ಉಡುಪಿ : 'ಕೊಂಕಣಿ ಕಾವ್ಯ ಸಮಕಾಲೀನ ಬದುಕಿನ ಪ್ರತಿಬಿಂಬವಾಗಿದೆ' - ಡಾ. ಪೂರ್ಣಾನಂದ ಚಾರಿ

•   Mon, Jan 20 2025 01:19:39 PM



• ಉಡುಪಿ, ಜ.20(DaijiworldNews/TA): ಭಾರತೀಯ ಸಮಕಾಲೀನ ಸಾಹಿತ್ಯದಲ್ಲಿ ಕೊಂಕಣಿ ಕಾವ್ಯದ ಸ್ಥಾನವೇನು ಎಂಬ ಪ್ರಶ್ನೆ ಕೇಳಿದಾಗ ಕವಿತಾ ಟ್ರಸ್ಟ್ ಇದರ ಕೆಲಸದ ನೆನಪು ಮಾಡಬೇಕು. ಇಂದಿನ ಸಾಹಿತ್ಯದಲ್ಲಿ ಕವಿತೆ ಜಾಗೃತವಾಗಿದೆ, ಸಂವೇದನಾಶೀಲವಾಗಿದೆ. ಈ ಕಾವ್ಯ ಸಮಕಾಲೀನ ಬದುಕಿನ ಪ್ರತಿಬಿಂಬವಾಗಿದೆ. ಜನರನ್ನು ಎಚ್ಚರಿಸುವ ಕೆಲಸ ಮಾಡುತ್ತಿದೆ. ಇಂದಿನ ಕೊಂಕಣಿ ಯುವಕವಿಗಳು ಈ ಪರಂಪರೆಯನ್ನು ಪ್ರತಿನಿಧಿಸುತ್ತಿದ್ದಾರೆ. ಕೇವಲ ಮನೋರಂಜನೆಯ ಹಂತದಿಂದ ಅಕಾಡೆಮಿಕ್ ಹಂತಕ್ಕೆ ಕೊಂಕಣಿ ಕವಿತೆ ಏರಿದೆಯಾದರೆ ಅದರ ಹಿಂದೆ ಕವಿತಾ ಟ್ರಸ್ಟ್ ಶ್ರಮವಿದೆ. ಕವಿತಾ ಟ್ರಸ್ಟ್ ಆಯೋಜಿಸುವ ಕವಿತಾ ಫೆಸ್ತ್ ಕೊಂಕಣಿ ಜನರ ಅಸ್ಮಿತೆ ಮತ್ತು ಒಗ್ಗಟ್ಟಿನ ಹಬ್ಬ. ಎಂದು ಸಾಹಿತ್ಯ ಅಕಾಡೆಮಿ ದೆಹಲಿ ಇದರ ಜನರಲ್ ಕೌನ್ಸಿಲ್ ಸದಸ್ಯ ಡಾ. ಪೂರ್ಣಾನಂದ ಚಾರಿ ಹೇಳಿದರು.

  

  

  

  

  

  

  

  

  

  

  

  

  

  

  

  

  

  

  

  

  

  

  ಅವರು ಕವಿತಾ ಟ್ರಸ್ಟ್ ಉಡುಪಿಯ ದಿ ಎಕ್ಸ್ ಪ್ರೆಶನ್ಸ್ ತಂಡದ ಸಹಕಾರದಲ್ಲಿ ಜನವರಿ ೧ರಂದು ಉಡುಪಿ ಸಾಸ್ತಾನದ ಆಶಿಯಾನ ಅಂಗಳದಲ್ಲಿ ನಡೆದ ಕವಿತಾ ಫೆಸ್ತ್ 2025 ಇದರ ಸಮಾರೋಪದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿ ಮಾತನಾಡಿದರು.

