ಮಂಗಳೂರು: 510 ನಕಲಿ ಚಿನ್ನದ ಬಲೆಗಳನ್ನು ಅಡವಿಟ್ಟು 2 ಕೋಟಿ ರೂ. ಕೊಳ್ಳೆ

•   Wed, Dec 25 2024 01:51:05 PM



• ಮಂಗಳೂರು, ಡಿ.25(DaijiworldNews/AA): ವ್ಯಕ್ತಿಯೋರ್ವ ನಕಲಿ ಚಿನ್ನ ಅಡವಿಟ್ಟು 2 ಕೋಟಿ ರೂ. ಅಧಿಕ ಸಾಲ ಪಡೆದು ಕರಾವಳಿ ಭಾಗದಲ್ಲಿ 16 ಶಾಖೆಗಳನ್ನು ಹೊಂದಿರುವ ಪ್ರತಿಷ್ಠಿತ ಸಮಾಜ ಸೇವಾ ಸಹಕಾರಿ ಸಂಘಕ್ಕೆ ವಂಚಿಸಿರುವ ಆರೋಪ ಕೇಳಿಬಂದಿದೆ.

  ಪುತ್ತೂರಿನ ಅಬೂಬಕ್ಕರ್ ಸಿದ್ದೀಕ್ ಎಂಬಾತನಿಂದ ನಕಲಿ ಚಿನ್ನಾಭರಣ ಅಡಮಾನವಿಟ್ಟು ವಂಚಿಸಿದ ಆರೋಪಿ.

  ಅಬೂಬಕ್ಕರ್ ಸಿದ್ದಿಕ್ 510 ಒನ್ ಗ್ರಾಂ ಗೋಲ್ಡ್ ಅಡವಿಟ್ಟು ಸಹಕಾರಿ ಸಂಘದಲ್ಲಿ 2,11,89,800 ರೂ. ಸಾಲ ಪಡೆದು, ವಂಚಿಸಿದ್ದಾನೆ. ಅಬೂಬಕ್ಕರ್ ಸಿದ್ದೀಕ್ ನೊಂದಿಗೆ ಚಿನ್ನ ಪರೀಕ್ಷಕ, ಬ್ಯಾಂಕ್ ಸಿಬ್ಬಂದಿ ಹಾಗೂ ಆಡಳಿತ ಮಂಡಳಿ ಶಾಮೀಲಾಗಿದ್ದಾರೆ ಎನ್ನಲಾಗಿದೆ. ಅಬೂಬಕ್ಕರ್ ಸಿದ್ದೀಕ್ 20 ಆಭರಣ ಸಾಲಗಳ ಬಾಂಡ್ ಗಳಲ್ಲಿ 510 ನಕಲಿ ಬಲೆಗಳನ್ನು ಅಡವಿಟ್ಟಿದ್ದಾನೆ.

  ಚಿನ್ನ ನಕಲಿ ಎಂದು ಗೊತ್ತಿದ್ದರೂ ಚಿನ್ನ ಪರೀಕ್ಷಕ ವಿವೇಕ್ ಆಚಾರ್ಯ ಅಸಲಿ ಎಂದು ಸರ್ಟಿಫಿಕೇಟ್ ನೀಡಿದ್ದಾನೆ. 2023ರ ನವೆಂಬರ್ ನಿಂದ 2024ರ ಫೆಬ್ರವರಿವರೆಗೆ ನಕಲಿ ಚಿನ್ನ ಅಡವಿಟ್ಟು ಕೋಟಿ ಕೋಟಿ ಲೂಟಿ ಮಾಡಲಾಗಿದೆ. ಮೂರು ತಿಂಗಳ ಅವಧಿಗೆ ಎಕ್ಸ್‌ಪ್ರೆಸ್‌ ಗೋಲ್ಡ್ ಲೋನ್ ನಡಿ ನಕಲಿ ಚಿನ್ನವಿಟ್ಟು ಅಬೂಬಕ್ಕರ್ ಸಿದ್ದೀಕ್ ಮೋಸ ಮಾಡಿದ್ದಾನೆ. ಈ ನಡುವೆ ಹೊಸ ಮ್ಯಾನೇಜರ್ ಅನುಮಾನ ಬಂದು ಪರೀಕ್ಷಿಸಿದಾಗ ನಕಲಿ ಚಿನ್ನ ಎಂಬುದು ಪತ್ತೆಯಾಗಿದೆ. ಆದರೆ ಕೋಟ್ಯಾಂತರ ರೂ. ಗೋಲ್ ಮಾಲ್ ಮುಚ್ಚಿಹಾಕಲು ಆಡಳಿತ ಮಂಡಳಿ ಯತ್ನಿಸಿದೆ ಎಂಬ ಆರೋಪ ಕೇಳಿಬಂದಿದೆ.

