹಾಗೂ ಮೆರವಣಿಗೆನಿರತರ ನಡುವೆ ಬಿರುಕು ಮೂಡಿಸುವ ಉದ್ದೇಶದಿಂದ ಕಿಡಿಗೇಡಿಗಳು ಈ ಕೃತ್ಯ ಎಸಗಿದ್ದಾರೆ ಎಂದವರು ಆಪಾದಿಸಿದ್ದಾರೆ.

  ಇನ್ನು ಕಲ್ಲು ತೂರಾಟ ಘಟನೆಯಿಂದಾಗಿ ವೇದಿಕೆ ಮೇಲಿದ್ದ ಆದಿತ್ಯ ಠಾಕ್ರೆ ಅವರು ಕೆಳಗಿಳಿದು ಭಾಷಣ ಮಾಡಿದರು. ಅಲ್ಲದೆ ಅನನುಕೂಲತೆ ಸೃಷ್ಟಿಯಾದ ಹಿನ್ನೆಲೆಯಲ್ಲಿ ಅವರು ಇದೇ ವೇಳೆ ನೆರೆದ ಜನರ ಕ್ಷಮೆ ಯಾಚನೆ ಮಾಡಿದರು ಎಂದರು.