  ಈ ಸಂದರ್ಭದಲ್ಲಿ ರೂ 25,000/- ನಗದು, ಸನ್ಮಾನ ಪತ್ರ ಹಾಗೂ ಸ್ಮರಣಿಕೆ ಒಳಗೊಂಡ ಮತಾಯಸ್ ಕುಟುಂಬ ಕವಿತಾ ಪುರಸ್ಕಾರವನ್ನು ಕೊಂಕಣಿ ನವಾಯತಿ ಕವಿ ಸಯ್ಯದ್ ಸಮೀವುಲ್ಲಾ ಬರ್ಮಾವರ್ ಇವರಿಗೆ ಹಸ್ತಾಂತರಿಸಿದರು. ಇದೇ ವೇಳೆ ಸ್ಮಿತಪ್ರಜ್ಞ ಬರೆದ `ಸ್ವರ್ಗಾಚಿ ಪಕ್ಷಿ’ ಕೊಂಕಣಿ ಕಾವ್ಯ ಸಂಗ್ರಹ ಲೋಕಾರ್ಪಣೆಗೊಳಿಸಲಾಯಿತು. ವೇದಿಕೆಯಲ್ಲಿದ್ದ ಸಾಸ್ತಾನ ಸಂತ ಆಂತೊನಿ ಇಗರ್ಜಿಯ ಧರ್ಮಗುರು ವಂ ಸುನೀಲ್ ಡಿಸಿಲ್ವಾ ಹಾಗೂ ಕಾಣಕೋಣ ಕಾಲೇಜಿನ ಹಿಂದಿ ವಿಭಾಗದ ಮುಖ್ಯಸ್ಥೆ ಡಾ. ರೂಪಾ ಚಾರಿ ಶುಭ ಹಾರೈಸಿದರು.

  ಆಕರ್ಷಕ ಮೆರವಣಿಗೆಯೊಡನೆ ಮುಂಜಾನೆ ಕವಿತಾ ಫೆಸ್ತ್ ಇದರ 19 ನೇ ಆವೃತ್ತಿ ಆರಂಭವಾಯಿತು. ಬಳ್ಳಾರಿ ಧರ್ಮ ಪ್ರಾಂತ್ಯದ ಬಿಷಪ್ ಹೆನ್ರಿ ಡಿಸೋಜ, ಉದ್ಯಮಿ ಹಾಗೂ ದಾನಿ ಜೊಸೆಫ್ ಎಲಿಯಾಸ್ ಮಿನೆಜಸ್, ದಿ ಎಕ್ಸ್`ಪ್ರೆಶನ್ಸ್ ಅಧ್ಯಕ್ಷ ಪ್ರವೀಣ್ ಕರ್ವಾಲೊ, ಮನೆಯೊಡೆಯರಾದ ಸುಜಾತ ಮತ್ತು ಆಲ್ವಿನ್ ಆಂದ್ರಾದೆ ದಂಪತಿ, ಕವಿತಾ ಟ್ರಸ್ಟ್ ಅಧ್ಯಕ್ಷ ಕಿಶೂ ಬಾರ್ಕೂರು ಮತ್ತು ಕಾರ್ಯದರ್ಶಿ ಎವ್ರೆಲ್ ರೊಡ್ರಿಗಸ್ ಇವರು ಹೂ ಪಕಳೆಗಳನ್ನು ಗಾಳಿಯಲ್ಲಿ ಹಾರಿಸುವ ಮೂಲಕ ವಿಭಿನ್ನವಾಗಿ ಉದ್ಘಾಟಿಸಿದರು.

  ನಂತರ ಇಡೀ ದಿನ ಕಾವ್ಯದ ಸಂಭ್ರಮ ನಡೆಯಿತು. `ನನ್ನ ಜೀವನ: ನನ್ನ ಕಾವ್ಯ’ ಪ್ರಸ್ತುತಿಯಲ್ಲಿ ಡಾ ರಾಜಯ್ ಪವಾರ್ ಹಾಗೂ ಪುರಸ್ಕೃತ ಕವಿ ಸಮೀವುಲ್ಲಾ ಬರ್ಮಾವರ್ ಇವರೊಳಗೆ ನಡೆದ ಮಾತುಕತೆ ಕಾವ್ಯದ ಹಲವು ಒಳನೋಟಗಳನ್ನು ನೀಡಿತು. ನವಾಯತಿ ಕವಿತೆಯ ಬೆಳವಣಿಗೆಯ ಬಗ್ಗೆ ಮಾಹಿತಿ ದೊರೆಯಿತು. ನಂತರ ಕವಿ ಮತ್ತು ವಾಚಕ ಸಂವಾದದಲ್ಲಿ ಗೋವಾದ ಅನ್ವೇಶಾ ಸಿಂಗ್`ಬಾಳ್ ಹಾಗೂ ಮಂಗಳೂರಿನ ಕವಯಿತ್ರಿ ಸ್ಮಿತಾ ಶೆಣೈ ಭಾಗವಹಿಸಿ ಕಾವ್ಯದಲ್ಲಿ ಸ್ತ್ರೀ ಸಂವೇದನೆಗಳ ಬಗ್ಗೆ ಮಾತನಾಡಿದರು.
  
