'ಸೋಂಕು ಪರೀಕ್ಷೆ ವಿಚಾರದಲ್ಲಿ ಅದ್ಭುತ ಕೆಲಸ ಮಾಡಿದ್ದೀರಿ ಎಂದು ಮೋದಿ ನನ್ನನ್ನು ಹೊಗಳಿದ್ದಾರೆ' - ಟ್ರಂಪ್‌

•   Mon, Sep 14 2020 01:13:47 PM



• ವಾಷಿಂಗ್ಟನ್, ಸೆ. 14 (DaijiworldNews/MB) : ''ಸೋಂಕು ಪರೀಕ್ಷೆ ವಿಚಾರದಲ್ಲಿ ಅದ್ಭುತ ಕೆಲಸ ಮಾಡಿದ್ದೀರಿ ಎಂದು ಮೋದಿ ನನ್ನನ್ನು ಹೊಗಳಿದ್ದಾರೆ'' ಎಂದು ಅಮೇರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿಕೊಂಡಿದ್ದಾರೆ.

  

  ''ನಾವು ಭಾರತಕ್ಕಿಂತ ಮತ್ತು ಬೇರೆ ದೊಡ್ಡ ದೇಶಗಳಿಗಿಂತ ಅಧಿಕ ಜನರನ್ನು ಕೊರೊನಾ ಪರೀಕ್ಷೆ ಮಾಡಿಸಿದ್ದೇವೆ. ಕೊರೊನಾ ಸೋಂಕು ಪರೀಕ್ಷೆಯ ವಿಚಾರದಲ್ಲಿ ಭಾರತವು ಅಮೇರಿಕಾದ ನಂತರದ ಸ್ಥಾನದಲ್ಲಿದೆ. ನಾವು ಭಾರತಕ್ಕಿಂತ 44 ಮಿಲಿಯನ್ ಹೆಚ್ಚು ಪರೀಕ್ಷೆ ಮಾಡಿಸಿದ್ದೇವೆ. ಎಂತಹ ಅದ್ಭುತ ಕೆಲಸ ಮಾಡಿದ್ದೀರಿ ಎಂಬುದಾಗಿ ಪ್ರಧಾನಿ ನರೇಂದ್ರ ಮೋದಿ ನನಗೆ ಕರೆ ಮಾಡಿ ಹೇಳುತ್ತಾರೆ'' ಎಂದು ಟ್ರಂಪ್‌ ಹೇಳಿದ್ದಾರೆ.

  ಅಧ್ಯಕ್ಷೀಯ ಚುನಾವಣೆಯಲ್ಲಿ ತಮ್ಮ ಎದುರಾಳಿಯಾದ ಡೆಮಾಕ್ರಟಿಕ್ ಪಕ್ಷದ ಜೋ ಬಿಡೆನ್ ಅವರ ವಿರುದ್ದ ವಾಗ್ದಾಳಿ ನಡೆಸಿದ ಅವರು, ''ಹಿಂದಿನ ಸರ್ಕಾರವು ಎಚ್ 1ಎನ್1 ನಿರ್ವಹಣೆಯಲ್ಲಿ ಸಂಪೂರ್ಣವಾಗಿ ವಿಫಲವಾಗಿತ್ತು'' ಎಂದಿದ್ದಾರೆ.

  ಹಾಗೆಯೇ ''ಚೀನಾದ ವಿರುದ್ದ ನಿಲ್ಲಲು ಕಳೆದ ನಾಲ್ಕು ವರ್ಷವನ್ನು ವಿನಿಯೋಗಿಸಿದ್ದೇನೆ'' ಎಂದು ಕೂಡಾ ಹೇಳಿದ್ದಾರೆ.