ಲಾಗೋಸ್ : ತುಳು ಕೂಟ ನೈಜೀರಿಯಾದ ಅದ್ಧೂರಿ 25ನೇ ವಾರ್ಷಿಕೋತ್ಸವ ಸಂಭ್ರಮ

•   Fri, Dec 13 2024 11:41:26 AM



• ಲಾಗೋಸ್ (ನೈಜೀರಿಯಾ), ಡಿ. 13(DaijiworldNews/TA): ನೈಜೀರಿಯಾದಲ್ಲಿ ನೆಲೆಸಿರುವ ತುಳು ಬಾಂಧವರು ಒಟ್ಟುಗೂಡಿ ಡಿಸೆಂಬರ್ 8 ರಂದು ಸಿಲಾಟ್ರಾನ್ ಹೋಟೆಲ್‌ನಲ್ಲಿ ತುಳು ಕೂಟದ 25 ನೇ ವಾರ್ಷಿಕೋತ್ಸವನ್ನು ವೈಭವಯುತವಾಗಿ ಆಚರಿಸಿ ಇತಿಹಾಸ ನಿರ್ಮಿಸಿದರು. ಭಾರತದ ಕರಾವಳಿ ಕರ್ನಾಟಕದ ತುಳು ಭಾಷಿಕ ಸಮುದಾಯದ ಸುಮಾರು 150 ಸದಸ್ಯರನ್ನೊಳಗೊಂಡ ತುಳು ಕೂಟ ಇದಾಗಿದ್ದು ಕಾರ್ಯಕ್ರಮವು ಅದ್ದೂರಿಯಾಗಿತ್ತು.

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  

  ಅಧ್ಯಕ್ಷ, ಕಾರ್ಯದರ್ಶಿ ಅಥವಾ ಯಾವುದೇ ಪದಾಧಿಕಾರಿ ಸ್ಥಾನಗಳಿಲ್ಲದೆ ಅನನ್ಯವಾಗಿ ಕಾರ್ಯನಿರ್ವಹಿಸುತ್ತಿರುವ ಈ ಸಂಘವು 25 ವರ್ಷಗಳಿಂದ ಸಾಮೂಹಿಕ ನಾಯಕತ್ವದಲ್ಲಿ ಯಶಸ್ವಿಯಾಗಿ ಒಗ್ಗೂಡಿಸಲ್ಪಟ್ಟಿದೆ. ತುಳು ಕೂಟವನ್ನು 2000 ದಲ್ಲಿ ಸುಂದರ್ ಕೋಟ್ಯಾನ್, ರಾಮಪ್ಪ ಪೂಜಾರಿ, ರೋಹಿತ್‌ ಸಾಲಿಯಾನ್‌, ಅಜಿತ್ ಚೌಟ, ಮತ್ತು ಸದಾನಂದ ಮೆಲಂಟ ಅವರು ಸ್ಥಾಪಿಸಿದರು. ವರ್ಷಂಪ್ರತಿ ಅದರ ಸದಸ್ಯತ್ವವು ಹೆಚ್ಚುತ್ತಿದೆ. ಡಿಸೆಂಬರ್ 7 ರ ಶನಿವಾರದಂದು, ಈ ಮೈಲಿಗಲ್ಲು ಗುರುತಿಸುವ ಸಲುವಾಗಿ ಸಂಘವು ವಿಶಿಷ್ಟವಾದ ಕಾರ್ಯಕ್ರಮವನ್ನು ಆಯೋಜಿಸಿತ್ತು.

  ಸಂಭ್ರಮಾಚರಣೆಯಲ್ಲಿ ಮಂಗಳೂರಿನ ವಿಶೇಷ ಅತಿಥಿಗಳಾದ - ಜನಪ್ರಿಯ ತುಳು ಹಾಸ್ಯ ಟಿವಿ ಸರಣಿ ‘ಖಾಸಗಿ ಚಾಲೆಂಜ್’ಗೆ ಹೆಸರುವಾಸಿಯಾದ ಜೋಡಿ ವಾಲ್ಟರ್ ನಂದಳಿಕೆ ಮತ್ತು ಅರವಿಂದ್ ಬೋಳಾರ್ ಪಾಲ್ಗೊಂಡಿದ್ದರು. ಸಾಂಪ್ರದಾಯಿಕ ನೈಜೀರಿಯನ್ ಶೈಲಿಯಲ್ಲಿ ಅವರಿಗೆ ಆತ್ಮೀಯ ಸ್ವಾಗತ ನೀಡಲಾಯಿತು, ನಂತರ ತುಳು ಭಾಷಿಕ ಸಮುದಾಯದ ಮಹಿಳೆಯರ ನೇತೃತ್ವದಲ್ಲಿ ವಿಧ್ಯುಕ್ತ ತುಳುನಾಡು ಸ್ವಾಗತ ನೀಡಲಾಯಿತು.

  ನೈಜೀರಿಯಾಕ್ಕೆ ಭಾರತದ ಹೈಕಮಿಷನ್ ಪ್ರತಿನಿಧಿಸುವ ಮಹೇಶ್ ನರಸಿಂಹನ್ ಮತ್ತು ಇಂಡಿಯನ್ ಕಲ್ಚರಲ್ ಅಸೋಸಿಯೇಷನ್‌ನ ಅಧ್ಯಕ್ಷ ಶಿವಕುಮಾರ್ ವೇಲಪ್ಪನ್, ತುಳು ಕೂಟಾ ನೈಜೀರಿಯಾದ ಸ್ಥಾಪಕ ಸದಸ್ಯ ರೋಹಿತ್ ಸಾಲ್ಯಾನ್ ಸೇರಿದಂತೆ ಇತರ ವಿಶೇಷ ಅತಿಥಿಗಳು ಆಗಮಿಸಿದ್ದರು. ಕಾರ್ಯಕ್ರಮವು ಗಣ್ಯರನ್ನು ಸ್ವಾಗತಿಸುವುದರೊಂದಿಗೆ ಪ್ರಾರಂಭವಾಯಿತು, ನಂತರ ದೀಪ ಬೆಳಗಿಸಿ ಪ್ರಾರ್ಥನೆ ನಡೆಯಿತು. 25 ನೇ ವಾರ್ಷಿಕೋತ್ಸವದ ಲೋಗೋವನ್ನು ಅತಿಥಿಗಳು ಅಧಿಕೃತವಾಗಿ ಅನಾವರಣಗೊಳಿಸಿದರು.

