ಹೋಟೆಲ್‌ನಲ್ಲಿ ಲಿಫ್ಟ್ ಬಾಗಿಲು ಜಾಮ್ - 1 ಗಂಟೆ ಸಿಲುಕಿದ್ದ ಮೂವರು ವೃದ್ಧರ ರಕ್ಷಣೆ!

•   Sun, Aug 16 2026 11:40:09 AM



• ಮಂಗಳೂರು, ಆ. 16 (DaijiworldNews/TA): ಅತ್ತಾವರದ ಹೋಟೆಲ್‌ವೊಂದರಲ್ಲಿ ಲಿಫ್ಟ್‌ ಒಳಗೆ ಸುಮಾರು ಒಂದು ಗಂಟೆ ಕಾಲ ಸಿಲುಕಿಕೊಂಡಿದ್ದ ಮೂವರು ಹಿರಿಯ ನಾಗರಿಕರನ್ನು ಅಗ್ನಿಶಾಮಕ ಮತ್ತು ತುರ್ತು ಸೇವೆಗಳ ಸಿಬ್ಬಂದಿ ಸುರಕ್ಷಿತವಾಗಿ ರಕ್ಷಿಸಿದ್ದಾರೆ.

  

  ಪ್ರವಾಸಕ್ಕಾಗಿ ಮಂಗಳೂರಿಗೆ ಆಗಮಿಸಿದ್ದ ಮೂವರು ಹಿರಿಯ ನಾಗರಿಕರು ಹೋಟೆಲ್‌ನಲ್ಲಿ ತಂಗಿದ್ದರು. ಶನಿವಾರ ಬೆಳಿಗ್ಗೆ ಚೆಕ್‌ಔಟ್‌ ಮಾಡಿ ಹೊರಡಲು ನೆಲ ಮಹಡಿಗೆ ಲಿಫ್ಟ್‌ನಲ್ಲಿ ತೆರಳುತ್ತಿದ್ದ ವೇಳೆ ಈ ಘಟನೆ ಸಂಭವಿಸಿದೆ. ಲಿಫ್ಟ್ ನೆಲ ಮಹಡಿಯನ್ನು ತಲುಪಿದ ಬಳಿಕ ಅದರ ಬಾಗಿಲುಗಳು ಜಾಮ್ ಆಗಿದ್ದು, ತೆರೆಯಲು ಸಾಧ್ಯವಾಗಲಿಲ್ಲ. ಹೋಟೆಲ್ ಸಿಬ್ಬಂದಿ ಹಲವು ಬಾರಿ ಪ್ರಯತ್ನಿಸಿದರೂ ಬಾಗಿಲು ತೆರೆಯಲು ಸಾಧ್ಯವಾಗದೆ, ಹಿರಿಯ ನಾಗರಿಕರು ಲಿಫ್ಟ್‌ನೊಳಗೆ ಸಿಲುಕಿಕೊಂಡಿದ್ದರು. ಸುಮಾರು ಒಂದು ಗಂಟೆ ಕಾಲ ಒಳಗೇ ಇದ್ದ ಅವರು ಆತಂಕಕ್ಕೊಳಗಾಗಿದ್ದರು.

  ಈ ಕುರಿತು ತುರ್ತು ಕರೆ ಬಂದ ಹಿನ್ನೆಲೆಯಲ್ಲಿ ಪಾಂಡೇಶ್ವರ ಅಗ್ನಿಶಾಮಕ ಠಾಣೆಯ ಸಿಬ್ಬಂದಿ ತಕ್ಷಣ ಸ್ಥಳಕ್ಕೆ ಧಾವಿಸಿದರು. ಕಾರ್ಯಾಚರಣೆ ನಡೆಸಿದ ಸಿಬ್ಬಂದಿ ಜಾಮ್ ಆಗಿದ್ದ ಲಿಫ್ಟ್ ಬಾಗಿಲನ್ನು ಬಲವಂತವಾಗಿ ತೆರೆದು, ಒಳಗೆ ಸಿಲುಕಿದ್ದ ಮೂವರನ್ನೂ ಸುರಕ್ಷಿತವಾಗಿ ಹೊರಗೆ ಕರೆತಂದರು. ಅಗ್ನಿಶಾಮಕ ಸಿಬ್ಬಂದಿಯ ತ್ವರಿತ ಕಾರ್ಯಾಚರಣೆಯಿಂದ ಯಾವುದೇ ಅಪಾಯವಿಲ್ಲದೆ ಮೂವರು ಹಿರಿಯ ನಾಗರಿಕರು ಪಾರಾಗಿದ್ದಾರೆ.