ಮುಂದಿನ ವರ್ಷವೂ ಸಿಎಸ್‌ಕೆ ಪರ ಆಡುತ್ತೇನೆಂದ ಎಂ.ಎಸ್. ಧೋನಿ

•   Sat, May 21 2022 03:04:37 PM



• ಮುಂಬೈ, ಮೇ 21(DaijiworldNews/DB): ಮುಂದಿನ ವರ್ಷ ಐಪಿಎಲ್‌ನಲ್ಲಿಯೂ ಚೆನ್ನೈ ಸೂಪರ್‌ ಕಿಂಗ್ಸ್‌‌ ಪರ ಆಡುವುದಾಗಿ ಎಂ.ಎಸ್. ಧೋನಿ ಹೇಳಿದ್ದಾರೆ. ಆ ಮೂಲಕ ಅಭಿಮಾನಿಗಳಿಗೆ ಖುಷಿ ಸುದ್ದಿ ನೀಡಿದ್ದಾರೆ.

  ಈ ಬಾರಿಯ ಐಪಿಎಲ್‌ನಲ್ಲಿ ಚೆನ್ನೈ ಸೂಪರ್‌‌ ಕಿಂಗ್ಸ್‌ ತಂಡ ಸತತ ಸೋಲು ಕಂಡ ಬಳಿಕ ನಾಯಕನ ಬದಲಾವಣೆ ಮಾಡಿದ್ದರೂ, ಎರಡನೇ ತಂಡವಾಗಿ ನಾಕೌಟ್‌ ರೇಸ್‌ನಿಂದ ಹೊರಗುಳಿಯಿತು. ಹೀಗಾಗಿ ಸಿಎಸ್‌ಕೆ ಅಭಿಮಾನಿಗಳಿಗೆ ನಿರಾಸೆಯೇ ಜಾಸ್ತಿಯಾಗಿತ್ತು. ಆದರೆ ಸಿಎಸ್‌ಕೆ ಪರ ಆಡಿದ ಎಂ.ಎಸ್. ಧೋನಿ ಅವರನ್ನು ಇದೇ ವೇಳೆ ಪ್ರಶ್ನಿಸಲಾಯಿತು. ಅದೆಂದರೆ ಮುಂದಿನ ಐಪಿಎಲ್‌ನಲ್ಲಿ ತಾವು ಕ್ರೀಡಾಂಗಣಕ್ಕೆ ಇಳಿಯುತ್ತೀರಾ ಎಂಬುದಾಗಿ. ಇದಕ್ಕೆ ಹೌದೆಂದೇ ಧೋನಿ ಉತ್ತರಿಸಿದರು. ಸಿಎಸ್‌ಕೆ ಪರಾಡುವುದಾಗಿ ಅವರು ಘೋಷಿಸಿದರು. ಇದು ಸೋಲಿನ ನಿರಾಸೆಯ ನಡುವೆಯೂ ಅಭಿಮಾನಿಗಳಿಗೆ ಕೊಂಚ ಸಮಾಧಾನ ನೀಡುವ ವಿಚಾರವಾಯಿತು.

  ಇಲ್ಲಿ ತುಂಬಾ ಪ್ರೀತಿ ದೊರೆತಿದೆ. ಚೆನ್ನೈ ಚೆಪಾಕ್‌ ಕ್ರೀಡಾಂಗಣದಲ್ಲಿ ಆಡದೇ ಹೋದರೆ ಮುಂದೆ ಇಂತಹ ಪ್ರೀತಿ ಸಿಗದು. ಸಿಎಸ್‌ಕೆ ಸಮವಸ್ತ್ರದಲ್ಲಿ ಮುಂದೆಯೂ ಆಡಲಿದ್ದೇನೆ. ಅದು ಐಪಿಎಲ್‌ನಲ್ಲಿ ಕೊನೆಯ ವರ್ಷವೋ ಅಥವಾ ಮುಂದೆಯೂ ಆಡುತ್ತೇನೆಯೋ ಎಂದು ಈಗಲೇ ಹೇಳಲು ಸಾಧ್ಯವಿಲ್ಲ ಎಂದು ಧೋನಿ ಪ್ರತಿಕ್ರಿಯಿಸಿದರು. ಧೋನಿ ಅವರಿಗೆ ವಯಸ್ಸಾಗುತ್ತಿದೆ ಎಂಬ ಕಾರಣಕ್ಕೆ ಪ್ರತಿ ವರ್ಷದ ಐಪಿಎಲ್‌ನಲ್ಲಿಯೂ ಅವರಿಗೆ ಇದೇ ಪ್ರಶ್ನೆಯನ್ನು ಕೇಳಲಾಗುತ್ತಿದೆ. ಆದರೆ ಈ ಪ್ರಶ್ನೆ ಬಂದಾಗಲೆಲ್ಲಾ ಅವರ ಉತ್ತರ ಮುಂದಿನ ವರ್ಷ ಆಡುತ್ತೇನೆ ಎಂಬುದಾಗಿಯೇ ಇರುತ್ತದೆ. ಇದರಿಂದ ಪ್ರತಿ ವರ್ಷವೂ ಅಭಿಮಾನಿಗಳು ಫುಲ್‌‌ ಖುಷ್‌ ಆಗುತ್ತಿದ್ದಾರೆ.

  ಚೆನ್ನೈ ತಂಡದ ಪರವಾಗಿ ಧೋನಿ ನಾಲ್ಕು ಐಪಿಎಲ್‌ ಪ್ರಶಸ್ತಿಗಳನ್ನು ಗೆ‌ದ್ದಿದ್ದಾರೆ. ಅಲ್ಲದೆ ಒಂದು ಚಾಂಪಿಯನ್‌ ಲೀಗ್‌ನಲ್ಲಿಯೂ ವಿಜಯ ಪತಾಕೆ ಹಾರಿಸಿದ್ದಾರೆ.