ಕೋತಿಯನ್ನು ಶೂಟ್ ಮಾಡಿ ಸಾಯಿಸಿದ ಪಾಪಿ – ವಿಲವಿಲ ಒದ್ದಾಡಿ ಪ್ರಾಣ ಬಿಟ್ಟಿತು ಮೂಕ ಪ್ರಾಣಿ

•   Tue, Dec 12 2017 05:37:34 PM



• ಬೆಳಗಾವಿ, ಡಿ 12: ವ್ಯಕ್ತಿಯೋರ್ವ ಕೋತಿಯನ್ನು ಶೂಟ್ ಮಾಡಿ ಕೊಂದಿರುವ ಹೃದಯ ವಿದ್ರಾವಕ ಘಟನೆ ಚಿಕ್ಕೋಡಿ ತಾಲೂಕಿನ ನಿಪ್ಪಾಣಿಯಲ್ಲಿ ನಡೆದಿದೆ.

  

  
  ಈ ಹೇಯ ಕೃತ್ಯ ಎಸಗಿದವನನ್ನು ನಿಲೇಶ್ ಕುರುಬೆಟ್ಟ ಎಂದು ಗುರುತಿಸಲಾಗಿದೆ. ಮನೆ ಹತ್ತಿರ ಬಂದು ಕೋತಿ ಪದೇ ಪದೇ ಕಾಟ ಕೊಡುತ್ತಿದೆ ಎನ್ನುವ ಕಾರಣವೊಡ್ಡಿ ಈತ ಕೋತಿಯನ್ನು ಶೂಟ್ ಮಾಡಿ ಸಾಯಿಸಿದ್ದಾನೆ.

  ಈ ಘಟನೆಯನ್ನು ಖಂಡಿಸಿ ಸ್ಥಳೀಯರು ನಿಲೇಶ್ ವಿರುದ್ಧ ಪ್ರಕರಣ ದಾಖಲಿಸಿ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ನಿಪ್ಪಾಣಿ ಶಹರ್ ಪೊಲೀಸ್ ಠಾಣೆ ಎದುರು ಪ್ರತಿಭಟನೆ ನಡೆಸಿದ್ದಾರೆ. ಆದರೆ, ಪೊಲೀಸರು ಪ್ರಕರಣ ದಾಖಲಿಸಿಕೊಳ್ಳದೆ, ಕೋತಿ ಕೊಲೆ ಪ್ರಕರಣ ತಮ್ಮ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಸಮಜಾಯಿಸಿ ನೀಡಿದ್ದಾರೆ.

  ಕೋತಿಯನ್ನು ಸಾಯಿಸಿರುವ ಆರೋಪಿ ವಿರುದ್ಧ ದೂರು ದಾಖಲಾದ ಬಳಿಕ ಕೋತಿ ಅಂತ್ಯಕ್ರಿಯೆ ಮಾಡಿಯೇ ಮನೆಗೆ ಹೋಗುವುದಾಗಿ ಸ್ಥಳೀಯರು ಪಟ್ಟು ಹಿಡಿದಿದ್ದಾರೆ. ಇದೀಗ ಆರೋಪಿ ನಿಲೇಶ್ ವಿರುದ್ಧ ರಾಷ್ಟ್ರೀಯ ವನ್ಯಜೀವಿ ಕಾಯಿದೆಯಡಿ ಸೆಕ್ಷನ್ 50, 51 ಅಡಿಯಲ್ಲಿ ಅರಣ್ಯ ಇಲಾಖೆಯಲ್ಲಿ ಪ್ರಕರಣ ದಾಖಲಾಗಿದೆ.