ನ್ಯೂಜಿಲ್ಯಾಂಡ್ ಮಾದರಿಯಲ್ಲಿ ನೆದರ್​ಲ್ಯಾಂಡ್​ನಲ್ಲಿ ಶೂಟಿಂಗ್- ಹಲವರಿಗೆ ಗಾಯ - ಭಯೋತ್ಪಾದಕ ದಾಳಿ ಸಾಧ್ಯತೆ

•   Mon, Mar 18 2019 05:09:22 PM



• ನೆದರ್​ಲ್ಯಾಂಡ್,ಮಾ 18 (MSP): ನೆದರ್​ಲ್ಯಾಂಡ್​ನ ಉಟ್ರೆಚ್​ ಎಂಬ ನಗರದಲ್ಲಿ ನ್ಯೂಜಿಲ್ಯಾಂಡ್ ಮಾದರಿಯಲ್ಲಿ ಸೋಮವಾರ ಶೂಟಿಂಗ್ ದಾಳಿ ನಡೆದಿದ್ದು, ಘಟನೆಯಿಂದ ಹಲವರು ಗಂಭೀರವಾಗಿ ಗಾಯಗೊಂಡಿದ್ದಾರೆ ಎನ್ನಲಾಗಿದೆ. ಪ್ರತ್ಯಕ್ಷದರ್ಶಿಯೊಬ್ಬರ ಪ್ರಕಾರ ಬಂದೂಕುಧಾರಿ ವ್ಯಕ್ತಿಯೋರ್ವ ಗುಂಡಿನ ದಾಳಿ ನಡೆಸಿದ್ದಾಗಿ ಅಲ್ಲಿನ ಸ್ಥಳೀಯ ಮಾಧ್ಯಮ ’ನೆದರ್​ಲ್ಯಾಂಡ್​ ಟೈಮ್ಸ್ ’ನಲ್ಲಿ ವರದಿಯಾಗಿದೆ.

  

  ನಗರದ ಪಶ್ಚಿಮ ಭಾಗದ 24 ಒಕ್ಟೊಬರ್ಪ್ಲೀನ್​ ಎಂಬ ಪ್ರದೇಶದಲ್ಲಿ ಈ ದಾಳಿ ನಡೆದಿದ್ದು , ನೆದರ್​ಲ್ಯಾಂಡ್​ ಪೊಲೀಸರು ಬೆಳಗ್ಗೆ 11 ಗಂಟೆಗೆ ತಮ್ಮ ಟ್ವಿಟರ್ ಖಾತೆಯಲ್ಲಿ ದಾಳಿಯನ್ನು ದೃಢಪಡಿಸಿದ್ದಾರೆ. ಜನಸಂದಣಿಯಿಂದ ಕೂಡಿರುವ ಪ್ರದೇಶದಲ್ಲಿ ಈ ಗುಂಡಿನ ದಾಳಿ ನಡೆದಿದ್ದು, ಘಟನೆ ಬಳಿಕ ರಸ್ತೆ ರೈಲು ಟ್ರಾಮ್  ಸಂಚಾರ ಸ್ಥಗಿತಗೊಳಿಸಲಾಗಿದೆ.

  ಪೊಲೀಸ್​ ಇಲಾಖೆಯ ಮಾಹಿತಿ ಪ್ರಕಾರ ಬಂದೂಕುಧಾರಿ ​ ತಪ್ಪಿಸಿಕೊಂಡಿದ್ದು, ಬಂಧನಕ್ಕಾಗಿ ವ್ಯಾಪಕ ಶೋಧ ನಡೆಸಲಾಗುತ್ತಿದೆ. ಈಗಾಗಲೇ ಸ್ಥಳಕ್ಕೆ ಪೊಲೀಸರು ಮತ್ತು ವೈದ್ಯಕೀಯ ಚಿಕಿತ್ಸೆಯ ಹೆಲಿಕಾಪ್ಟರ್​ಗಳು ತಲುಪಿವೆ. ಹೆಚ್ಚಿನ ಮಾಹಿತಿ ನಿರೀಕ್ಷಿಸಲಾಗಿದೆ.