3 ಪಂದ್ಯಗಳಲ್ಲಿ ಅನುಚಿತವಾಗಿ ವರ್ತಿಸಿ ಬರೋಬ್ಬರಿ 9.37 ಲಕ್ಷ ದಂಡ ಕಟ್ಟಿದ ದಿಗ್ವೇಶ್ ರಾಥಿ

•   Tue, May 27 2025 01:43:52 PM



• ಮುಂಬೈ, ಮೇ. 27 (DaijiworldNews/AA): ಲಕ್ನೋ ಸೂಪರ್ ಜೈಂಟ್ಸ್ ತಂಡದ ಸ್ಪಿನ್ನರ್ ದಿಗ್ವೇಶ್ ರಾಥಿ ಬರೋಬ್ಬರಿ 9.37 ಲಕ್ಷ ರೂ. ದಂಡ ಕಟ್ಟಿ ಐಪಿಎಲ್‌ನ ಕೊನೆಯ ಲೀಗ್ ಪಂದ್ಯದಲ್ಲಿ ಕಣಕ್ಕಿಳಿಯುವುದು ಬಹುತೇಕ ಖಚಿತವಾಗಿದೆ.

  ಈ ಬಾರಿಯ ಐಪಿಎಲ್‌ನಲ್ಲಿ ತನ್ನ ನೋಟ್ ಬುಕ್ ಸೆಲೆಬ್ರೇಷನ್‌ನೊಂದಿಗೆ ಗಮನ ಸೆಳೆದಿದ್ದ ದಿಗ್ವೇಶ್ ರಾಥಿ ಇದೇ ಮೊದಲ ಬಾರಿಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವಿರುದ್ಧ ಕಣಕ್ಕಿಳಿಯುತ್ತಿದ್ದಾರೆ. ಕಳೆದ ಮೂರು ಪಂದ್ಯಗಳಲ್ಲಿ ನೋಟ್ ಬುಕ್ ಸೆಲೆಬ್ರೇಷನ್‌ನೊಂದಿಗೆ ಅನುಚಿತವಾಗಿ ವರ್ತಿಸಿದ್ದ ದಿಗ್ವೇಶ್ ಅವರನ್ನು ಗುಜರಾತ್ ಟೈಟಾನ್ಸ್ ವಿರುದ್ಧದ ಪಂದ್ಯದಿಂದ ಅಮಾನತುಗೊಳಿಸಲಾಗಿತ್ತು.

  ಇದಕ್ಕೂ ಮುನ್ನ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಪ್ರಿಯಾಂಶ್ ಆರ್ಯ ಅವರನ್ನು ಔಟ್ ಮಾಡಿದ ಬಳಿಕ ದಿಗ್ವೇಶ್ ರಾಥಿ ನೋಟ್‌ಬುಕ್ ಸೆಲೆಬ್ರೇಷನ್‌ನೊಂದಿಗೆ ಬ್ಯಾಟರ್‌ನನ್ನು ಕೆಣಕಿದ್ದರು. ಇದಾದ ಬಳಿಕ ಮುಂಬೈ ಇಂಡಿಯನ್ಸ್ ವಿರುದ್ಧದ ಪಂದ್ಯದಲ್ಲಿ ನಮನ್ ಧೀರ್ ಅವರನ್ನು ಕ್ಲೀನ್ ಬೌಲ್ಡ್ ಮಾಡಿ ನೋಟ್‌ಬುಕ್ ಸೆಲೆಬ್ರೇಷನ್ ಮಾಡಿದ್ದರು. ಎರಡು ತಪ್ಪುಗಳಿಗಾಗಿ ದಿಗ್ವೇಶ್‌ಗೆ ಪಂದ್ಯ ಶುಲ್ಕದ ಶೇ.75 ರಷ್ಟು ದಂಡ ವಿಧಿಸಲಾಗಿತ್ತು.

  ಈ ದಂಡದ ಶಿಕ್ಷೆಗಳ ಹೊರತಾಗಿಯೂ ದಿಗ್ವೇಶ್ ರಾಥಿ ಎಸ್‌ಆರ್‌ಹೆಚ್ ವಿರುದ್ಧದ ಪಂದ್ಯದಲ್ಲಿ ಅಭಿಷೇಕ್ ಶರ್ಮಾ ಅವರನ್ನು ಔಟ್ ಮಾಡಿ ಮೈದಾನದಲ್ಲೇ ಜಗಳಕ್ಕಿಳಿದಿದ್ದರು. ಹೀಗಾಗಿ ಒಂದು ಪಂದ್ಯದ ನಿಷೇಧದೊಂದಿಗೆ ಅವರಿಗೆ ಮತ್ತೆ ಪಂದ್ಯ ಶುಲ್ಕದ ಶೇ.50 ರಷ್ಟು ದಂಡ ವಿಧಿಸಲಾಗಿತ್ತು.

  ಹೀಗೆ ಮೂರು ಪಂದ್ಯಗಳಲ್ಲಿ ತೋರಿದ ಅನುಚಿತದ ವರ್ತನೆಯಿಂದಾಗಿ ದಿಗ್ವೇಶ್ ರಾಥಿ ಬರೋಬ್ಬರಿ 9.37 ಲಕ್ಷ ರೂ. ದಂಡ ವಿಧಿಸಲಾಗಿದೆ. ಈ ದಂಡದ ಶಿಕ್ಷೆಯ ನಂತರ ಇದೀಗ ರಾಥಿ ಮತ್ತೆ ಕಣಕ್ಕಿಳಿಯುತ್ತಿದ್ದಾರೆ.