ಪಾಕ್ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಸಹೋದರಿ ಮೇಲೆ ಮೊಟ್ಟೆ ಎಸೆತ; ಇಬ್ಬರ ಬಂಧನ

•   Sat, Sep 06 2025 10:53:59 AM



• ಇಸ್ಲಾಮಾಬಾದ್, ಸೆ. 06 (DaijiworldNews/AA): ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಸಹೋದರಿ ಅಲೀಮಾ ಖಾನಮ್ ಅವರ ಮೇಲೆ ರಾವಲ್ಪಿಂಡಿಯ ಅಡಿಯಾಲ ಜೈಲಿನ ಹೊರಗೆ ಮೊಟ್ಟೆ ಎಸೆದ ಘಟನೆ ಸಂಭವಿಸಿದೆ.

  ಮೊಟ್ಟೆ ಆಕೆಯ ಮುಖಕ್ಕೆ ಹೊಡೆದು, ಬಟ್ಟೆಯ ಮೇಲೆ ಬಿದ್ದ ಘಟನೆಯ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಈ ಘಟನೆಯಿಂದ ಇಮ್ರಾನ್ ಖಾನ್ ಸಹೋದರಿ ಬೇಸರಗೊಂಡಿದ್ದಾರೆ.

  ಖಾನಮ್ ಮೇಲೆ ಮೊಟ್ಟೆ ಎಸೆದ ಇಬ್ಬರು ಮಹಿಳೆಯರನ್ನು ಪೊಲೀಸರು ಬಂಧಿಸಿದ್ದಾರೆ. ಬಂಧಿತರು ಪಾಕಿಸ್ತಾನ್ ತೆಹ್ರೀಕ್-ಇ-ಇನ್ಸಾಫ್ (ಪಿಟಿಐ) ಬೆಂಬಲಿಗರಾಗಿದ್ದಾರೆ ಎಂದು ಹೇಳಲಾಗಿದೆ.

  ಈ ಘಟನೆಯನ್ನು ಪಿಟಿಐ ಬೆಂಬಲಿಗರು ಖಂಡಿಸಿದ್ದು, ಇಂತಹ ನಡವಳಿಕೆಯು ಅನೈತಿಕ ಮಾತ್ರವಲ್ಲ, ದುರದೃಷ್ಟಕರವೂ ಆಗಿದೆ. ರಾಜಕೀಯ ಭಿನ್ನಾಭಿಪ್ರಾಯ ಇರುವವರನ್ನು ಅಪಮಾನಿಸುವುದು ಸರಿಯಲ್ಲ ಎಂದು ಬೇಸರ ಹೊರಹಾಕಿದ್ದಾರೆ. ಮತ್ತೊಬ್ಬರು ಪೋಸ್ಟ್ ಹಾಕಿ, ಈ ಅವಮಾನಕರ ಕೃತ್ಯವನ್ನು ಅಸಿಮ್ ಮುನೀರ್ ಮತ್ತು ನೂನ್ ಲೀಗ್ ಮಾಡಿದ್ದಾರೆ. ಈ ಜನರು ಖಾನ್ ಮತ್ತು ಅವರ ಕುಟುಂಬಕ್ಕೆ ತುಂಬಾ ಹೆದರುತ್ತಾರೆ ಎಂದು ತಿಳಿಸಿದ್ದಾರೆ.