ರಾಹುಲ್ ತ್ರಿಪಾಠಿ ಬ್ಯಾಟಿಂಗ್‌ಗೆ ಕೋಚ್ ಫಿದಾ-ಟೀಂ ಇಂಡಿಯಾದಲ್ಲಿ ಆಡಲು ಸಮರ್ಥರು ಎಂದ ಡೇಲ್‌ ಸ್ಟೇನ್‌

•   Tue, May 03 2022 03:39:00 PM



• ಮುಂಬೈ, ಮೇ 03 (DaijiworldNews/DB): ಯುವ ಬ್ಯಾಟರ್‌ ರಾಹುಲ್‌ ತ್ರಿಪಾಠಿ ಅವರ ಅದ್ಭುತ ಪ್ರದರ್ಶನಕ್ಕೆ ಸನ್‌ರೈಸರ್‍ಸ್ ಹೈದರಾಬಾದ್ ತಂಡದ ಫಾಸ್ಟ್‌ ಬೌಲಿಂಗ್‌ ಕೋಚ್‌ ಡೇಲ್‌ ಸ್ಟೇನ್‌ ಅವರು ಫಿದಾ ಆಗಿದ್ದಾರೆ. ಮುಂದೆ ರಾಹುಲ್‌ಗೆ ಟೀಮ್ ಇಂಡಿಯಾದಲ್ಲಿ ಆಡುವ ಅವಕಾಶ ನೀಡಬೇಕೆಂದು ಅವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

  ರಾಹುಲ್‌ ತ್ರಿಪಾಠಿ 2017ರಲ್ಲಿ ಐಪಿಎಲ್‌ಗೆ ಪಾದಾರ್ಪಣೆ ಮಾಡಿದರು. ಅಲ್ಲಿಂದ ಇಲ್ಲಿವರೆಗೂ ಸ್ಥಿರ ಬ್ಯಾಟಿಂಗ್ ಪ್ರದರ್ಶನಕ್ಕೆ ಹೆಸರಾಗಿದ್ದಾರೆ. ರೈಸಿಂಗ್‌ ಪುಣೆ ಸೂಪರ್‌ ಜಯಂಟ್ಸ್‌, ರಾಜಸ್ಥಾನ್ ರಾಯಲ್ಸ್‌ ಮತ್ತು ಕೋಲ್ಕತಾ ನೈಟ್‌ರೈಡರ್ಸ್‌ ತಂಡಗಳ ಪರ ಆಡಿರುವ ಅನುಭವ ತ್ರಿಪಾಠಿಗಿದೆ. 31 ವರ್ಷದ ಈ ಯುವ ಆಟಗಾರ ಸದ್ಯ ಸನ್‌ರೈಸರ್ಸ್‌ ಹೈದರಾಬಾದ್‌ ತಂಡದ ಪರ ಐಪಿಎಲ್‌ನಲ್ಲಿ ಆಡುತ್ತಿದ್ದಾರೆ. ಸ್ಪೋಟಕ ಬ್ಯಾಟಿಂಗ್ ಮೂಲಕ ನೆರೆದವರ ಮೈನವಿರೇಳಿಸುತ್ತಿರುವ ತ್ರಿಪಾಠಿ ಟೀಂ ಇಂಡಿಯಾದಲ್ಲಿ ಆಡಲು ಸಮರ್ಥ ಆಟಗಾರ ಎಂಬುದು ಕೋಚ್ ಡೇಲ್ ಅಭಿಪ್ರಾಯ.

  ಅಂತಾರಾಷ್ಟ್ರೀಯ ಮಟ್ಟದ ಆಟಕ್ಕೂ ತ್ರಿಪಾಠಿ ಸಮರ್ಥರಿದ್ದಾರೆ. ಟೀಮ್ ಇಂಡಿಯಾ ಪರ ಅಂತಾರಾಷ್ಟ್ರೀಯ ಟಿ 20 ಕ್ರಿಕೆಟ್‌ನಲ್ಲಿ ಅವರು ಶೀಘ್ರ ಕಾಣಿಸಿಕೊಳ್ಳಲಿದ್ದಾರೆಂಬ ವಿಶ್ವಾಸವೂ ನನಗಿದೆ. ಅದನ್ನು ಅವರು ನಿರೂಪಿಸಿದ್ದಾರೆ ಕೂಡಾ ಎಂದಿದ್ದಾರೆ ಕೋಚ್ ಡೇಲ್.