ಕೋಳಿಗೂ ಟಿಕೆಟ್ - ಸಿಟ್ಟಲ್ಲಿ ಸೀಟ್ ಮೇಲೆ ಕೋಳಿ ಕುಳ್ಳಿರಿಸಿದ ಪ್ರಯಾಣಿಕ

•   Fri, May 10 2019 12:17:48 PM



• ಕೋಲಾರ,ಮೇ 10 (Daijiworld News/MSP): ಕೆಎಸ್ಆರ್‌ಟಿಸಿ ಬಸ್‌ನಲ್ಲಿ ಜೀವಂತ ಕೋಳಿ ಜತೆಗೆ ಪ್ರಯಾಣಿಸಿದ ಪ್ರಯಾಣಿಕನಿಗೆ ಬಸ್ ನಿರ್ವಾಹಕ ಕೋಳಿಗೂ ಸೇರಿ ಟಿಕೆಟ್ ನೀಡಿದ ಕಾರಣ ಸಿಟ್ಟಿಗೆದ್ದ ಪ್ರಯಾಣಿಕ ಕೋಳಿಗೂ ಬಸ್ಸಿನಲ್ಲಿ ಆಸನ ಕಲ್ಪಿಸಿ ಪ್ರಯಾಣ ಬೆಳೆಸಿದ ಘಟನೆ ಕೋಲಾರದಲ್ಲಿ ನಡೆದಿದೆ.

  

  ಮುಳಬಾಗಲು ಘಟಕದ ಕೆಎಸ್ಆರ್‌ಟಿಸಿ ಬಸ್‌ನಲ್ಲಿ ಕೋಲಾರ ಕಡೆಯಿಂದ ಎಚ್. ಕ್ರಾಸ್ ಗೆ ಹೋಗುವ ಪ್ರಯಾಣಿಕ ತನ್ನೊಂದಿಗೆ ಕೋಳಿಯನ್ನು ತೆಗೆದುಕೊಂಡು ಪ್ರಯಾಣಿಸುತ್ತಿದ್ದ. ಈ ವೇಳೆ ನಿರ್ವಾಹಕ ಪ್ರಯಾಣಿಕ ಕೈಯಲ್ಲಿದ್ದ ಕೋಳಿಯನ್ನು ನೋಡಿ ಕೋಳಿಗೂ ಟಿಕೆಟ್ ತೆಗೆದುಕೊಳ್ಳಬೇಕು ಎಂದು ಕೋಳಿಗೂ 15 ರೂಪಾಯಿಯ ಟಿಕೆಟ್ ನೀಡಿದ್ದಾರೆ. ಆಗ ಅಸಮಾಧಾನಕೊಂಡ ಟಿಕೆಟ್ ಪಡೆದ ಮಾಲೀಕ ಕೋಳಿಯನ್ನು ಸೀಟ್ ಮೇಲೆಯೇ ಕೂರಿಸಿ ಪ್ರಯಾಣ ಮುಂದುವರಿಸಿದ್ದಾನೆ.

  ಉಳಿದ ಪ್ರಯಾಣಿಕರು ಕೋಳಿಯನ್ನು ತೆಗೆದು ಆಸನ ಬಿಟ್ಟು ಕೊಡಿ ಎಂದು ಕೇಳಿಕೊಂಡಾಗ, ನಾನು ಕೋಳಿಗೂ ಟಿಕೆಟ್ ಪಡೆದಿದ್ದೇನೆ. ಹಾಗಾಗಿ ನನ್ನ ಪಕ್ಕದ ಸೀಟಿನಲ್ಲಿ ಕೋಳಿಯೇ ಕುಳಿತುಕೊಂಡು ಪ್ರಯಾಣ ಬೆಳೆಸಲಿದೆ ಎಂದು ವಾದಿಸಿದ್ದಾನೆ.

  ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಕೋಳಿಯ ಟಿಕೆಟ್ ಮತ್ತು ಆಸನದಲ್ಲಿ ಕುಳಿತ ಕೋಳಿಯ ಫೋಟೋ ವೈರಲ್ ಆಗಿದೆ.