ಹಾಲಿವುಡ್​ ಸಂಸ್ಥೆ ಜೊತೆ ಯಶ್ ಮಾತುಕತೆ - ಹೊಸ ಸಿನಿಮಾ ಪ್ಲ್ಯಾನ್‌?

•   Tue, Dec 31 2024 09:08:40 PM



• ಬೆಂಗಳೂರು, ಡಿ.31(DaijiworldNews/TA): ಯಶ್, ತಮ್ಮ ‘ಟಾಕ್ಸಿಕ್’ ಸಿನಿಮಾವನ್ನು ಇತರೆ ಸಿನಿಮಾಗಳಂತೆ ಅಲ್ಲದೆ ಭಾರಿ ದೊಡ್ಡ ಮಟ್ಟದಲ್ಲಿ ಪ್ರೆಸೆಂಟ್ ಮಾಡುವ ಯೋಜನೆ ಹಾಕಿಕೊಂಡಿದ್ದಾರೆ. ಸಿನಿಮಾದ ಚಿತ್ರೀಕರಣ ಚಾಲ್ತಿಯಲ್ಲಿರುವಾಗಲೇ ಹಾಲಿವುಡ್​ನ ಭಾರಿ ದೊಡ್ಡ ಸಂಸ್ಥೆಯೊಂದರೊಟ್ಟಿಗೆ ಮಾತುಕತೆ ಆರಂಭ ಮಾಡಿದ್ದಾರೆ.

  

  ವಿಶ್ವದ ಹಳೆಯ ಮತ್ತು ಅತ್ಯುತ್ತಮ ಸ್ಟುಡಿಯೋಗಳಲ್ಲಿ ಒಂದಾಗಿರುವ 20ತ್ ಸೆಂಚುರಿ ಫಾಕ್ಸ್ ಜೊತೆಗೆ ಯಶ್ ಮಾತುಕತೆ ನಡೆಸಿದ್ದಾರೆ. ಹಾಗೆಂದು ಯಶ್ ಹೊಸ ಹಾಲಿವುಡ್ ಸಿನಿಮಾಕ್ಕಾಗಿ ಮಾತುಕತೆ ನಡೆಸಿಲ್ಲ ಬದಲಿಗೆ ತಮ್ಮ ‘ಟಾಕ್ಸಿಕ್’ ಸಿನಿಮಾಕ್ಕಾಗಿಯೇ 20ತ್ ಸೆಂಚುರಿ ಫಾಕ್ಸ್ ಸ್ಟುಡಿಯೋ ಜೊತೆ ಮಾತುಕತೆ ನಡೆಸಿದ್ದಾರೆ.

  ‘ಟಾಕ್ಸಿಕ್’ ಸಿನಿಮಾ ವಿದೇಶದಲ್ಲಿಯೂ ಭಾರಿ ಅದ್ಧೂರಿಯಾಗಿ ಬಿಡುಗಡೆ ಮಾಡಲು ಸಿದ್ಧವಾಗಿದ್ದು, ಇದೇ ಕಾರಣಕ್ಕೆ ನಿರ್ಮಾಣ ಸಂಸ್ಥೆಯ ಜೊತೆಗೆ ವಿತರಣಾ ಸಂಸ್ಥೆಯೂ ಆಗಿರುವ 20ತ್ ಸೆಂಚುರಿ ಫಾಕ್ಸ್ ಜೊತೆ ಮಾತನಾಡುತ್ತಿದ್ದಾರೆ. ಚರ್ಚೆಗಳು ಅತ್ಯಂತ ಆರಂಭಿಕ ಹಂತಗಳಲ್ಲಿವೆ ಆದರೆ ಟಾಕ್ಸಿಕ್ ಅನ್ನು ಜಾಗತಿಕ ಯೋಜನೆಯಾಗಿ ಮಾಡುವ ಉದ್ದೇಶವಿದೆ ಎನ್ನಲಾಗಿದೆ.

  ‘ಟಾಕ್ಸಿಕ್’ ಸಿನಿಮಾ 2025ರ ಡಿಸೆಂಬರ್​ಗೆ ಬಿಡುಗಡೆ ಆಗಲಿದೆ. ಬೆಂಗಳೂರಿನಲ್ಲಿ ಬಹುತೇಕ ಚಿತ್ರೀಕರಣ ಮುಗಿದಿದ್ದು, ಈಗ ಮುಂಬೈನಲ್ಲಿ ಚಿತ್ರೀಕರಣ ನಡೆಯುತ್ತಿದೆ. ಸಿನಿಮಾದಲ್ಲಿ ಯಶ್ ಜೊತೆಗೆ ಕಿಯಾರಾ ಅಡ್ವಾಣಿ, ನಯನತಾರಾ ಸೇರಿದಂತೆ ಇನ್ನೂ ಹಲವು ಸ್ಟಾರ್ ನಟ-ನಟಿಯರು ನಟಿಸುತ್ತಿದ್ದಾರೆ. ಗೀತು ಮೋಹನ್​ದಾಸ್ ನಿರ್ದೇಶನ ಮಾಡುತ್ತಿದ್ದು, ಕೆಲವು ಹಾಲಿವುಡ್ ತಂತ್ರಜ್ಞರು ಸಿನಿಮಾಕ್ಕೆ ಕೆಲಸ ಮಾಡುತ್ತಿದ್ದಾರೆ.