ಕಾಮನ್‌ವೆಲ್ತ್ ಗೇಮ್ಸ್-ಭಾರತದ ವಿಕಾಸ್ ಠಾಕೂರ್‌ಗೆ ಬೆಳ್ಳಿ

•   Wed, Aug 03 2022 12:59:38 PM



• ಬರ್ಮಿಂಗ್‌ಹ್ಯಾಮ್, ಆ 03 (DaijiworldNews/DB): ಕಾಮನ್‌ವೆಲ್ತ್‌ ಗೇಮ್ಸ್‌ನಲ್ಲಿ ಭಾರತದ ಪದಕ ಭೇಟೆ ಮುಂದುವರಿದಿದ್ದು, ಭಾರತದ ವಿಕಾಸ್ ಠಾಕೂರ್‍ ಬೆಳ್ಳಿ ಪದಕ ಗೆದ್ದಿದ್ದಾರೆ. ವಿಕಾಸ್‌ಗೆ ಕಾಮನ್‌ವೆಲ್ತ್‌ ಗೇಮ್ಸ್‌ನಲ್ಲಿ ಇದು ಮೂರನೇ ಪದಕವಾಗಿದೆ.

  ಪುರುಷರ 96 ಕೆಜಿ ವಿಭಾಗದ ಸ್ಪರ್ಧೆಯಲ್ಲಿ ಒಟ್ಟು 346 ಕೆಜಿ ಭಾರ ಎತ್ತುವ ಮೂಲಕ ಲೂಧಿಯಾನದ 28 ವರ್ಷದ ವಿಕಾಸ್‌ ಬೆಳ್ಳಿ ಪಡೆದರೆ, ಸಮೋವಾದ ಡಾನ್ ಒಪೊಲಾಗ್ ಚಿನ್ನ ಗೆದ್ದುಕೊಂಡರು. ಸ್ನ್ಯಾಚ್ ಮತ್ತು ಕ್ಲೀನ್ ಮತ್ತು ಜರ್ಕ್‌ನ ಒಟ್ಟು 6 ಪ್ರಯತ್ನಗಳಲ್ಲಿ 5 ಬಾರಿ ಯಶಸ್ವಿಯಾಗಿ ನಿಗದಿತ ತೂಕ ಎತ್ತುವ ಮೂಲಕ ವಿಕಾಸ್ ಬೆಳ್ಳಿಗೆ ಕೊರಳೊಡ್ಡಿದರು. 2014ರ ಗೇಮ್ಸ್‌ನಲ್ಲಿ 86 ಕೆಜಿಯಲ್ಲಿ ಬೆಳ್ಳಿ, ಗೋಲ್ಡ್ ಕೋಸ್ಟ್ 2018ರಲ್ಲಿ 94 ಕೆಜಿಯಲ್ಲಿ ಕಂಚಿನ ಪದಕ ಗೆದ್ದ ವಿಕಾಸ್‌ಗೆ ಇದು ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ದಕ್ಕಿದ ಮೂರನೇ ಪದಕ.

  ಈ ಬಾರಿ ಕಾಮನ್‌ವೆಲ್ತ್‌ ಕ್ರೀಡಾಕೂಟದಲ್ಲಿ ವೇಟ್ ಲಿಫ್ಟಿಂಗ್​ನಲ್ಲಿ ಭಾರತದ ಕ್ರೀಡಾಪಟುಗಳು ಉತ್ತಮ ಸಾಧನೆ ತೋರುತ್ತಿದ್ದಾರೆ. ಈ ಸ್ಪರ್ಧೆಯಲ್ಲಿ ವಿಕಾಸ್ ಬೆಳ್ಳಿ ಪದಕ ಗೆಲ್ಲುವ ಮೂಲಕ ಭಾರತಕ್ಕೆ ಇದು ಎಂಟನೇ ಪದಕವಾಗಿದೆ. ಮೂರು ಚಿನ್ನ, ಮೂರು ಬೆಳ್ಳಿ, ಹಾಗೂ ಎರಡು ಕಂಚಿನ ಪದಕ ಭಾರತಕ್ಕೆ ಈ ವರೆಗೆ ಸಿಕ್ಕಿದೆ.