ತ್ರಿಷಾ ಶೀಘ್ರದಲ್ಲೇ ಬೆಳ್ಳಿಪರದೆಯಿಂದ ರಾಜಕೀಯ ರಂಗಕ್ಕೆ ಕಾಲಿಡಲಿದ್ದಾರೆಯೇ?- ಕೊಯಮತ್ತೂರು ಭೇಟಿ ವೇಳೆ ಜನಸಾಗರ

•   Mon, Oct 26 2026 02:35:00 PM



• ಕೊಯಮತ್ತೂರು,  ಅ.26 (DaijiworldNews/AK): ಖ್ಯಾತ ನಟಿ ತ್ರಿಷಾ ಕೃಷ್ಣನ್ ಅವರ ಕೊಯಮತ್ತೂರು ಭೇಟಿ ಈಗ ತಮಿಳುನಾಡಿನಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ. ಮೊಬೈಲ್ ಶೋರೂಮ್ ಉದ್ಘಾಟನೆಗೆ ಬಂದಿದ್ದ ಅವರನ್ನು ನೋಡಲು ಸಾವಿರಾರು ಅಭಿಮಾನಿಗಳು ನೆರೆದಿದ್ದರು. ಈ ಜನಸ್ತೋಮ ನಟಿಯ ಜನಪ್ರಿಯತೆಗೆ ಸಾಕ್ಷಿಯಾಯಿತು.

  ಕಾರ್ಯಕ್ರಮಕ್ಕೆ ಆಗಮಿಸಿದ ತ್ರಿಷಾ ತೆರೆದ ವಾಹನದಲ್ಲಿ ನಿಂತು ಜನರಿಗೆ ಕೈಬೀಸಿದರು. ಅವರನ್ನು ನೋಡಲು ಹರಿದುಬಂದ ಜನಸಾಗರ ಕಂಡು ಎಲ್ಲರೂ ಆಶ್ಚರ್ಯಚಕಿತರಾದರು. ಈ ರೋಡ್ ಶೋ ಸಿನಿಮಾ ರಂಗವನ್ನು ಮೀರಿ ರಾಜಕೀಯ ವಲಯದಲ್ಲೂ ಸದ್ದು ಮಾಡುತ್ತಿದೆ. ದಳಪತಿ ವಿಜಯ್ ಹಾಗೂ ‘ಟಿವಿಕೆ’ ಪಕ್ಷದ ಅಭಿಮಾನಿಗಳು ತ್ರಿಷಾ ರಾಜಕೀಯಕ್ಕೆ ಬರಲಿ ಎಂದು ಬಹಿರಂಗವಾಗಿ ಬಯಸುತ್ತಿದ್ದಾರೆ.

  ಕಾರ್ಯಕ್ರಮ ಮುಗಿದ ನಂತರ ಸುದ್ದಿಗಾರರು ತ್ರಿಷಾ ಅವರನ್ನು ರಾಜಕೀಯ ಪ್ರವೇಶದ ಬಗ್ಗೆ ಪ್ರಶ್ನಿಸಿದರು. ಇದಕ್ಕೆ ತ್ರಿಷಾ ಯಾವುದೇ ನೇರ ಉತ್ತರ ನೀಡಲಿಲ್ಲ. ಕೇವಲ ಮುಗುಳುನಗುತ್ತಾ ಅಲ್ಲಿಂದ ಮುಂದೆ ಸಾಗಿದರು.

  
  ಈ ಭೇಟಿಯು ಯಾವುದೇ ಅಧಿಕೃತ ರಾಜಕೀಯ ಕಾರ್ಯಕ್ರಮವಾಗಿರಲಿಲ್ಲ. ನಟಿ ಕೂಡ ಯಾವುದೇ ರಾಜಕೀಯ ನಿರ್ಧಾರವನ್ನು ಇದುವರೆಗೆ ಪ್ರಕಟಿಸಿಲ್ಲ. ಆದರೆ ಕೊಯಮತ್ತೂರಿನಲ್ಲಿ ನೆರೆದಿದ್ದ ಬೃಹತ್ ಜನಸ್ತೋಮ ಅವರ ಅಭಿಮಾನಿಗಳಲ್ಲಿ ಹೊಸ ಭರವಸೆ ಹುಟ್ಟುಹಾಕಿದೆ. ತ್ರಿಷಾ ಶೀಘ್ರದಲ್ಲೇ ಬೆಳ್ಳಿಪರದೆಯಿಂದ ರಾಜಕೀಯ ರಂಗಕ್ಕೆ ಕಾಲಿಡಲಿದ್ದಾರೆಯೇ ಎಂಬ ಪ್ರಶ್ನೆ ಎದ್ದಿದೆ. ಸದ್ಯಕ್ಕೆ ಈ ಬಗ್ಗೆ ಯಾವುದೇ ಅಧಿಕೃತ ಸ್ಪಷ್ಟನೆ ಲಭ್ಯವಾಗಿಲ್ಲ. ಆದರೆ ಜನಸ್ತೋಮ ನೋಡಿದ ಬಳಿಕ ತ್ರಿಷಾಗೆ ಸಿಗುತ್ತಿರುವ ಬೆಂಬಲ ಎಂಥದ್ದು ಎಂಬುದು ಸ್ಪಷ್ಟವಾಗಿದೆ.