ಮಂಗಳೂರು : ಕಾಮಜಲಿನ ಶಾಲೆಗೆ 25 ವರ್ಷದ ಸಂಭ್ರಮ - ಮಕ್ಕಳೇ ನಿರ್ಮಿಸಿದರು ಕೃಷಿ ಲೋಕ

•   Sat, Jan 04 2025 02:15:57 PM



• ಮಂಗಳೂರು,ಜ.04(DaijiworldNews/TA): ಸಹಸ್ರಾರು ವಿದ್ಯಾರ್ಥಿಗಳಿಗೆ ವಿದ್ಯಾದಾನ ಮಾಡಿ ಜೀವನ ಬೆಳಗಿಸಿದ ಕಾಮಜಲಿನ ಶಾಲೆಗೆ 25 ವರ್ಷ... ವೈಶಿಷ್ಟ್ಯಪೂರ್ಣ ಬೆಳ್ಳಿ ಹಬ್ಬ ಆಚರಣೆಗೆ ಹಲವು ಅರ್ಥಪೂರ್ಣ ಕಾರ್ಯ. ಸರಕಾರಿ ಶಾಲೆಯ ವಿದ್ಯಾರ್ಥಿಗಳ ಶ್ರಮದಿಂದ ಸೃಷ್ಟಿಯಾಯಿತು ಅದ್ಬುತ ಕೃಷಿ ಲೋಕ. ಕಾಮಜಲು ಶಾಲೆಯ ವಿದ್ಯಾರ್ಥಿಗಳ ಕೃಷಿ ಸಾಧನೆಯ ವಿಶೇಷ ವರದಿ ಇದು.

  

  

  

  

  

  

  

  ಹಚ್ಚ ಹಸಿರಾಗಿರುವ ಕೃಷಿ ತೋಟ ತೊಂಡೆಕಾಯಿ, ಅಲಸಂಡೆ, ಬಸಳೆ, ಸೊಂಪಾಗಿ ಬೆಳೆದ ಬಾಳೆ ಗಿಡ, ರಂಭೂಟನ್, ಡ್ರ್ಯಾಗನ್ ಪ್ರೂಟ್, ಇಂತಹ ಕೃಷಿ ಲೋಕವನ್ನು ಸೃಷ್ಟಿಸಿದ್ದು ಸರಕಾರಿ ಶಾಲೆಯ ವಿದ್ಯಾರ್ಥಿಗಳು. ಗ್ರಾಮೀಣ ಭಾಗದ ಸರಕಾರಿ ಶಾಲೆಯ ಮಕ್ಕಳಿಗೆ ಕೊಂಚ ಪ್ರೋತ್ಸಾಹ ಕೊಟ್ಟು ಮಾರ್ಗದರ್ಶನ ಮಾಡಿದ್ರೆ ಏನು ಬೇಕಾದರೂ ಸಾಧಿಸುತ್ತಾರೆ ಎನ್ನುವುದ್ದಕ್ಕೆ ದ.ಕ ಜಿಲ್ಲೆಯ ಬಂಟ್ವಾಳ ತಾಲೂಕಿನ ವಿಟ್ಲದ ಗ್ರಾಮೀಣ ಪ್ರದೇಶವಾದ ಕೇರಳ ಕರ್ನಾಟಕ ಗಡಿಯಲ್ಲಿರುವ ಮಾಣಿಲ ಗ್ರಾಮದ ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್ ಹಿರಿಯ ಪ್ರಾಥಮಿಕ ಶಾಲೆ ಕಾಮಜಲಿನ ವಿದ್ಯಾರ್ಥಿಗಳು ಸಾಧಿಸಿ ತೋರಿಸಿದ್ದಾರೆ.

  ಮಾಣಿಲದ ಕಾಮಜಲಿನಲ್ಲಿ 1999 ರಲ್ಲಿ ಆರಂಭವಾದ ಸರಕಾರಿ ಶಾಲೆ 25 ಸಂವತ್ಸರಗಳನ್ನು ಪೊರೈಸುತ್ತಿದ್ದು ಬೆಳ್ಳಿಹಬ್ಬದ ಸಂಭ್ರಮದಲ್ಲಿದೆ. ಹೀಗಾಗಿ ಶ್ರೀ ಕ್ಷೇತ್ರ ಕುಕ್ಕಾಜೆಯ ಧರ್ಮದರ್ಶಿ ಎಂ.ಕೆ. ಕುಕ್ಕಾಜೆ ಅವರ ಗೌರವಾಧ್ಯಕ್ಷತೆ ಹಾಗೂ ನರಸಪ್ಪ ಬಾಳೆಕಲ್ಲು ಅಧ್ಯಕ್ಷತೆಯಲ್ಲಿ ಬೆಳ್ಳಿಹಬ್ಬದ ಸಮಿತಿ ರಚಿಸಿ ಹಲವಾರು ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ.. ಅದರಲ್ಲಿ ಶ್ರೀ ಕ್ಷೇತ್ರ ಕುಕ್ಕಾಜೆಯ ಶ್ರೀ ಕೃಷ್ಣ ಗುರೂಜಿ ವತಿಯಿಂದ 25 ನೇ ವರ್ಷದ ಸಂಭ್ರಮಾಚರಣೆಯ ಹಿನ್ನೆಲೆ ತೀರಾ ಅಗತ್ಯವಾಗಿ ಬೇಕಾಗಿದ್ದ ತರಗತಿ ಕೊಠಡಿಯನ್ನು ಕೊಡುಗೆಯಾಗಿ ನೀಡಿದ್ದು, ಕಾಮಗಾರಿ ನಡೆಯುತ್ತಿದೆ. ಇನ್ನು ಜ.25ರಂದು ಬೆಳ್ಳಿ ಹಬ್ಬದ ಸಂಭ್ರಮದ ಕಾರ್ಯಕ್ರಮ ನಡೆಯಲಿದ್ದುಕೊಠಡಿಯ ಉದ್ಘಾಟನೆಯೂ ಅಂದೇ ನಡೆಯಲಿದೆ.