  ನಕಲಿ ಚಿನ್ನವನ್ನು ಹರಾಜು ಪ್ರಕ್ರಿಯೆ ಮೂಲಕ ಮಾರಾಟ ಮಾಡಿದ್ದಾಗಿ ತೋರಿಸಿ ಗೋಲ್ಮಾಲ್ ಮುಚ್ಚಿ ಹಾಕಲು ಯತ್ನಿಸಲಾಗಿದೆ. ಚಿನ್ನ ಪರೀಕ್ಷಕ ವಿವೇಕ್ ಆಚಾರ್ಯನೇ ಮತ್ತೆ ಹರಾಜಿನಲ್ಲಿ ನಕಲಿ ಚಿನ್ನ ಖರೀದಿಸಿದ್ದಾಗಿ ತೋರಿಸಿ ಗೋಲ್ಮಾಲ್ ಮುಚ್ಚಲು ಯತ್ನಿಸಲಾಗಿದೆ. ಉಳಿದ ಹಣ ತುಂಬಲು ಬ್ಯಾಂಕ್ ಸಿಬ್ಬಂದಿ ಹೆಸರಿನಲ್ಲಿ ಸಾಲ ಪಡೆದು ವಂಚನೆ ಮಾಡಲಾಗಿದೆ ಎಂದು ಆರೋಪಿಸಲಾಗಿದೆ. ಆರೋಪಿ ಅಬುಬಕ್ಕರ್ ಗೆ ಬ್ಯಾಂಕ್ ನ ಕೆಲ ಸಿಬ್ಬಂದಿಯ ಖಾತೆಯಿಂದಲೇ ಹಣ ವರ್ಗಾವಣೆ ಮಾಡಲಾಗಿದೆ.

  ಸದ್ಯ ಈ ಭಾರೀ ಆಕ್ರಮದ ಬಗ್ಗೆ ಬ್ಯಾಂಕಿನ ಮಾಜಿ ನಿರ್ದೇಶಕ ಲೋಕನಾಥ್ ಎಂಬವರ ದೂರಿನಡಿ ಮಂಗಳೂರಿನ ಸೆನ್ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಾಗಿದೆ. ಚಿನ್ನ ಅಡವಿಟ್ಟ ಅಬೂಬಕ್ಕರ್, ಚಿನ್ನ ಪರೀಕ್ಷಕ ವಿವೇಕ್ ಆಚಾರ್ಯ ಸಹಿತ 28 ಜನರ ವಿರುದ್ಧ ಪ್ರಕರಣ ದಾಖಲಾಗಿದೆ. ಸಹಕಾರಿ ಸಂಘದ ಅಧ್ಯಕ್ಷ, ಉಪಾಧ್ಯಕ್ಷ, ನಿರ್ದೇಶಕರು ಹಾಗೂ ಸಿಬ್ಬಂದಿ ವಿರುದ್ಧ ಪ್ರಕರಣ ದಾಖಲಾಗಿರುತ್ತದೆ.

  ಸಾಲ ಮಂಜೂರಾತಿ, ಮರು ಪಾವತಿ ವಿಚಾರ ಆಡಿಟ್ ನಲ್ಲೂ ಮುಚ್ಚಿಟ್ಟು ಗೋಲ್ ಮಾಲ್ ಮಾಡಲಾಗಿದೆ ಎಂದು ಆರೋಪಿಸಲಾಗಿದೆ. ಸದ್ಯ ಪ್ರಮುಖ ಆರೋಪಿ ಅಬುಬಕ್ಕರ್ ಸಿದ್ದೀಕ್ ನಾಪತ್ತೆಯಾಗಿದ್ದಾನೆ. ಇನ್ನು ಪ್ರಕರಣದ ಎರಡನೇ ಆರೋಪಿ ವಿವೇಕ್ ಆಚಾರ್ಯನನ್ನು ಸೆನ್ ಪೊಲೀಸರು ವಶಕ್ಕೆ ಪಡೆದಿದ್ದಾರೆ ಸಹಕಾರಿ ಸಂಘದ ಗೋಲ್ಡ್ ಅಡಮಾನ ದಂಧೆಯಲ್ಲಿ ಬ್ಯಾಂಕ್ ಆಡಳಿತ ಶಾಮೀಲಾಗಿದ್ದಾರೆ ಎಂದು ಆರೋಪಿಸಲಾಗಿದೆ.

  ಉಸ್ತುವಾರಿ ಸಚಿವ ದಿನೇಶ್ ಗುಂಡೂರಾವ್ ಅವರು ಮೈಸೂರು ವಿಭಾಗದ ಜಂಟಿ ನಿಬಂಧಕರಿಂದ ವರದಿ ಕೇಳಿದ್ದಾರೆ. ಜೊತೆಗೆ ಸಮಗ್ರ ತನಿಖೆ ನಡೆಸಿ ವರದಿ ನೀಡಲು ದ.ಕ ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್ ರಿಂದ ಸಹಕಾರಿ ಸಂಘದ ಉಪನಿಬಂಧಕರಿಗೆ ಸೂಚನೆ ನೀಡಲಾಗಿದೆ. ಪ್ರಕರಣದ ಬಗ್ಗೆ ಮೈಸೂರು ಸಹಕಾರ ಸಂಘಗಳ ಜಂಟಿ ನಿಬಂಧಕರಿಂದಲೂ ದ.ಕ ಜಿಲ್ಲೆಯ ಡಿಆರ್ ಗೆ ವರದಿ ನೀಡಲು ಆದೇಶಿಸಲಾಗಿದೆ.