ದುಬೈಯಲ್ಲಿರುವ ಭಾರತೀಯ ವಲಸಿಗರಿಗೆ ಆನ್ ಲೈನ್ ಮತದಾನಕ್ಕೆ ಅವಕಾಶವಿಲ್ಲ-ಸಿಜಿಐ ಸ್ಪಷ್ಟನೆ

•   Mon, Apr 15 2019 10:13:14 PM



• ದುಬೈ, ಏ.15(AZM): 2019ರ ಲೋಕಸಭಾ ಚುನಾವಣೆಗಾಗಿ ಯುಎಇಯಲ್ಲಿನ ಭಾರತೀಯ ವಲಸಿಗರಿಗೆ ಆನ್‌ಲೈನ್ ಮತದಾನಕ್ಕೆ ಅವಕಾಶವಿಲ್ಲ ಎಂದು ದುಬೈನಲ್ಲಿನ ಕಾನ್ಸುಲ್-ಜನರಲ್ ಆಫ್ ಇಂಡಿಯಾ(ಸಿಜಿಐ) ತಿಳಿಸಿದೆ. 

  

  2019ರ ಲೋಕಸಭಾ ಚುನಾವಣೆಗೆ ಅನಿವಾಸಿ ಭಾರತೀಯರಿಗೆ ಆನ್ ಲೈನ್ ಮೂಲಕ ಮತದಾನ ಮಾಡಬಹುದೆಂಬ ವದಂತಿ ಹರಡಿದ್ದು, ಇದೀಗ ಈ ವದಂತಿಯನ್ನು ದುಬೈನಲ್ಲಿನ ಕಾನ್ಸುಲ್-ಜನರಲ್ ಆಫ್ ಇಂಡಿಯಾ ತಳ್ಳಿಹಾಕಿದೆ.

  ಅನಿವಾಸಿ ಭಾರತೀಯರು ಆನ್‌ಲೈನ್ ಮೂಲಕ ಮತದಾನ ಮಾಡಬಹುದು ಎಂಬ ತಪ್ಪು ಮಾಹಿತಿಗಳು ಸಾಮಾಜಿಕ ಮಾಧ್ಯಮ ತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿವೆ ಎಂದು ಭಾರತೀಯ ವಲಸಿಗರು ದೂರಿಕೊಂಡಿದ್ದರು. 2019ರ ಚುನಾವಣೆಗಾಗಿ ಇ-ವೋಟಿಂಗ್‌ಗೆ ಅವಕಾಶವಿಲ್ಲ ಎಂದು ವಿಪುಲ್‌ರನ್ನು ಉಲ್ಲೇಖಿಸಿ ಇಲ್ಲಿಯ ಮಾಧ್ಯಮವೊಂದು ವರದಿ ಮಾಡಿದೆ.

  ಯಾರೇ ಆದರೂ ತಮ್ಮ ಹೆಸರನ್ನು ರಾಷ್ಟ್ರೀಯ ಮತದಾರರ ಸೇವಾ ಪೋರ್ಟಲ್(ಎನ್‌ವಿಎಸ್‌ಪಿ)ನಲ್ಲಿ ನೊಂದಾಯಿಸಿಕೊಳ್ಳಬಹುದು ಮತ್ತು ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರು ಇದೆಯೇ ಎನ್ನುವುದನ್ನು ಖಚಿತಪಡಿಸಿಕೊಳ್ಳಬಹುದು ಎಂದು ಸಿಜಿಐ ತಿಳಿಸಿದೆ.

  ತಮಗೆ ಸಂಬಂಧಿಸಿದ ಮತಗಟ್ಟೆಗೆ ಖುದ್ದಾಗಿ ಭೇಟಿ ನೀಡಿ ಮತದಾನ ಮಾಡುವುದು ಮತದಾರರಿಗಿರುವ ಏಕೈಕ ಮಾರ್ಗವಾಗಿದೆ. ಹಲವಾರು ಭಾರತೀಯ ವಲಸಿಗರು ತಿಳಿಸಿರುವಂತೆ ಆನ್‌ಲೈನ್ ಮತದಾನ ಕುರಿತ ಪೋಸ್ಟ್‌ಗಳು ಕಳೆದ ಜನವರಿಯಿಂದಲೇ ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿವೆ. ಕೆಲವರು ಈ ಪೋಸ್ಟ್‌ಗಳನ್ನು ನಂಬಿದ್ದರೆ ಇತರರು ಭಾರತೀಯ ಚುನಾವಣಾ ಆಯೋಗದ ಜಾಲತಾಣ ಮತ್ತು ಸಾಮಾಜಿಕ ಮಾಧ್ಯಮ ಹ್ಯಾಂಡಲ್‌ಗಳನ್ನು ಪರಿಶೀಲಿಸಿ ಇವು ಸುಳ್ಳು ಸುದ್ದಿಗಳು ಎನ್ನುವುದನ್ನು ಖಚಿತಪಡಿಸಿಕೊಂಡಿದ್ದಾರೆ.