ಪ್ರೊ ಕಬಡ್ಡಿ ಲೀಗ್-ಗೆಲುವಿನ ನಗೆ ಬೀರಿದ ಬೆಂಗಳೂರು ಬುಲ್ಸ್

•   Sun, Oct 30 2022 11:40:00 AM



• ಪುಣೆ, ಅ 30 (DaijiworldNews/DB): ಪುಣೆಯಲ್ಲಿ ಶನಿವಾರ ನಡೆದ ಪ್ರೊ ಕಬಡ್ಡಿ ಲೀಗ್‌ನಲ್ಲಿ ಬೆಂಗಳೂರು ಬುಲ್ಸ್‌ ತಂಡವು ದಬಾಂಗ್‌ ಡೆಲ್ಲಿ ತಂಡವನ್ನು 47-43 ಪಾಯಿಂಟ್ಸ್‌ಗಳಿಂದ ಮಣಿಸಿ ಗೆಲುವಿನ ನಗೆ ಬೀರಿತು. ಭರತ್ ಅವರ ಚಾಣಾಕ್ಷ ರೇಡಿಂಗ್‌ ಬೆಂಗಳೂರು ಬುಲ್ಸ್‌ ಗೆಲುವಿಗೆ ನೆರವಾಯಿತು.

  ಈ ಗೆಲುವಿನೊಂದಿಗೆ ಎಂಟು ಪಂದ್ಯಗಳ ಪೈಕಿ ಐದರಲ್ಲಿ ಗೆಲುವು ಸಾಧಿಸಿದ ಬೆಂಗಳೂರು ಬುಲ್ಸ್ ತಂಡವು ಪಾಯಿಂಟ್ಸ್‌ ಪಟ್ಟಿಯಲ್ಲಿಯೂ ಅಗ್ರಸ್ಥಾನಕ್ಕೇರಿದೆ. ಮೊದಲ ಅರ್ಧ ಭಾಗದಲ್ಲಿ 27-18 ರಿಂದ ಮುನ್ನಡೆಯಲ್ಲಿದ್ದ ತಂಡಕ್ಕೆ ದ್ವಿತೀಯಾರ್ಧದಲ್ಲಿ ಭರತ್ ಅವರು 20 ಪಾಯಿಂಟ್ಸ್‌ ಸಿಗುವಂತೆ ಮಾಡಿದರು. ಮಿಂಚಿನ ಪ್ರದರ್ಶನದೊಂದಿಗೆ ಎದುರಾಳಿ ತಂಡಕ್ಕೆ ತೀವ್ರ ಪೈಪೋಟಿ ನೀಡಿದ ಭರತ್, ಕೊನೆಗೂ ಬೆಂಗಳೂರು ಬುಲ್ಸ್ ತಂಡವನ್ನು ಗೆಲ್ಲಿಸುವಲ್ಲಿ ಸಫಲರಾದರು. ಇನ್ನು ತಂಡದ ಸೌರಭ್‌ ನಂದಾಲ್‌ 6, ನೀರಜ್‌ ನರ್ವಾಲ್‌ 5 ಮತ್ತು ವಿಕಾಸ್‌ ಖಂಡೋಲ 4 ಪಾಯಿಂಟ್ಸ್‌ ಗಳಿಸಿದರು.

  ದಬಾಂಗ್ ಡೆಲ್ಲಿ ತಂಡದ ನವೀನ್‌ ಕುಮಾರ್‌ (16 ಪಾಯಿಂಟ್ಸ್‌) ಮತ್ತು ಆಶು ಮಲಿಕ್ (15) ಪಾಯಿಂಟ್ಸ್‌ ಗಳಿಸಿ ಬಿರುಸಿನ ಆಟಕ್ಕೆ ಕಾರಣರಾದರಾದರೂ, ದ್ವಿತೀಯಾರ್ಧದಲ್ಲಿ ಗೆಲುವಿನ ಓಟದಲ್ಲಿ ಹಿಂದೆ ಬೀಳಬೇಕಾಯಿತು. ಇನ್ನು ಪಾಯಿಂಟ್ಸ್ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದ ದಬಾಂಗ್ ಡೆಲ್ಲಿ ತಂಡವು ಮೂರು ಸೋಲುಗಳೊಂದಿಗೆ ಎರಡನೇ ಸ್ಥಾನಕ್ಕೆ ಕುಸಿದಿದೆ.