'ಆ ಹಿಟ್ ಸಿನಿಮಾನಲ್ಲಿ ನಟಿಸಿದ್ದಕ್ಕೆ ಪಶ್ಚಾತಾಪ'- ಸೈಫ್ ಅಲಿ ಖಾನ್

•   Fri, Sep 11 2026 07:32:48 PM



• ಮುಂಬೈ, ಸೆ. 11 (DaijiworldNews/ AK): ನಟ-ನಟಿಯರು ಸೋತ ಸಿನಿಮಾನಲ್ಲಿ ನಟಿಸಿದ ಬಗ್ಗೆ ಪಶ್ಚಾತ್ತಾಪ ವ್ಯಕ್ತಪಡಿಸುವುದು ಸಾಮಾನ್ಯ, ಆದರೆ ಬಾಲಿವುಡ್ ನಟ ಸೈಫ್ ಅಲಿ ಖಾನ್, ಹಿಟ್ ಸಿನಿಮಾನಲ್ಲಿ ನಟಿಸಿದ್ದಕ್ಕೂ ಪಶ್ಚಾತ್ತಾಪ ವ್ಯಕ್ತಪಡಿಸಿದ್ದಾರೆ.

  ಆ ಸಿನಿಮಾನಲ್ಲಿ ನಾನು ನಟಿಸಬಾರದಿತ್ತು ಎಂದಿದ್ದಾರೆ. ಅದುವೇ 2012ರಲ್ಲಿ ಬಿಡುಗಡೆ ಆಗಿದ್ದ ‘ಕಾಕ್​​ಟೇಲ್’. ಆ ಸಿನಿಮಾನಲ್ಲಿ ಸೈಫ್ ಅಲಿ ಖಾನ್, ದೀಪಿಕಾ ಪಡುಕೋಣೆ ಮತ್ತು ಡಿಯಾನಾ ಪೆಂಟಿ ನಟನೆ ಮಾಡಿದ್ದರು. ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಆದರೆ ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಮಾತನಾಡಿರುವ ಸೈಫ್ ಅಲಿ ಖಾನ್, ಆ ಸಿನಿಮಾನಲ್ಲಿ ನಾನು ನಟಿಸಬಾರದಿತ್ತು ಎಂದಿದ್ದಾರೆ.

  ‘ಕಾಕ್​​ಟೇಲ್’ ಸಿನಿಮಾದ ಮುಖ್ಯ ಪಾತ್ರದಲ್ಲಿ ನಟಿಸುವುದರ ಜೊತೆಗೆ ಅದರ ಸಹನಿರ್ಮಾಪಕರೂ ಆಗಿದ್ದರು ಸೈಫ್ ಅಲಿ ಖಾನ್. ಇದೀಗ ‘ಗಲ್ಫ್ ನ್ಯೂಸ್’ ಜೊತೆಗಿನ ಸಂದರ್ಶನದಲ್ಲಿ ಮಾತನಾಡಿರುವ ಸೈಫ್ ಅಲಿ ಖಾನ್, ‘ಕಾಕ್‌ಟೈಲ್’ ಚಿತ್ರದಲ್ಲಿ ‘ಗೌತಮ್’ ಪಾತ್ರವನ್ನು ಆಯ್ಕೆ ಮಾಡಿಕೊಂಡಿದ್ದು ಆ ಪಾತ್ರಕ್ಕಾಗಿ ಅಲ್ಲ, ಬದಲಿಗೆ ಸಿನಿಮಾ ಹೇಗಾದರೂ ಮಾಡಿ ಸೆಟ್ಟೇರಲಿ ಎಂಬ ಕಾರಣಕ್ಕಾಗಿ ಎಂದಿದ್ದಾರೆ.

  ‘ನಾನು ಆ ಪಾತ್ರವನ್ನು ಮಾಡಿದೆ ಏಕೆಂದರೆ ನಾವು ಅದನ್ನು ನಿರ್ಮಿಸುತ್ತಿದ್ದೆವು. ನೂರಕ್ಕೆ ನೂರು ಪ್ರತಿಶತ ಅದು ತಪ್ಪೇ ಆಗಿತ್ತು, ಮತ್ತು ಅದು ಪ್ರಗತಿಪರ ಅಲ್ಲದ ಸ್ಕ್ರಿಪ್ಟ್ ಆಯ್ಕೆಯಾಗಿತ್ತು. ನಾನು ಆ ಪಾತ್ರಕ್ಕಾಗಿ ಅದನ್ನು ಮಾಡಲಿಲ್ಲ, ಬದಲಿಗೆ ಸಿನಿಮಾ ನಿರ್ಮಾಣಗೊಳ್ಳಬೇಕು ಎಂಬ ಕಾರಣಕ್ಕೆ ಮಾಡಿದೆ. ನಾವು ವಿವಿಧ ಕಾರಣಗಳಿಗಾಗಿ ಕೆಲಸಗಳನ್ನು ಮಾಡುತ್ತೇವೆ. ಅತ್ಯಾಕರ್ಷಕ ಪಾತ್ರ ಯಾವುದೆಂದರೆ ಅದು ವೆರೋನಿಕಾ ಪಾತ್ರ ಎಂಬುದು ನನಗೆ ಚೆನ್ನಾಗಿ ತಿಳಿದಿತ್ತು’ ಎಂದು ಅವರು ತಿಳಿಸಿದ್ದಾರೆ.

  ಇತ್ತೀಚೆಗಷ್ಟೆ ‘ಕಾಕ್​​ಟೇಲ್ 2’ ಸಿನಿಮಾ ಸಹ ಬಿಡುಗಡೆ ಆಗಿದೆ. ಸಿನಿಮಾನಲ್ಲಿ ಕನ್ನಡತಿ ರಶ್ಮಿಕಾ ಮಂದಣ್ಣ, ಕೃತಿ ಸನೋನ್ ಮತ್ತು ನಟ ಶಾಹಿದ್ ಕಪೂರ್ ಒಟ್ಟಿಗೆ ನಟಿಸಿದ್ದರು. ಬಾಕ್ಸ್ ಆಫೀಸ್​​ನಲ್ಲಿ ಸಾಧಾರಣ ಯಶಸ್ಸನ್ನಷ್ಟೆ ಈ ಸಿನಿಮಾ ಕಂಡಿತು.