'ನನ್ನ ಸ್ವಂತ ಧ್ವನಿಯಲ್ಲಿಯೇ ಡಬ್ಬಿಂಗ್ ಮಾಡುವುದು ಹೆಮ್ಮೆಯ ವಿಷಯ'- ರಶ್ಮಿಕಾ ಮಂದಣ್ಣ

•   Thu, Oct 22 2026 02:13:41 PM



• ಮುಂಬೈ, ಅ.22 (DaijiworldNews/AA): ನನ್ನ ಸ್ವಂತ ಧ್ವನಿಯಲ್ಲಿಯೇ ಎಲ್ಲ ಭಾಷೆಗಳಿಗೂ ಡಬ್ಬಿಂಗ್ ಮಾಡುವುದು ನನಗೆ ತಂದಿರುವ ಹೆಮ್ಮೆಯ ವಿಷಯವಾಗಿದೆ. ಇದರ ಹಿಂದೆ ಕಠಿಣ ಪರಿಶ್ರಮ ಮತ್ತು ದೊಡ್ಡ ಪ್ರಯತ್ನ ಅಡಗಿದೆ. ಸವಾಲುಗಳನ್ನು ಸ್ವೀಕರಿಸಿ ಯಶಸ್ಸು ಸಾಧಿಸುವುದೇ ನಿಜವಾದ ಕಲಾವಿದೆಯ ಲಕ್ಷಣ ಎಂದು ನಟಿ ರಶ್ಮಿಕಾ ಮಂದಣ್ಣ ಹೇಳಿದ್ದಾರೆ.

  ಬಾಲಿವುಡ್ ಚಲನಚಿತ್ರಗಳಲ್ಲಿ ತನ್ನ ದಕ್ಷಿಣ ಭಾರತದ ಮಾತಿನ ಶೈಲಿ ಹಾಗೂ ಉಚ್ಚಾರಣೆಯ ಕುರಿತು ನಿರಂತರವಾಗಿ ಕೇಳಿಬರುತ್ತಿರುವ ಟೀಕೆಗಳಿಗೆ ಪ್ರತಿಕ್ರಿಯಿಸಿರುವ ಅವರು, "ನಾನು ಎಂದಿಗೂ ನನ್ನ ವೃತ್ತಿಜೀವನಕ್ಕೆ ಯಾವುದೇ ಮಿತಿಗಳನ್ನು ಹಾಕಿಕೊಳ್ಳಲು ಬಯಸಲಿಲ್ಲ. ಎಲ್ಲಾ ಭಾಷೆಯ ಸಿನಿಮಾಗಳಲ್ಲಿ ನಟಿಸಬೇಕು ಎನ್ನುವುದು ನನ್ನ ಆಸೆಯಾಗಿತ್ತು. ಆರಂಭದಿಂದಲೂ ವಿವಿಧ ರೀತಿಯ ವಿಭಿನ್ನ ಪಾತ್ರಗಳನ್ನು ಆಯ್ಕೆ ಮಾಡಿಕೊಳ್ಳುವ ನಿರ್ಧಾರ ಮಾಡಿದ್ದೆ. 'ಅನಿಮಲ್' ಮತ್ತು 'ದಿ ಗರ್ಲ್ಫ್ರೆಂಡ್' ಚಿತ್ರಗಳಂತಹ ಭಿನ್ನ ಕಥೆಗಳಲ್ಲಿ ನಟಿಸುವುದು ನನಗೆ ಅಪಾರ ತೃಪ್ತಿ ನೀಡಿದೆ" ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

  "ದಕ್ಷಿಣ ಭಾರತದ ಮೂಲದವಳಾದ ಕಾರಣ ನನ್ನ ಮಾತಿನಲ್ಲಿ ಆ ಪ್ರಾದೇಶಿಕ ಶೈಲಿ ಇರುವುದು ಸಹಜವಾಗಿದೆ. ಅದನ್ನು ಹೊರತುಪಡಿಸಿ ಬೇರೆ ರೀತಿಯ ನಿರೀಕ್ಷೆ ಇಟ್ಟುಕೊಳ್ಳುವುದು ಸಂಪೂರ್ಣವಾಗಿ ಅವೈಜ್ಞಾನಿಕವಾಗಿದೆ. 'ಅನಿಮಲ್', 'ಕಾಕ್ಟೈಲ್ 2' ಹಾಗೂ 'ಛಾವಾ' ಚಿತ್ರಗಳಲ್ಲಿ ನನ್ನ ಉಚ್ಚಾರಣೆಯ ಬಗ್ಗೆ ಬಂದ ಟೀಕೆಗಳನ್ನು ನಾನು ಗಂಭೀರವಾಗಿ ಪರಿಗಣಿಸಿಲ್ಲ" ಎಂದಿದ್ದಾರೆ.

  "ಪ್ರತಿ ಸಿನಿಮಾದಲ್ಲಿಯೂ ನಾನೇ ಸ್ವತಃ ಧ್ವನಿ ನೀಡಿ ಡಬ್ಬಿಂಗ್ ಮಾಡಲು ಹೆಚ್ಚಿನ ಶ್ರಮ ವಹಿಸುತ್ತೇನೆ. ಒಂದು ವೇಳೆ ನಿರ್ದೇಶಕರಿಗೆ ಬೇರೆಯವರ ಧ್ವನಿ ಸೂಕ್ತವೆನಿಸಿದರೆ ಆ ಸ್ವಾತಂತ್ರ‍್ಯವನ್ನು ನಾನು ಅವರಿಗೆ ನೀಡುತ್ತೇನೆ. ಆದರೆ ನನ್ನ ಯಾವೊಬ್ಬ ನಿರ್ದೇಶಕರೂ ಸಹ ಬೇರೆ ಡಬ್ಬಿಂಗ್ ಕಲಾವಿದರ ಬಳಿ ಕೆಲಸ ಮಾಡಿಸಲು ಬಯಸಲಿಲ್ಲ" ಎಂದು ತಿಳಿಸಿದ್ದಾರೆ.