ಅಪ್ಪ-ಮಕ್ಕಳು ಕಾಂಗ್ರೆಸ್​ ನ್ನು ನಿರ್ನಾಮ ಮಾಡುತ್ತಾರೆ ಎಂದ ಬಿಎಸ್​ವೈ ವೀಡಿಯೋ ವೈರಲ್

•   Fri, May 24 2019 12:48:11 PM



• ಬೆಂಗಳೂರು, ಮೇ 24(Daijiworld News/MSP): ರಾಜ್ಯದ ಲೋಕಸಭಾ ಚುನಾವಣೆಯಲ್ಲಿ ಕೇವಲ ಒಂದೇ ಒಂದು ಸ್ಥಾನವನ್ನು ಪಡೆದು ಹೀನಾಯ ಸೋಲನನ್ನುಭವಿಸಿದ ಕಾಂಗ್ರೆಸ್ ಬಗ್ಗೆ ಇದೇ ರೀತಿಯ ಭವಿಷ್ಯವನ್ನು ಆಡಿದ್ದ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್. ಯಡಿಯೂರಪ್ಪ ಅವರ ವೀಡಿಯೋ ವೈರಲ್ ಆಗಿದೆ.

  

  ಆಗ ವಿಧಾನಸಭೆ ಅಧಿವೇಶನ ನಡೆಯುತ್ತಿತ್ತು. ಬಿಜೆಪಿ ರಾಜ್ಯಾಧ್ಯಕ್ಷ ಬಿಎಸ್​ ಯಡಿಯೂರಪ್ಪ ಅವರು ಬಹಳ ಅವೇಶದಿಂದಲೇ ಮಾತನಾಡುತ್ತಿದ್ದರು. ಈ ವೇಳೆ ಕಾಂಗ್ರೆಸ್ ಕುರಿತು ಕಾಂಗ್ರೆಸ್ ಮುಕಂಡ ಡಿಕೆ ಶಿವಕುಮಾರ್​ ಅವರಿಗೆ ನೇರವಾಗಿ ಮಾತೊಂದು ಹೇಳಿದ್ದರು. ಆ ಮಾತು ಇಂದು ಕಾಂಗ್ರೆಸ್ ಪಾಲಿಗೆ ಅಕ್ಷರಶಃ ನಿಜವಾಗಿದೆ. 2014ರ ಲೋಕಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್ 9 ಕ್ಷೇತ್ರದಲ್ಲಿ ಜಯಗಳಿಸಿದ್ದ ಕಾಂಗ್ರೆಸ್ 2019ರಲ್ಲಿ ಕೇವಲ 1 ಕ್ಷೇತ್ರದಲ್ಲಿ ಮಾತ್ರ ಜಯಗಳಿಸಿದೆ. ಇದು ಕಾಂಗ್ರೆಸ್ ಗೆ ತೀವ್ರ ಮುಖಭಂಗವಾಗಿದೆ.

  “ನಾನು ಈಗ ಏನನ್ನೂ ಹೇಳುವುದಿಲ್ಲ. ನೀವು ಮಾಡಿಕೊಂಡ ಈ ಮೈತ್ರಿ ಬಗ್ಗೆ ಮುಂದೊಂದು ದಿನ ಪಶ್ಚಾತಾಪ ಪಡುತ್ತೀರಿ. ಅಪ್ಪ-ಮಕ್ಕಳು ಸೇರಿ ಕೆಲವೇ ತಿಂಗಳಲ್ಲಿ ಕಾಂಗ್ರೆಸ್​ ಹೆಸರನ್ನು ಇಲ್ಲದಂತೆ ಮಾಡಿ ಹಾಕುತ್ತಾರೆ. ಒಂದೊಮ್ಮೆ ಹಾಗಾಗದೆ ಇದ್ದರೆ ನನ್ನನ್ನು ನೀವು ಯಡಿಯೂರಪ್ಪ ಎಂದು ಕರಿಯಬೇಡಿ,” ಎಂದು ಬಿಎಸ್​ವೈ ಡಿಕೆ ಶಿವಕುಮಾರ್ ಅವರಿಗೆ ಸವಾಲು ಹಾಕಿದ್ದರು.

  ಈ ಬಿಎಸ್​ವೈ ಹೇಳಿಕೆ ಈಗ ಕಾಂಗ್ರೆಸ್ ಪಾಲಿಗೆ ನಿಜವಾಗಿದೆ. ರಾಜ್ಯದಲ್ಲಿ ಜೆಡಿಎಸ್​​ ಜೊತೆ ಮೈತ್ರಿ ಮಾಡಿಕೊಂಡು ಸ್ಪರ್ಧಿಸಿದ ಕಾಂಗ್ರೆಸ್​​ಗೆ ಬೆಂಗಳೂರು ಗ್ರಾಮಾಂತರ ಹೊರತಪಡಿಸಿದರೆ ರಾಜ್ಯದ ಬೇರೆಲ್ಲೂ ಖಾತೆ ತೆಗೆಯಲು ಕಾಂಗ್ರೆಸ್​ಗೆ ಸಾಧ್ಯವಾಗಿಲ್ಲ. ಆದರೆ ಬಿಜೆಪಿ ಮಾತ್ರ ಭರ್ಜರಿ ಜಯಭೇರಿ ಭಾರಿಸಿ ಗೆದ್ದು ಬೀಗುತ್ತಿದೆ.