ಬೆಂಗಳೂರು,ಜು 26(Daijiworld News/RD): 2018 ರಲ್ಲಿ ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಮೂಲಕ ತೆರೆಕಂಡಿದ್ದ ಕೆಜಿಎಫ್ ಚಾಪ್ಟರ್ 1 ದೇಶದಾದ್ಯಂತ ಹೊಸ ಅಲೆಯನ್ನು ಸೃಷ್ಠಿಸಿತ್ತು. ಈ ಚಿತ್ರ ಎಲ್ಲರ ಚಿತ್ತ ಸ್ಯಾಂಡಲ್ವುಡ್ ನತ್ತ ನೋಡುವಂತೆ ಮಾಡಿದ್ದು, ಬಾಕ್ಸ್ ಆಫೀಸ್ ನಲ್ಲಿ ಭರ್ಜರಿ ಕಲೆಕ್ಷನ್ ಮಾಡಿತ್ತು. ಹೋಂಬಾಳೆ ಫಿಲಂಸ್ನಿಂದ ಮೂಡಿ ಬಂದ ಈ ಚಿತ್ರ ಇದೀಗ ಕೆಜಿಎಫ್ ಚಾಪ್ಟರ್ 2 ಚಿತ್ರೀಕರಣ ಆರಂಭಿಸಿದ್ದು, ಚಿತ್ರದ ವಿಲನ್ ಪಾತ್ರವನ್ನು ಪರಿಚಯಿಸುವ ಮೂಲಕ ಅಭಿಮಾನಿಗಳಿಗೆ ಸಿಹಿ ನೀಡಿದ್ದಾರೆ.
![](https://daijiworld.ap-south-1.linodeobjects.com/iWeb/tvdaijiworld/img_tv247/rd-260719-kgf.jpg)
ಹೊಂಬಾಳೆ ಫಿಲಂಸ್ ತನ್ನ ಟ್ವಿಟ್ಟರ್ ಖಾತೆಯಲ್ಲಿ ಅಭಿಮಾನಿಗಳಿಗೆ ಒಂದು ಹೊಸ ಸರ್ಪ್ರೈಸ್ ನೀಡಲು ರೆಡಿಯಾಗಿದ್ದು, ಶುಕ್ರವಾರ ಮುಂಜಾನೆ 11 ಗಂಟೆಗೆ ಕೆಜಿಎಫ್ 2 ಅಪ್ ಡೇಟ್ ಕೊಡುವುದಾಗಿ ಟ್ವೀಟ್ನಲ್ಲಿ ಹೇಳಿತ್ತು. ಇದರಂತೆ ಇಂದು ಅಧೀರ ಪಾತ್ರಧಾರಿಯ ಫಸ್ಟ್ ಲುಕ್ ರಿವೀಲ್ ಮಾಡುವ ಮೂಲಕ ಅಭಿಮಾನಿಗಳಲ್ಲಿ ಚಿತ್ರದ ಬಗೆಗಿನ ನಿರೀಕ್ಷೆಯನ್ನು ಇಮ್ಮಡಿಗೊಳಿಸಿದ್ದಾರೆ.
ದೇಶಾದ್ಯಂತ ಸಂಚಲನ ಸೃಷ್ಟಿಸಿದ್ದ ಈ ಚಿತ್ರ, ಇದೀಗ ಕೆಜಿಎಫ್ ಚಾಪ್ಟರ್ 2 ಚಿತ್ರಕ್ಕಾಗಿ ಇಡೀ ದೇಶವೇ ಕಾದು ಕುಳಿತಿದೆ. ಕೆಜಿಎಫ್ ಚಾಪ್ಟರ್ 1 ಚಿತ್ರದ ಕೊನೆಯ ದೃಶ್ಯವು ಹಲವು ಕುತೂಹಲಗಳ ಜೊತೆಗೆ ಪ್ರಶ್ನೆಯು ಮೂಡುವಂತೆ ಮಾಡಿದ್ದು, ಅದರ ಮುಂದುವರಿದ ಭಾಗ ಕೆಜಿಎಫ್ ಚಾಪ್ಟರ್ 2 ನ ಕಥೆ, ಸಂಭಾಷಣೆ, ಚಿತ್ರೀಕರಣ, ಆಕ್ಷನ್, ಹಾಗೂ ಪಾತ್ರಗಳ ಪರಿಚಯ ಯಾವ ರೀತಿಯಲ್ಲಿ ಇರಬಹುವುದು ಎಂಬುದಾಗಿ ಕೌತುಕರಾಗಿರುವ ಅಭಿಮಾನಿಗಳಿಗೆ ಇಂದು ಪಾತ್ರ ಪರಿಚಯಿಸುವ ಮೂಲಕ ಇನ್ನು ಕುತೂಹಲ ಕೆರಳಿಸಿದೆ.
ಕೆಜಿಎಫ್ ಚಾಪ್ಟರ್ 1 ಚಿತ್ರದಲ್ಲಿ ಅಧೀರ ಪಾತ್ರ ಸೃಷ್ಠಿಲಾಗಿತ್ತು, ಆದರೆ ಆತನನ್ನು ಪರಿಚಯಿಸಿರಲಿಲ್ಲ. ಆದರೆ ಇಂದು ಚಿತ್ರತಂಡ ಅಧೀರನ ಗುರುತಿಸುವಿಕೆಗಾಗಿ ಬಲಗೈನ ಬೆರಳಿನಲ್ಲಿ ಸಿಂಹ ಮುಖದ ಉಂಗುರವನ್ನು ತೋರಿಸಿದ್ದು, ಇದೀಗ ಫಸ್ಟ್ ಲುಕ್ ನಲ್ಲೂ ವ್ಯಕ್ತಿಯೊಬ್ಬ ಹಿಂದೆ ಕೈ ಕಟ್ಟಿ ನಿಂತಿರುವ ಚಿತ್ರವನ್ನು ಪೋಸ್ಟ್ ಮಾಡಿದೆ. ಈ ಪೋಸ್ಟ್ನ್ನು ಈಗಾಗಲೇ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಸಿನಿಪ್ರಿಯರಿಗೆ ಸಂತಸ ನೀಡಿದೆ.
ಈ ಪಾತ್ರದಲ್ಲಿ ಬಾಲಿವುಡ್ ನಟ ಸಂಜಯ್ ದತ್ ನಟಿಸಲಿದ್ದಾರೆ ಎಂಬ ವಿಚಾರ ಗಾಂಧಿನಗರದಲ್ಲಿ ಹರಿದಾಡಿತ್ತು. ಆದರೆ ಇಲ್ಲಿಯವರೆಗೂ ಈ ಚಿತ್ರತಂಡ ಇದರ ಬಗ್ಗೆ ಎಲ್ಲಿಯೂ ಹೇಳಿಕೊಂಡಿಲ್ಲ. ರವೀನಾ ಟಂಡನ್ ಈ ಚಿತ್ರದಲ್ಲಿ ನಟಿಸಲಿದ್ದಾರೆ ಎಂಬ ಮಾತುಗಳು ಕೇಳಿ ಬಂದಿದ್ದು, ಇದುವರೆಗೂ ಚಿತ್ರತಂಡ ಅಧಿಕೃತ ಹೇಳಿಕೆಯನ್ನು ನೀಡಿಲ್ಲ.