  ತುಳು ಕೂಟದ ಸ್ಪೂರ್ತಿದಾಯಕ 25 ವರ್ಷಗಳ ಪ್ರಯಾಣದ ಕುರಿತಾದ ವೀಡಿಯೋ ತುಣುಕನ್ನು ಪ್ರದರ್ಶಿಸಲಾಯಿತು. ಇದೇ ವೇಳೆ ಸಂಘದ ಯಶಸ್ಸಿಗೆ ಗಣನೀಯ ಕೊಡುಗೆ ನೀಡಿದ ಹಿರಿಯ ಸದಸ್ಯರನ್ನು ಸನ್ಮಾನಿಸಲಾಯಿತು. ವಾಲ್ಟರ್ ನಂದಳಿಕೆ ಮತ್ತು ಅರವಿಂದ ಬೋಳಾರ್ ಅವರನ್ನು ಸಂಘಟಕರು ಶಾಲು ಹೊದಿಸಿ, ಪೇಟಾ ಧಾರಣೆ ಮಾಡಿ, ನೆನಪಿನ ಕಾಣಿಕೆ, ಫಲವಸ್ತು ನೀಡಿ ಗೌರವಿಸಿದರು. ತುಳು ಕೂಟದ ಹಿರಿಯ ಸದಸ್ಯ ಜಯಪ್ರಕಾಶ್ ರಾವ್ ಅತಿಥಿಗಳನ್ನು ಪರಿಚಯಿಸಿದರು.

  ಸಂಜೆಯ ಮನರಂಜನಾ ಕಾರ್ಯಕ್ರಮದಲ್ಲಿ ತುಳು ಕೂಟದ ಹಿರಿಯ ಮತ್ತು ಕಿರಿಯ ಸದಸ್ಯರ ಅದ್ಭುತ ನೃತ್ಯ ಪ್ರದರ್ಶನಗಳು, ಹಾಡುಗಳು, ಹಾಸ್ಯ ಕಿರುನಾಟಕಗಳು ಮತ್ತು ನಟನೆಗಳು ಸಂಭ್ರಮವನ್ನು ಹೆಚ್ಚಿಸಿದವು. ನಂದಳಿಕೆ-ಬೋಳಾರ್ ಜೋಡಿಯ ಪ್ರೈವೇಟ್‌ ಚಾಲೆಂಜ್‌ನ ಎರಡು ಲೈವ್ ಮಿನಿ-ಕಂತುಗಳ ಪ್ರದರ್ಶನ ಪ್ರೇಕ್ಷಕರು ನಗೆಯ ಕಡಲಲ್ಲಿ ತೇಲುವಂತೆ ಮಾಡಿತು.

  ತುಳು ಕೂಟದ ಸದಸ್ಯರು ಕರೋಕೆ ಗಾಯನ ನಡೆಸಿಕೊಟ್ಟರು, ಹೈಕಮಿಷನ್ ಅತಿಥಿಗಳಾದ ಮಹೇಶ್ ನರಸಿಂಹನ್ ಅವರು ಎರಡು ಹಿಂದಿ ಗೀತೆಗಳನ್ನು ಹಾಡಿದ್ದು ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರವಾಯಿತು. ತುಳು ಕೂಟದ ಸದಸ್ಯರು ಜನಪ್ರಿಯ ತುಳು ನಾಟಕವಾದ ‘ಪುದರ್ ದೀತುಜಿ’ ಆಧಾರಿತ ಕಿರು ನಾಟಕವನ್ನು ಪ್ರಸ್ತುತಪಡಿಸಿದರು, ಇದು ನೆರೆದವರಿಂದ ಉತ್ತಮ ಪ್ರತಿಕ್ರಿಯೆ ಪಡೆಯಿತು. ವಾಲ್ಟರ್ ನಂದಳಿಕೆ ಮತ್ತು ಅರವಿಂದ ಬೋಳಾರ್ ಅವರು ಆತ್ಮೀಯ ಆತಿಥ್ಯಕ್ಕೆ ಕೃತಜ್ಞತೆ ಸಲ್ಲಿಸಿದರು ಮತ್ತು ಕಾರ್ಯಕ್ರಮದ ವೃತ್ತಿಪರ ಸಂಘಟನೆಯನ್ನು ಶ್ಲಾಘಿಸಿದರು.

  ಸಂಜೆ ತಡವಾಗಿ ಆರಂಭವಾದ ಕಾರ್ಯಕ್ರಮ ಭಾನುವಾರ ಬೆಳಗಿನ ಜಾವದವರೆಗೂ ನಡೆಯಿತು. ಕಾರ್ಯಕ್ರಮವನ್ನು ದಿಶಾನ್ ಪಾಲ್ ಮತ್ತು ಸೀಮಾ ಸಾಲಿಯಾನ್ ಸುಂದರವಾಗಿ ನಿರೂಪಿಸಿದರು.