RCB ಮಾರಾಟ ಡೀಲ್ ಕ್ಲೈಮ್ಯಾಕ್ಸ್ - ಬದಲಾಗಲಿದೆಯಾ ಹೆಸರು?!

•   Wed, Mar 18 2026 04:16:01 PM



• ಬೆಂಗಳೂರು, ಮಾ. 18 (DaijiworldNews/T A): ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಫ್ರಾಂಚೈಸಿಯ ಮಾರಾಟ ಪ್ರಕ್ರಿಯೆ ಇದೀಗ ಅಂತಿಮ ಹಂತಕ್ಕೆ ತಲುಪಿದ್ದು, ಬಿಡ್ಡಿಂಗ್ ರೇಸ್‌ನಲ್ಲಿ ಕೇವಲ ಎರಡು ಪ್ರಮುಖ ಗುಂಪುಗಳು ಮಾತ್ರ ಉಳಿದಿವೆ ಎಂಬ ಮಾಹಿತಿ ಹೊರಬಂದಿದೆ. ಈ ಅಂತಿಮ ಪೈಪೋಟಿಯಲ್ಲಿ ಒಂದು ಕಡೆ ರಂಜನ್ ಪೈ ನೇತೃತ್ವದ ಗುಂಪು ಇದ್ದರೆ, ಮತ್ತೊಂದೆಡೆ EQT ಹಾಗೂ ಪ್ರೇಮ್‌ಜಿ ಇನ್ವೆಸ್ಟ್ ಒಟ್ಟಾಗಿ ಸ್ಪರ್ಧಿಸುತ್ತಿವೆ.

  

  ರಂಜನ್ ಪೈ ಗುಂಪು: ಮಣಿಪಾಲ್ ಗ್ರೂಪ್ ಅಧ್ಯಕ್ಷ ರಂಜನ್ ಪೈ ಅವರು KKR ಮತ್ತು Temasek ಜೊತೆಗೂಡಿ ಬಿಡ್ ಸಲ್ಲಿಸಿದ್ದಾರೆ.
  EQT–ಪ್ರೇಮ್‌ಜಿ ಇನ್ವೆಸ್ಟ್: ಸ್ವೀಡನ್ ಮೂಲದ EQT ಮತ್ತು ಅಝೀಂ ಪ್ರೇಮ್‌ಜಿ ಅವರ ಹೂಡಿಕೆ ಸಂಸ್ಥೆ ಪ್ರೇಮ್‌ಜಿ ಇನ್ವೆಸ್ಟ್ ಜಂಟಿಯಾಗಿ ಸುಮಾರು $2.1 ಬಿಲಿಯನ್ ಬಿಡ್ ಮಾಡಿರುವುದಾಗಿ ವರದಿಯಾಗಿದೆ.

  ಪ್ರಾರಂಭಿಕ ಬಿಡ್ ಮೊತ್ತವೇ ಸುಮಾರು $2 ಬಿಲಿಯನ್ (ಸುಮಾರು ರೂ. 18,500 ಕೋಟಿ) ಆಗಿದ್ದು, ಇದೀಗ ಎರಡೂ ಗುಂಪುಗಳು ಅದಕ್ಕಿಂತ ಹೆಚ್ಚಿನ ಮೊತ್ತದಲ್ಲಿ ಸ್ಪರ್ಧಿಸುತ್ತಿವೆ.