  ಸಾಹಿತ್ಯ ಅಕಾಡೆಮಿ, ದೆಹಲಿಯ ಸಹಕಾರದಲ್ಲಿ ಯುವ ಕವಿಗಳಿಂದ ಕವಿತಾ ಪ್ರಸ್ತುತಿ ನಡೆಯಿತು. ಆಂಡ್ರ್ಯೂ ಎಲ್ ಡಿಕುನ್ಹಾ ಅಧ್ಯಕ್ಷತೆಯಲ್ಲಿ ಅಂತರಾ ಭಿಡೆ, ವೆಂಕಟೇಶ್ ನಾಯಕ್, ಸುಪ್ರಿಯಾ ಕಾಣ್`ಕೋಣ್ಕರ್ ಮತ್ತು ಅಮೇಯ್ ನಾಯಕ್ ಇವರು ಸಮಕಾಲೀನ ಸಂಗತಿಗಳಿಗೆ ಸ್ಪಂದಿಸುವ ಕವಿತೆಗಳನ್ನು ವಾಚಿಸಿದರು. ಸಾಹಿತ್ಯ ಅಕಾಡೆಮಿ ಕೊಂಕ್ಣಿ ಸಲಹಾ ಸಮಿತಿಯ ನಿಮಂತ್ರಕ ಹಾಗೂ ಕವಿತಾ ಟ್ರಸ್ಟ್ ಸ್ಥಾಪಕ ಮೆಲ್ವಿನ್ ರೊಡ್ರಿಗಸ್ ಅಕಾಡೆಮಿಯ ಕಾರ್ಯ ಚಟುವಟಿಕೆಗಳ ಬಗ್ಗೆ ಮಾಹಿತಿ ನೀಡಿ, ಸದಸ್ಯ ಸ್ಟ್ಯಾನಿ ಬೇಳ ವಂದಿಸಿದರು. ಮುಕ್ತ ಕವಿಗೋಷ್ಟಿಯಲ್ಲಿ 14 ಕವಿಗಳು ಉತ್ಸಾಹದಿಂದ ಭಾಗವಹಿಸಿದರು.

  ಡಾಲ್ಪಿ ಮಸ್ಕರೇನ್ಹಸ್ ಮತ್ತು ತಂಡದಿಂದ ಮದುವೆ ಸೊಬಾನೆ ಹಾಡುಗಳು ಮತ್ತು ಮಕ್ಕಳ ಲಾಲಿ ಹಾಡುಗಳು ಹಾಗೂ ಫ್ರಾಂಕ್ಲಿನ್ ಫೆರ್ನಾಂಡಿಸ್ ಮತ್ತು ತಂಡದಿಂದ ಮನೋರಂಜನಾ ಹಾಡುಗಳ ಗಾಯನ ನಡೆಯಿತು. ಟ್ರಸ್ಟಿಗಳಾದ ವಿಲಿಯಮ್ ಪಾಯ್ಸ್ ಮತ್ತು ವಿಕ್ಟರ್ ಮತಾಯಸ್ ಸಹಕರಿಸಿದರು. ದಿ ಎಕ್ಸ್`ಪ್ರೆಶನ್ಸ್ ಉಪಾಧ್ಯಕ್ಷೆ ಶ್ವೇತಾ ಪಿಂಟೊ ವಂದಿಸಿದರು. ಸ್ಟೀವನ್ ಲುವಿಸ್ ಮಟ್ಪಾಡಿ ಕಾರ್ಯಕ್ರಮ ನಿರೂಪಿಸಿದರು.