ಕಾಲಿಗೆ ಮೈಕ್ರೋ ಕ್ಯಾಮರಾ ಅಳವಡಿಸಿರುವ ಪಾರಿವಾಳ ಪತ್ತೆ-ಬೇಹುಗಾರಿಕೆ ಶಂಕೆ

•   Thu, Mar 09 2023 12:39:46 PM



• ಜಗತ್ ಸಿಂಗ್ ಪುರ (ಒಡಿಶಾ), ಮಾ 09 (DaijiworldNews/DB): ಮೈಕ್ರೋ ಕ್ಯಾಮರಾ ಅಳವಡಿಸಿರುವ ಪಾರಿವಾಳ ಒಡಿಶಾದ ಜಗತ್ ಸಿಂಗ್ ಪುರ ಜಿಲ್ಲೆಯ ಪರದೀಪ್ ಕರಾವಳಿಯಲ್ಲಿ ಪತ್ತೆಯಾಗಿದ್ದು, ಇದನ್ನು ಬೇಹುಗಾರಿಕೆಗೆ ಬಳಸಿರುವ ಶಂಕೆ ವ್ಯಕ್ತವಾಗಿದೆ.

  ಮೀನುಗಾರರು ಪರದೀಪ್ ಕರಾವಳಿಯಲ್ಲಿ ಮೀನುಗಾರಿಕೆ ನಡೆಸುತ್ತಿದ್ದ ವೇಳೆ ಪಾರಿವಾಳ ದೋಣಿಯ ಮೇಲೆ ಕುಳಿತಿರುವುದನ್ನು ಗಮನಿಸಿದ್ದರು. ಅಲ್ಲದೆ ಅದರ ಕಾಲಿನಲ್ಲಿ ಏನೋ ವಸ್ತುವೊಂದು ಗೋಚರಿಸುತ್ತಿರುವುದು ಮೀನುಗಾರರಿಗೆ ಗೊತ್ತಾಗಿತ್ತು. ಸೂಕ್ಷ್ಮವಾಗಿ ಗಮನಿಸಿದಾಗ ಪಾರಿವಾಳದ ಕಾಲಿನಲ್ಲಿ ಕ್ಯಾಮರಾ ಇರುವುದು ಪತ್ತೆಯಾಗಿತ್ತು.

  ತತ್‌ಕ್ಷಣ ಎಚ್ಚೆತ್ತುಕೊಂಡ ಮೀನುಗಾರರು ಪಾರಿವಾಳವನ್ನು ಸೆರೆ ಹಿಡಿದು ಮರೈನ್ ಪೊಲೀಸರ ಬಳಿ ಕೊಂಡೊಯ್ದಿದ್ದಾರೆ. ಪೊಲೀಸರು ಪಾರಿವಾಳವನ್ನು ಪಶು ವೈದ್ಯರಿಗೆ ನೀಡಿದ್ದು, ತಪಾಸಣೆ ನಡೆಸಲಾಗುತ್ತಿದೆ. ಅಲ್ಲದೆ ಅದರ ಕಾಲಿಗೆ ಜೋಡಿಸಲಾಗಿರುವ ಸಾಧನದ ಬಗ್ಗೆಯೂ ಪರೀಕ್ಷೆಗಳು ನಡೆಯುತ್ತಿವೆ. ಇನ್ನು ಪಾರಿವಾಳದ ರೆಕ್ಕೆಯ ಮೇಲೆ ಸಂದೇಶವೊಂದನ್ನು ಬರೆಯಲಾಗಿದ್ದು, ಅದು ಯಾವ ಭಾಷೆಯಲ್ಲಿದೆ ಮತ್ತು ಏನು ಬರೆಯಲಾಗಿದೆ ಎಂಬುದು ತಿಳಿದು ಬಂದಿಲ್ಲ.