ಐಪಿಎಲ್ ಸೂಪರ್ ಸ್ಟ್ರೈಕರ್ ವೈಭವ್ ಸೂರ್ಯವಂಶಿಗೆ ಟಾಟಾ ಕಡೆಯಿಂದ ಭರ್ಜರಿ ಗಿಫ್ಟ್‌!

•   Thu, Feb 26 2026 04:58:28 PM



• ಪಾಟ್ನಾ, ಫೆ. 26 (DaijiworldNews/TA): ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ 2025ರ ಆವೃತ್ತಿಯಲ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಯುವ ಕ್ರಿಕೆಟಿಗ ವೈಭವ್‌ ಸುರ್ಯವಂಶಿ ಅವರಿಗೆ ಟಾಟಾ ಕರ್ವ್ ಕಾರು ಬಹುಮಾನವಾಗಿ ಲಭಿಸಿದೆ. ಐಪಿಎಲ್ ಸೀಸನ್-18ರಲ್ಲಿ ಅತ್ಯುತ್ತಮ ಸ್ಟ್ರೈಕ್ ರೇಟ್ ಸಾಧಿಸಿದ ಆಟಗಾರನಿಗೆ ನೀಡಲಾಗುವ ಈ ವಿಶೇಷ ಪುರಸ್ಕಾರ ಈ ಬಾರಿ ರಾಜಸ್ಥಾನ್ ರಾಯಲ್ಸ್ ತಂಡದ ದಾಂಡಿಗ ವೈಭವ್ ಪಾಲಾಗಿದೆ.

  

  ರಾಜಸ್ಥಾನ್ ರಾಯಲ್ಸ್ ಪರ 7 ಪಂದ್ಯಗಳಲ್ಲಿ ಕಣಕ್ಕಿಳಿದ ವೈಭವ್ ಸೂರ್ಯವಂಶಿ ಒಂದು ಶತಕದ ನೆರವಿನಿಂದ ಒಟ್ಟು 252 ರನ್ ಕಲೆಹಾಕಿದ್ದರು. 206.55ರ ಅದ್ಭುತ ಸ್ಟ್ರೈಕ್ ರೇಟ್‌ನೊಂದಿಗೆ ಸ್ಪೋಟಕ ಬ್ಯಾಟಿಂಗ್ ನಡೆಸಿದ ಅವರು ಐಪಿಎಲ್ 2025ರ “ಸೂಪರ್ ಸ್ಟ್ರೈಕರ್” ಎನಿಸಿಕೊಂಡಿದ್ದರು. ಕೇವಲ 14ನೇ ವಯಸ್ಸಿನಲ್ಲಿ ಇಂತಹ ಸಾಧನೆ ಮಾಡಿರುವುದು ವಿಶೇಷವಾಗಿಸಿದೆ.

  ಸೂಪರ್ ಸ್ಟ್ರೈಕರ್ ಪ್ರಶಸ್ತಿಗೆ ನೀಡಲಾಗುವ ಟಾಟಾ ಕರ್ವ್ ಕಾರು ಇದೀಗ ವೈಭವ್ ಸೂರ್ಯವಂಶಿಗೆ ಅಧಿಕೃತವಾಗಿ ಹಸ್ತಾಂತರಿಸಲಾಗಿದೆ. ಪಾಟ್ನಾದ ಅನನ್ಯ ಆಟೋ ಶೋ ರೂಮ್‌ನಲ್ಲಿ ನಡೆದ ಸಮಾರಂಭದಲ್ಲಿ ಅವರು ಹೊಸ ಶೋ ರೂಮ್ ಉದ್ಘಾಟಿಸಿ ಕಾರನ್ನು ಸ್ವೀಕರಿಸಿದರು. ಈ ಸಂದರ್ಭದ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.

  ಐಪಿಎಲ್ ಬಳಿಕ ಭಾರತ ‘ಎ’ ತಂಡದ ಸರಣಿಯಲ್ಲಿ ಭಾಗವಹಿಸಿದ್ದ ವೈಭವ್ ಈಗ ಐಪಿಎಲ್ 2026ರ ಸಿದ್ಧತೆಗಳನ್ನು ಆರಂಭಿಸಿದ್ದಾರೆ. ಮುಂಬರುವ ಆವೃತ್ತಿಯಲ್ಲೂ ರಾಜಸ್ಥಾನ್ ರಾಯಲ್ಸ್ ಪರ ಕಣಕ್ಕಿಳಿಯಲಿರುವ ಅವರು ಮತ್ತೆ ಅದೇ ಆರ್ಭಟವನ್ನು ಮುಂದುವರಿಸಲಿದ್ದಾರೆ ಎಂಬ ನಿರೀಕ್ಷೆ ಕ್ರಿಕೆಟ್ ಅಭಿಮಾನಿಗಳಲ್ಲಿದೆ.