ದೀಪಕ್ ಚಹರ್ ಮದುವೆ ಆರತಕ್ಷತೆಯಲ್ಲಿ ಪಾಕ್ ಆಟಗಾರ ಭಾಗಿ-ವೈರಲ್ ಫೋಟೋ ಹಿಂದಿರುವ ಸತ್ಯಾನೇ ಬೇರೆ

•   Sun, Jun 05 2022 12:51:08 PM



• ದೆಹಲಿ, ಜೂ. 05 (DaijiworldNews/DB): ಭಾರತೀಯ ಕ್ರಿಕೆಟ್ ಆಟಗಾರ ದೀಪಕ್ ಚಹರ್ ಮತ್ತು ಜಯಾ ಭಾರದ್ವಾಜ್ ಮದುವೆ ಆರತಕ್ಷತೆಯಲ್ಲಿ ಪಾಕ್‌ ಕ್ರಿಕೆಟಿಗ ಹಸನ್ ಅಲಿ ಭಾಗವಹಿಸಿದ್ದಾರೆಂಬ ಫೋಟೋವೊಂದು ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ. ಆದರೆ ನಿಜಾಂಶವೇನೆಂದರೆ ಇವರು ರಾಜಸ್ಥಾನ್ ಪರ ಆಟಗಾರ ದೀಪಕ್ ಅವರ ಸ್ನೇಹಿತ ಎನ್ನಲಾಗುತ್ತಿದೆ.

  ಹಸನ್ ಅಲಿ ಅವರನ್ನೇ ಹೋಲುವ ಮುಖಭಾವವನ್ನು ಹೊಂದಿರುವ ವ್ಯಕ್ತಿಯೊಬ್ಬ ಮದುವೆ ಆರತಕ್ಷತೆಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್‌ ಆಟಗಾರರ ಗ್ರೂಪ್ ಫೋಟೋದಲ್ಲಿ ಕಾಣಿಸಿಕೊಂಡಿದ್ದರು. ರಿಷಬ್ ಪಂತ್ ಬಳಿ ಈ ವ್ಯಕ್ತಿ ನಿಂತಿದ್ದರು. ಇದನ್ನು ನೋಡಿದ ನೆಟ್ಟಿಗರು ದೀಪಕ್ ಮದುವೆ ಆರತಕ್ಷತೆಯಲ್ಲಿ ಪಾಕ್ ಆಟಗಾರ ಭಾಗಿಯಾಗಿದ್ದಾರೆಂದು ಸಿಕ್ಕಾಪಟ್ಟೆ ವೈರಲ್ ಮಾಡುತ್ತಿದ್ದಾರೆ. ಆದರೆ, ಇವರು ದೀಪಕ್ ಅವರ ಸ್ನೇಹಿತನೇ ಹೊರತು ಹಸನ್ ಅಲಿ ಅಲ್ಲ ಎನ್ನಲಾಗಿದೆ.

  ದೀಪಕ್ ಚಹರ್ ಅವರು ತಮ್ಮ ಬಹುಕಾಲದ ಗೆಳತಿ ಜಯಾ ಭಾರದ್ವಾಜ್ ಅವರನ್ನು ಜೂನ್ 1ರಂದು ವರಿಸಿದ್ದರು. ದೆಹಲಿಯಲ್ಲಿ ಇವರಿಬ್ಬರ ಮದುವೆ ಆರತಕ್ಷತೆ ನಡೆದಿತ್ತು. ಚೆನ್ನೈ ಸೂಪರ್ ಕಿಂಗ್ಸ್‌ನ ಹಲವು ಆಟಗಾರರು ಆರತಕ್ಷತೆಯಲ್ಲಿ ಪಾಲ್ಗೊಂಡಿದ್ದರು. ಚೆನ್ನೈನ ಮಾಜಿ ಬ್ಯಾಟರ್ ಸುರೇಶ್ ರೈನಾ, ಪತ್ನಿ ಪ್ರಿಯಾಂಕಾ ರೈನಾ, ರಾಬಿನ್ ಉತ್ತಪ್ಪ, ಪಿಯೂಷ್ ಚಾವ್ಲಾ ಮತ್ತಿತರರು ಭಾಗಿಯಾದ್ದರು, ಶಾರ್ದೂಲ್ ಠಾಕೂರ್, ರವಿ ಬಿಷ್ಟೋಯ್, ರಿಷಭ್ ಪಂತ್, ಇಶಾನ್ ಕಿಶನ್ ಸೇರಿದಂತೆ ಇನ್ನೂ ಕೆಲವು ಆಟಗಾರರು ಜತೆಯಾಗಿ ತೆಗೆಸಿಕೊಂಡ ಗ್ರೂಪ್ ಫೋಟೋದಲ್ಲಿ ಹಸನ್ ಅಲಿ ಹೋಲುವ ವ್ಯಕ್ತಿ ನಿಂತಿದ್ದರು.

  ಕಳೆದ ವರ್ಷ ಐಪಿಎಲ್ ಟೂರ್ನಿ ವೇಳೆ ಚೆನ್ನೈ ಸೂಪರ್ ಕಿಂಗ್ಸ್ ಆಟಗಾರ ದೀಪಕ್ ಚಾಹರ್ ಗೆಳತಿ ಜಯಾ ಭಾರದ್ವಾಜ್‌ ಅವರಿಗೆ ಪ್ರೇಮ ನಿವೇದನೆ ಮಾಡಿದ್ದರು. ಈ ಬಾರಿಯ ಐಪಿಎಲ್ ಮುಗಿಯುತ್ತಿದ್ದಂತೆಯೇ ಜೋಡಿ ಹಕ್ಕಿಗಳು ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.