'ಕಾಂಗ್ರೆಸ್ಸಿಗ್ಯಾಕೆ ನನ್ನ ಚಿಂತೆ , ನೀವೇ ಹೊಡೆದಾಡಿ ಸರ್ಕಾರ ಬೀಳಿಸ್ತೀರಿ ' - ಯಡಿಯೂರಪ್ಪ

•   Mon, May 06 2019 11:44:55 AM



• ಕಲಬುರ್ಗಿ,ಮೇ 06 (Daijiworld News/MSP): ಕಾಂಗ್ರೆಸ್ಸಿಗರು ಮೊದಲು ಅವರ ಬಗ್ಗೆ ಚಿಂತೆ ಮಾಡಲಿ ಅದು ಬಿಟ್ಟು ನನ್ನ ಬಗ್ಗೆ ಅವರಿಗೆ ಯಾಕೆ ಚಿಂತೆ? ನಾನೇನು ಸರ್ಕಾರ ಬೀಳಲಿ ಎಂದು ಹಗಲು ಗನಸು ಕಾಣುತ್ತಿಲ್ಲ ಎಂದು ಕಾಂಗ್ರೆಸ್ಸಿಗರಿಗೆ ಬಿ.ಎಸ್ ಯಡಿಯೂರಪ್ಪ ಟಾಂಗ್ ನೀಡಿದ್ದಾರೆ.

  

  ಕಲಬುರ್ಗಿಯಲ್ಲಿ ಮಾತನಾಡಿದ ಅವರು ಲೋಕಸಭೆ ಚುನಾವಣೆ ಫಲಿತಾಂಶದ ಬಳಿಕ ಯಡಿಯೂರಪ್ಪ ಅವರನ್ನು ಸ್ವಪಕ್ಷೀಯರೇ ದೂರ ತಳ್ಳುತ್ತಾರೆ ಎಂಬ ಕಾಂಗ್ರೆಸ್ ನಾಯಕರ ಹೇಳಿಕೆ ವಿಚಾರಕ್ಕೆ ಗರಂ ಆದ ಬಿ .ಎಸ್. ವೈ ಅವರಿಗ್ಯಾಕೆ ನನ್ನ ಬಗ್ಗೆ ಚಿಂತೆ ? ಅವರು ಸರ್ಕಾರ ಉಳಿಸುವತ್ತ ಗಮನಕೊಡಲಿ ಎಂದರು.

  ಸಮ್ಮಿಶ್ರ ಸರ್ಕಾರದಲ್ಲಿ ಎಲ್ಲವೂ ಸರಿಯಿಲ್ಲ. ಹೀಗಿರುವಾಗ ನಾವು ಯಾಕೆ ಸರ್ಕಾರವನ್ನು ಬೀಳಿಸಬೇಕು ? ಅವರೇ ಹೊಡೆದಾಡಿಕೊಂಡು ಸರ್ಕಾರವನ್ನು ಬೀಳಿಸುತ್ತಾರೆ ಎಂದು ಭವಿಷ್ಯ ನುಡಿದರು. ಇದೇ ವೇಳೆ ಎಚ್‌ಡಿ ಕುಮಾರಸ್ವಾಮಿ ಅವರು ಈ ಹಿಂದೆ 20-20 ಒಪ್ಪಂದ ಮಾಡಿಕೊಂಡು ಬಳಿಕ ದ್ರೋಹ ಬಗೆದಿದ್ದನ್ನು ಮೆಲುಕು ಹಾಕಿದ ಬಿಎಸ್‌ವೈ ಸಿಎಂ ಕುಮಾರಸ್ವಾಮಿ ಅವರನ್ನು ಟೀಕಿಸಿದರು.

  ಕಲಬುರ್ಗಿ ಹಾಗೂ ಕೋಲಾರ ಲೋಕಸಭೆ ಕ್ಷೇತ್ರ ಸೇರಿದಂತೆ ರಾಜ್ಯದಲ್ಲಿ 22 ಕ್ಷೇತ್ರಗಳಲ್ಲಿ ಜಯ ಸಾಧಿಸುತ್ತೇವೆ. 'ಮಂಡ್ಯದಲ್ಲಿ ಸುಮಲತಾ ಅಂಬರೀಶ್ ಗೆಲುವು ಶತ ಸಿದ್ದ' ಎಂದ ಅವರು ನರೇಂದ್ರ ಮೋದಿಯವರು ಮತ್ತೊಮ್ಮೆ ಪ್ರಧಾನಿ ಆಗುವ ವಿಶ್ವಾಸ ವ್ಯಕ್ತಪಡಿಸಿದರು.