ಪಾಕ್‌ ನಿರೂಪಕಿ ಭೇಟಿ ಮಾಡಿದ ಕೊಹ್ಲಿ ಮೇಲೆ ಅಭಿಮಾನಿಗಳ ಅಸಮಾಧಾನ

•   Thu, Oct 20 2022 01:04:02 PM



• ನವದೆಹಲಿ, ಅ 20 (DaijiworldNews/DB): ಪಾಕಿಸ್ತಾನದ ಕ್ರೀಡಾ ನಿರೂಪಕಿ ಝೀನಬ್ ಅಬ್ಬಾಸ್ ಟೀಂ ಇಂಡಿಯಾ ಕ್ರಿಕೆಟಿಗ ವಿರಾಟ್ ಕೊಹ್ಲಿಯವರ ಸಂದರ್ಶನ ಮಾಡಲು ಅವಕಾಶ ದೊರಕಿರುವುದನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಇದಕ್ಕೆ ಆಕೆಯ ಅಭಿಮಾನಿಗಳು ಫುಲ್ ಖುಷ್ ಆದರೆ, ಇತ್ತ ವಿರಾಟ್ ಅಭಿಮಾನಿಗಳು ಬೇಸರ ವ್ಯಕ್ತಪಡಿಸಿದ್ದಾರೆ. ಝೀನಬ್ ಭೇಟಿ ಕಿಂಗ್ ಕೊಹ್ಲಿಗೆ ಕೆಟ್ಟ ಶಕುನ ಎಂದು ವಿರಾಟ್ ಅಭಿಮಾನಿಗಳು ಹೇಳಿಕೊಂಡಿದ್ದಾರೆ.

  ಟೀಂ ಇಂಡಿಯಾ ಆಟಗಾರ ಕೊಹ್ಲಿ ಸಂದರ್ಶನ ಮಾಡಬೇಕೆಂಬುದು ಝೀನಬ್‌ಳ ಹಲವು ವರ್ಷಗಳ ಕನಸಂತೆ. ಕೊನೆಗೂ ಆ ಕನಸು ನನಸಾಗಿರುವ ಖುಷಿಯನ್ನು ಟ್ವಿಟರ್ ಮುಖಾಂತರ ಅವರು ಬಹಿರಂಗಪಡಿಸಿದ್ದಾರೆ. ಕೊಹ್ಲಿ ಜೊತೆಗೆ ತೆಗೆಸಿಕೊಂಡಿರುವ ಫೋಟೋವನ್ನು ಶೇರ್ ಮಾಡಿ, ಯಾವಾಗಲೂ ಕೊಹ್ಲಿ ಅವರೊಂದಿಗೆ ಮಾತನಾಡುವ ಅವಕಾಶ ನಿಮಗೆ ಸಿಗದು. ಅವರೊಬ್ಬ ಅದ್ಬುತ ಮಾತುಗಾರ. ಶೀಘ್ರ ಐಸಿಸಿ ಚಾನೆಲ್‌ನಲ್ಲಿ ಕೊಹ್ಲಿ ಸಂದರ್ಶನ ಬಿತ್ತರಿಸಲಾಗುವುದು ಎಂದು ಬರೆದುಕೊಂಡಿದ್ದಾರೆ. ಇದಕ್ಕೆ ಪಾಕಿಸ್ತಾನದ ಹಲವರು ಮತ್ತು ಝೀನಬ್ ಅಭಿಮಾನಿಗಳು ಕಮೆಂಟ್ ಮಾಡಿದ್ದು, ಖುಷಿ ವ್ಯಕ್ತಪಡಿಸಿದ್ದಾರೆ.

  ಆದರೆ ಇದೇ ವೇಳೆ ಕೊಹ್ಲಿ ಅಭಿಮಾನಿಗಳಿಗೆ ಕೊಹ್ಲಿ ಪಾಕ್ ಆಂಕರ್‌ನ್ನು ಭೇಟಿಯಾಗಿರುವುದು ಅಸಮಾಧಾನ ತರಿಸಿದೆ. ಭಾರತ-ಪಾಕಿಸ್ತಾನ ಪಂದ್ಯಕ್ಕೂ ಮುನ್ನ ಕೊಹ್ಲಿ ಝೀನಬ್ ಅವರನ್ನು ಭೇಟಿಯಾಗಿರುವುದು ಕೆಟ್ಟ ಶಕುನ ಎಂದು ಅಭಿಮಾನಿಗಳು ವಿಶ್ಲೇಷಿಸಿದ್ದಾರೆ. 2017ರ ಐಸಿಸಿ ಚಾಂಪಿಯನ್ಸ್ ಟ್ರೋಫಿಯಲ್ಲಿ ವಿರಾಟ್ ಕೊಹ್ಲಿ ಮತ್ತು ಎಬಿ ಡಿವಿಲಿಯರ್ಸ್ ಅವರೊಂದಿಗೆ ಝೈನಾಬ್ ಸೆಲ್ಫಿ ತೆಗೆದುಕೊಂಡರು. ಆದರೆ ಮುಂದಿನ ಪಂದ್ಯದಲ್ಲಿ ಇಬ್ಬರೂ ಶೂನ್ಯಕ್ಕೆ ಔಟಾದರು. ಹೀಗಾಗಿ ಈ ಬಾರಿಯೂ ಹಾಗಾಗುವ ಸಾಧ್ಯತೆ ಇದೆ ಎಂಬುದಾಗಿ ಅಭಿಮಾನಿಗಳು ಹೇಳುತ್ತಿದ್ದಾರೆ.

  Not every day that you get to speak to/interview @imVkohli, what a fantastic orator, watch out on the @ICC channels. pic.twitter.com/tBsJSF2Drm

  — zainab abbas (@ZAbbasOfficial) October 18, 2022