ನ್ಯೂಜಿಲ್ಯಾಂಡ್ ಉಗ್ರರ ದಾಳಿ-ಐವರು ಭಾರತೀಯರು ಸಾವು-9ಕ್ಕೂ ಹೆಚ್ಚು ಮಂದಿ ನಾಪತ್ತೆ

•   Sun, Mar 17 2019 10:40:48 AM



• ನೂಜಿಲ್ಯಾಂಡ್,ಮಾ.17(AZM): ನ್ಯೂಜಿಲೆಂಡ್ ನಲ್ಲಿ ನಡೆದ ಉಗ್ರರ ದಾಳಿಯಲ್ಲಿ 50ಕ್ಕೂ ಹೆಚ್ಚು ಜನರು ಮೃತಪಟ್ಟಿದ್ದು, ಅದರಲ್ಲಿ ಐವರು ಭಾರತೀಯರಾಗಿದ್ದಾರೆ ಎಂದು ತಿಳಿದುಬಂದಿದೆ. ಮೃತ ಭಾರತೀಯರನ್ನು ಮಹಬೂಬ್ ಖೋಖರ್, ರಮೀಝ್ ವೋರಾ, ಆಸಿಫ್ ವೋರಾ, ಅನ್ಸಿ ಅಲಿಬವ ಮತ್ತು ಒಝೈರ್ ಕಾದಿರ್ ಎಂದು ಗುರುತಿಸಲಾಗಿದೆ.

  

  ನ್ಯೂಜಿಲ್ಯಾಂಡ್ ನ 2 ಮಸೀದಿಗಳ ಮೇಲೆ ಉಗ್ರರು ದಾಳಿ ನಡೆಸಿದ್ದು ಸಾವಿನ ಸಂಖ್ಯೆ 50 ದಾಟಿದೆ. ಹಾಗೂ ಬಹಳಷ್ಟು ಮಂದಿ ಕಾಣೆಯಾಗಿದ್ದು, ಇವರ ಪೈಕಿ 9ಕ್ಕೂ ಹೆಚ್ಚು ಮಂದಿ ಭಾರತೀಯರು ಎಂದು ತಿಳಿದುಬಂದಿದೆ. ಈ ಕುರಿತು ನ್ಯೂಜಿಲೆಂಡ್​ನ ಭಾರತೀಯ ರಾಯಭಾರಿಯಾಗಿರುವ ಸಂಜೀವ್ ಕೊಹ್ಲಿ ಅವರು ಖಚಿತ ಮಾಹಿತಿ ನೀಡಿದ್ದಾರೆ.

  ದಾಳಿಯಲ್ಲಿ ತೊಂದರೆಗೊಳಗಾದ ಭಾರತೀಯರ ಕುರಿತು ಮಾಹಿತಿ ನೀಡಲು ಸಹಾಯವಾಣಿಯನ್ನು ಆರಂಭಿಸಲಾಗಿದೆ. ದಿನ 24 ಗಂಟೆಯೂ 021803899 ಮತ್ತು 021850033 ನಂಬರ್‌ನ ಸಹಾಯವಾಣಿ ಕಾರ್ಯ ನಿರ್ವಹಣೆ ಮಾಡಲಿದೆ.

  ನ್ಯೂಝಿಲ್ಯಾಂಡ್ ನ ಅಲ್ ನೂರ್ ಮಸೀದಿ ಹಾಗೂ ಹೊರವಲಯದಲ್ಲಿರುವ ಲಿನ್​ವುಡ್ ಮಸೀದಿಯ ಮೇಲೆ ಮಾ.15ರಂದು ಬೆಳಗ್ಗೆ ಉಗ್ರರು ಗನ್ ದಾಳಿ ನಡೆಸಿದ್ದರು. ಹೆಲ್ಮೆಟ್​ಗೆ ಕ್ಯಾಮೆರಾ ಫಿಕ್ಸ್ ಮಾಡಿಕೊಂಡಿದ್ದ ಉಗ್ರರು ಫೇಸ್​ಬುಕ್​ನಲ್ಲಿ ದಾಳಿಯ ನೇರ ಪ್ರಸಾರ ಕೂಡ ಮಾಡಿದ್ದರು. ಪೊಲೀಸರು ಓರ್ವ ಮಹಿಳೆ ಸೇರಿದಂತೆ ನಾಲ್ವರು ಶಂಕಿತ ದಾಳಿಕೋರರನ್ನು ಬಂಧಿಸಿದ್ದರು.