  ಬೆಳ್ಲಿಹಬ್ಬದ ಸಮಿತಿ, ಎಸ್ ಡಿಎಂಸಿ, ಶಿಕ್ಷಕರು, ಗ್ರಾಮ ಪಂಚಾಯತ್ ಅಧ್ಯಕ್ಷರು, ಪೋಷಕರು, ಹಿರಿಯ ವಿದ್ಯಾರ್ಥಿಗಳ ಸಹಕಾರದೊಂದಿಗೆ ಬೆಳ್ಳಿಹಬ್ಬದ ನೆನಪಿಗಾಗಿ ಸುಮಾರು ೨೫ ಸೆಂಟ್ಸ್ ಜಾಗವನ್ನು ಸಮತಟ್ಟುಗೊಳಿಸಿ ಆವರಣ ಬೀಳಿ ನಿರ್ಮಿಸಲಾಗಿದೆ. ಬಳಿಕ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರು ಸೇರಿ ಕೃಷಿ ತೋಟ ನಿರ್ಮಿಸಿದ್ದು, ಬೆಂಡೆಕಾಯಿ, ತೊಂಡೆಕಾಯಿ, ಬದನೆ, ಅಲಸಂಡೆ, ಬಸಳೆ, ಮೆಣಸಿನ ಗಿಡ, 150 ರಷ್ಟು ಬಾಳೆ ಗಿಡ, ರಂಭೂಟನ್, ಡ್ರ್ಯಾಗನ್ ಪ್ರೂಟ್, ತೆಂಗಿನ ಗಿಡ, ಹಲಸಿನ ಗಿಡಗಳನ್ನು ಬೆಳೆಯಲಾಗಿದೆ. ಸದ್ಯ ಮಧ್ಯಾಹ್ನದ ಶಾಲೆಯ ಬಿಸಿಯೂಟಕ್ಕೆ ಇದರಿಂದಲೇ ತರಕಾರಿ ಹಾಗೂ ತೆಂಗಿನ ಕಾಯಿ ಬಳ್ಸುತ್ತಿದ್ದು ಹೆಚ್ಚುವರಿ ತರಕಾರಿಗಳನ್ನು ಮಾರಾಟ ಮಾಡಿ ಅದರಿಂದ ಬಂದ ಹಣದಿಂದ ಗಿಡಗಳ ಆರೈಕೆ ಮಾಡಲಾಗುತ್ತಿದೆ.

  ವಿದ್ಯಾರ್ಥಿಗಳಿಗೆ ಎಳವೆಯಲ್ಲೇ ಕೃಷಿಯ ಆಸಕ್ತಿ ಮೂಡಿಸುವುದರ ಜತೆಗೆ ಮಧ್ಯಾಹ್ನದ ಊಟಕ್ಕೂ ತಮ್ಮದೇ ಕೃಷಿ ತೋಟದಲ್ಲಿ ತರಕಾರಿ ಬೆಳೆಸುವ ಮೂಲಕ ಮಾದರಿ ಶಾಲೆಯಾಗಿ ಗುರುತಿಸಿಕೊಂಡಿದೆ. ಸಾವಿರಾರು ವಿದ್ಯಾರ್ಥಿಗಳಿಗೆ ವಿದ್ಯಾದಾನ ಮಾಡಿದ ಗ್ರಾಮೀಣ ಭಾಗದ ಸರಕಾರಿ ಶಾಲೆ25 ವರ್ಷಗಳನ್ನು ಪೊರೈಸುತ್ತಿರುವುದರ ಜತೆಗೆ ಅದನ್ನು ಅರ್ಥಪೂರ್ಣವಾಗಿ ಆಚರಣೆಗೆ ಮಾಡಲಾಗುತ್ತಿರುವುದು ಶ್ಲಾಘನೀಯವಾಗಿದೆ.