  RCB ಹೆಸರಿನಲ್ಲಿ ಬದಲಾವಣೆ? : RCB ತಂಡದ ಹೆಸರಿನಲ್ಲಿ “ರಾಯಲ್ ಚಾಲೆಂಜರ್ಸ್” ಎಂಬುದು ಮದ್ಯ ಬ್ರಾಂಡ್ ಪ್ರಚಾರದ ಭಾಗವಾಗಿ ನೀಡಲಾಗಿತ್ತು. ಹೀಗಾಗಿ, ಹೊಸ ಮಾಲೀಕರು ಬಂದರೆ ತಂಡದ ಹೆಸರಿನಲ್ಲಿ ಬದಲಾವಣೆ ಆಗುವ ಸಾಧ್ಯತೆ ಹೆಚ್ಚಾಗಿದೆ. “ಬೆಂಗಳೂರು” ಎಂಬ ಹೆಸರು ಮುಂದುವರಿಯುವ ಸಾಧ್ಯತೆ ಇದ್ದರೂ, “Manipal” ಅಥವಾ “EQT”ನಂತಹ ಹೊಸ ಬ್ರಾಂಡ್ ಹೆಸರು ಸೇರ್ಪಡೆಯಾಗಬಹುದು. ಜೊತೆಗೆ, ಹೊಸ ಲೋಗೋ ಪರಿಚಯಿಸುವ ಸಾಧ್ಯತೆಯೂ ಇದೆ.

  ಪ್ರಸ್ತುತ ಯುನೈಟೆಡ್ ಸ್ಪಿರಿಟ್ಸ್ ಪ್ರತಿನಿಧಿಗಳ ಬದಲಾಗಿ ಹೊಸ ಬೋರ್ಡ್ ಆಫ್ ಡೈರೆಕ್ಟರ್ಸ್ ನೇಮಕವಾಗಲಿದ್ದಾರೆ. ಆದರೆ, ಕ್ರಿಕೆಟ್ ಕಾರ್ಯಾಚರಣೆಗಳಲ್ಲಿ ತಕ್ಷಣದ ದೊಡ್ಡ ಬದಲಾವಣೆ ಸಾಧ್ಯತೆ ಕಡಿಮೆ. ಕೋಚಿಂಗ್ ಸ್ಟಾಫ್ ಮತ್ತು ಮ್ಯಾನೇಜ್‌ಮೆಂಟ್ 2026 ಸೀಸನ್ ಮುಗಿಯುವವರೆಗೆ ಮುಂದುವರಿಯಬಹುದು.

  RCB ತಂಡದ ಬ್ರ್ಯಾಂಡ್ ಮೌಲ್ಯದಲ್ಲಿ ವಿರಾಟ್ ಕೊಹ್ಲಿ ಪ್ರಮುಖ ಪಾತ್ರವಹಿಸುತ್ತಿದ್ದಾರೆ. ಹೀಗಾಗಿ ಹೊಸ ಮಾಲೀಕರು ಅವರನ್ನು ತಂಡದ ಮುಖಪಟಲವಾಗಿಯೇ ಉಳಿಸಿಕೊಳ್ಳಲು ಹೆಚ್ಚಿನ ಆದ್ಯತೆ ನೀಡುವ ಸಾಧ್ಯತೆ ಇದೆ. ಮಾರ್ಚ್ ಅಂತ್ಯದೊಳಗೆ RCB ಹೊಸ ಮಾಲೀಕರ ಘೋಷಣೆ ಆಗುವ ನಿರೀಕ್ಷೆಯಿದೆ. ಇದೇ ಸಂದರ್ಭದಲ್ಲಿ ಹೊಸ ಜೆರ್ಸಿ ಅಥವಾ ಲೋಗೋ ಅನಾವರಣವಾಗುವ ಸಾಧ್ಯತೆಯೂ ಇದೆ. ಒಟ್ಟಿನಲ್ಲಿ, RCB ಯಾರ ಪಾಲಾಗಲಿದೆ? ತಂಡದ ಹೆಸರು, ಲೋಗೋ, ಬ್ರ್ಯಾಂಡ್ ಬದಲಾಗುತ್ತದೆಯೇ? ಎಂಬ ಕುತೂಹಲ ಕ್ರಿಕೆಟ್ ಅಭಿಮಾನಿಗಳಲ್ಲಿ ಗರಿಗೆದರಿದೆ.