ಐದು ತಿಂಗಳ ಕಾಲ ಜೀವನ್ಮರಣ ಹೋರಾಟ ನಡೆಸಿ ಕೊನೆಯುಸಿರೆಳೆದ ವುಹಾನ್ ವೈದ್ಯ

•   Wed, Jun 03 2020 10:53:12 AM



• ವುಹಾನ್, ಜೂ 03 (Daijiworld News/MSP): ಕೊರೊನಾ ವೈರಸ್​ ರೋಗಿಗಳಿಗೆ​ ಚಿಕಿತ್ಸೆ ನೀಡುತ್ತಾ ಸೋಂಕಿಗೆ ಒಳಗಾಗಿ ಚರ್ಮದ ಬಣ್ಣವೇ ಬದಲಾಗಿದ್ದ ವುಹಾನ್ ನ ವೈದ್ಯ ಡಾ.ಹ್ಯು ವೀಫೆಂಗ್ (42) ಸೋಂಕಿನ ವಿರುದ್ದ ಐದು ತಿಂಗಳ ಕಾಲ ಜೀವನ್ಮರಣ ಹೋರಾಟ ನಡೆಸಿ ಕೊನೆಯುಸಿರೆಳೆದಿದ್ದಾರೆ.

  

  ಚೀನಾದ ವುಹಾನ್​ ನಗರದ ಆಸ್ಪತ್ರೆಯಲ್ಲಿ ಅವರು ಮಂಗಳವಾರ ರಾತ್ರಿ ನಿಧನರಾಗಿದ್ದಾರೆ ಎಂದು ಅಲ್ಲಿನ ಸ್ಥಳೀಯ ಪತ್ರಿಕೆಗಳು ವರದಿ ಮಾಡಿದೆ.

  ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿರುವ ಸಂದರ್ಭದಲ್ಲಿ ಜನವರಿಯಲ್ಲಿ ವೀಫೆಂಗ್ ​ ಅವರಿಗೆ ಸೋಂಕು ತಗುಲಿತ್ತು. ಆ ಬಳಿಕ ಇವರ ಆರೋಗ್ಯ ಸ್ಥಿತಿ ತೀರಾ ಬಿಗಾಡಾಯಿಸುತ್ತಾ ಹೋಗಿದ್ದು ಸಂಕೀರ್ಣ ಆರೋಗ್ಯ ಸಮಸ್ಯೆಗಳಿಗೆ ತುತ್ತಾಗಿದ್ದರು. ಕಳೆದೊಂದು ತಿಂಗಳಿಂದ ಇವರಿಗೆ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ನೀಡಲಾಗುತ್ತಿತ್ತು.

  ಯುರೋಲಜಿಸ್ಟ್ (​ಮೂತ್ರಶಾಸ್ತ್ರಜ್ಞ) ಆಗಿದ್ದ ವೀಫೆಂಗ್​, ವೈರಸ್​ ಹರಡುವ ಆರಂಭದಲ್ಲೇ ಎಚ್ಚರಿಕೆ ನೀಡಿ ಚೀನಾ ಸರ್ಕಾರದ ದುರಾಡಳಿತದಿಂದ ಸೋಂಕಿಗೆ ಒಳಗಾಗಿ ಮೃತಪಟ್ಟಿದ್ದ ಡಾ. ಲಿ ವೆನ್​ಲಿಯಾಂಗ್​ ಅವರ ಸಹೋದ್ಯೋಗಿಯಾಗಿದ್ದರು. ಇಬ್ಬರು ವುಹಾನ್​ ಕೇಂದ್ರೀಯ ಆಸ್ಪತ್ರೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದರು.

  ವೀಫೆಂಗ್​​ ಅವರ ಮತ್ತೊಬ್ಬ ಸಹೋದ್ಯೋಗಿ ಡಾ. ಯಿ ಫ್ಯಾನ್​ ಅವರ ಚರ್ಮದ ಬಣ್ಣವು ಕಪ್ಪಾಗಿ ಬದಲಾಗಿದೆ. ಆದರೆ ಫ್ಯಾನ್​ ಪೂರ್ತಿಯಾಗಿ ಗುಣಮುಖರಾಗಿದ್ದಾರೆ. ಇವರಿಬ್ಬರು ಒಂದೇ ಸಮಯದಲ್ಲಿ ಅನಾರೋಗ್ಯಕ್ಕೀಡಾಗಿದ್ದರು.