'ಇರಾನ್‌ ಯುದ್ಧದ ನಡುವೆ ಪುತ್ರನ ಮದುವೆ ಮಿಸ್‌ ಮಾಡಿಕೊಳ್ಳುವ ಸ್ಥಿತಿ' - ಟ್ರಂಪ್‌ ಬೇಸರ

•   Fri, May 22 2026 11:32:43 AM



• ವಾಷಿಂಗ್ಟನ್, ಮೇ. 22 (DaijiworldNews/TA): ಇರಾನ್‌ ಮೇಲಿನ ಯುದ್ಧ ಪರಿಸ್ಥಿತಿಯಿಂದಾಗಿ ತಮ್ಮ ಪುತ್ರನ ಮದುವೆಯಲ್ಲಿ ಭಾಗವಹಿಸುವುದು ಕಷ್ಟವಾಗುತ್ತಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬೇಸರ ವ್ಯಕ್ತಪಡಿಸಿದ್ದಾರೆ.

  

  48 ವರ್ಷದ ಡೊನಾಲ್ಡ್ ಟ್ರಂಪ್ ಜೂನಿಯರ್ ಈ ವಾರಾಂತ್ಯದಲ್ಲಿ ಎರಡನೇ ಬಾರಿಗೆ ವಿವಾಹವಾಗಲಿದ್ದು, ಬಹಾಮಾಸ್‌ನಲ್ಲಿ ಬೆಟ್ಟಿನಾ ಆಂಡರ್ಸನ್ ಅವರನ್ನು ವರಿಸಲಿದ್ದಾರೆ ಎಂದು ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ. ಆದರೆ ಇದೇ ಸಮಯದಲ್ಲಿ ಟ್ರಂಪ್‌ ಇರಾನ್‌ನೊಂದಿಗಿನ ಯುದ್ಧ ಪರಿಸ್ಥಿತಿಯನ್ನು ಅಂತ್ಯಗೊಳಿಸುವ ಕುರಿತು ಮಹತ್ವದ ಮಾತುಕತೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. “ನಾನು ಮದುವೆಗೆ ಹಾಜರಾಗಬೇಕೆಂದು ಅವರು ಬಯಸುತ್ತಾರೆ. ಇದು ಖಾಸಗಿ ಹಾಗೂ ಕುಟುಂಬದ ಕಾರ್ಯಕ್ರಮ. ನಾನು ಭಾಗವಹಿಸಲು ಪ್ರಯತ್ನಿಸುತ್ತೇನೆ” ಎಂದು ಟ್ರಂಪ್ ಪ್ರತಿಕ್ರಿಯಿಸಿದ್ದಾರೆ.

  ಇದೇ ವೇಳೆ, “ಇದು ನನಗೆ ಒಳ್ಳೆಯ ಸಮಯವಲ್ಲ. ನನ್ನ ಬಳಿ ಇರಾನ್ ಸೇರಿದಂತೆ ಹಲವು ಗಂಭೀರ ವಿಚಾರಗಳಿವೆ. ಯುದ್ಧದಂತಹ ಸಂದರ್ಭದಲ್ಲೇ ಮದುವೆಗೆ ಹೋದರೆ ಮಾಧ್ಯಮಗಳು ಅದನ್ನು ಹೇಗೆ ವರದಿ ಮಾಡುತ್ತವೆ ಎಂಬುದು ನನಗೆ ಗೊತ್ತಿದೆ. ಆದರೂ ನನ್ನ ಪುತ್ರನ ಮದುವೆ ಚೆನ್ನಾಗಿ ನಡೆಯಲಿ ಎಂದು ಆಶಿಸುತ್ತೇನೆ” ಎಂದು ಹೇಳಿದ್ದಾರೆ. ಡೊನಾಲ್ಡ್ ಟ್ರಂಪ್ ಜೂನಿಯರ್ ಅವರು ಕುಟುಂಬದ ಐಷಾರಾಮಿ ರಿಯಲ್ ಎಸ್ಟೇಟ್ ಸಂಸ್ಥೆಯಾದ ಟ್ರಂಪ್ ಸಂಸ್ಥೆಯಲ್ಲಿ ಕಾರ್ಯನಿರ್ವಾಹಕ ಉಪಾಧ್ಯಕ್ಷರಾಗಿ ಕಾರ್ಯನಿರ್ವಹಿಸುತ್ತಿದ್ದು, ಟ್ರಂಪ್ ಅವರ MAGA ರಾಜಕೀಯ ಚಳವಳಿಯ ಪ್ರಮುಖ ಬೆಂಬಲಿಗರಾಗಿ ಗುರುತಿಸಿಕೊಂಡಿದ್ದಾರೆ.