ಮಂಗಳೂರು ಮಹಾನಗರ ಪಾಲಿಕೆಯ ಎಡಿಬಿ ಸಾಲ ಬಡ್ಡಿ ಸೇರಿ 1,375 ಕೋಟಿ ರೂ.ಗೆ ಜಿಗಿತ

•   Tue, Sep 29 2026 12:27:42 PM



• ಮಂಗಳೂರು, ಸೆ.29 (DaijiworldNews/AA): ಮಂಗಳೂರು ನಗರದ ಕುಡಿಯುವ ನೀರು ಸರಬರಾಜು ಮತ್ತು ಒಳಚರಂಡಿ ಮೂಲಸೌಕರ್ಯ ಮೇಲ್ದರ್ಜೆಗೇರಿಸಲು ಸುಮಾರು ಎರಡು ದಶಕಗಳ ಹಿಂದೆ ಏಷ್ಯನ್ ಅಭಿವೃದ್ಧಿ ಬ್ಯಾಂಕ್‌ನಿಂದ (ಎಡಿಬಿ) ಪಡೆದಿದ್ದ ಸಾಲದ ಮೊತ್ತವು ಈಗ ಅಸಲು ಮತ್ತು ಬಡ್ಡಿ ಸೇರಿ ಬರೋಬ್ಬರಿ 1,375.17 ಕೋಟಿ ರೂ.ಗೆ ತಲುಪಿದೆ.

  ಮಾಹಿತಿ ಹಕ್ಕು ಕಾಯ್ದೆ (ಆರ್‌ಟಿಐ) ಅಡಿಯಲ್ಲಿ ಲಭ್ಯವಾಗಿರುವ ಮಾಹಿತಿಯ ಪ್ರಕಾರ, ಯೋಜನೆ ಅನುಷ್ಠಾನ ಸಂಸ್ಥೆಯಾದ 'ಕರ್ನಾಟಕ ನಗರ ಮೂಲಸೌಕರ್ಯ ಅಭಿವೃದ್ಧಿ ಮತ್ತು ಹಣಕಾಸು ನಿಗಮ'ಕ್ಕೆ ಆರಂಭದಲ್ಲಿ ಬಿಡುಗಡೆಯಾಗಿದ್ದ ಅಸಲು ಸಾಲದ ಮೊತ್ತ 380.34 ಕೋಟಿ ರೂ. ಆದರೆ, ಚಕ್ರಬಡ್ಡಿ ಮತ್ತು ಶೇ. 2.5ರಷ್ಟು ದಂಡದ ಬಡ್ಡಿ ಸೇರಿಕೊಂಡು 2026ರ ಏಪ್ರಿಲ್ ವೇಳೆಗೆ ಈ ಮೊತ್ತ 1,375.17 ಕೋಟಿ ರೂ.ಗೆ ಏರಿಕೆಯಾಗಿದೆ. ಸಾಲ ಮರುಪಾವತಿಯ ಅವಧಿ 2026ಕ್ಕೇ ಮುಕ್ತಾಯಗೊಂಡಿದ್ದರೂ, ಮಂಗಳೂರು ಮಹಾನಗರ ಪಾಲಿಕೆ (ಎಂಸಿಸಿ) ಇದುವರೆಗೆ ಒಂದು ಕಂತನ್ನೂ ಪಾವತಿಸಿಲ್ಲ ಎಂದು ವರದಿಯಾಗಿದೆ.

  ಸಾಲ ಮರುಪಾವತಿಸುವಂತೆ ಕೆಯುಐಡಿಎಫ್‌ಸಿ ಸಂಸ್ಥೆಯು ಮಂಗಳೂರು ಪಾಲಿಕೆಗೆ ಈಗಾಗಲೇ 24ಕ್ಕೂ ಹೆಚ್ಚು ಡಿಮ್ಯಾಂಡ್ ನೋಟಿಸ್‌ಗಳನ್ನು ನೀಡಿದ್ದರೂ, ಪಾಲಿಕೆ ಅದನ್ನು ನಿರ್ಲಕ್ಷಿಸಿದೆ ಎನ್ನಲಾಗಿದೆ.

  ಎಡಿಬಿ ಸಾಲಕ್ಕೆ ಸಂಬಂಧಿಸಿದ ಎನ್‌ಜಿಒ ಟಾಸ್ಕ್ ಫೋರ್ಸ್ನ ಮಾಜಿ ಸಂಚಾಲಕ ಹರ್ಷ ಡಿಸೋಜ ಮಾತನಾಡಿ, "ಪಾಲಿಕೆಯು ಸಾಲದ ಒಂದೇ ಒಂದು ಕಂತನ್ನೂ ಪಾವತಿಸದಿದ್ದರೆ, ಚರಂಡಿ ಸೆಸ್ ಮತ್ತು ಇತರ ತೆರಿಗೆಗಳ ಮೂಲಕ ಸಾರ್ವಜನಿಕರಿಂದ ಸಂಗ್ರಹಿಸಿದ ಹಣ ಎಲ್ಲಿಗೆ ಹೋಯಿತು?" ಎಂದು ಪ್ರಶ್ನಿಸಿದ್ದಾರೆ. ಜೊತೆಗೆ ಈ ಹಣವನ್ನು ಬೇರೆ ಉದ್ದೇಶಗಳಿಗೆ ಬಳಸಿ ದಾರಿ ತಪ್ಪಿಸಲಾಗಿದೆಯೇ ಎಂದೂ ಅವರು ಆಕ್ಷೇಪಿಸಿದ್ದಾರೆ.

  ಈ ವಿಷಯಕ್ಕೆ ಸ್ಪಷ್ಟನೆ ನೀಡಿರುವ ಪಾಲಿಕೆ ಅಧಿಕಾರಿಗಳು, "ಕರ್ನಾಟಕ ನಗರ ಅಭಿವೃದ್ಧಿ ಮತ್ತು ಕರಾವಳಿ ಪರಿಸರ ನಿರ್ವಹಣಾ ಯೋಜನೆ ಅಡಿಯಲ್ಲಿ ಕೈಗೊಂಡ ಕಾಮಗಾರಿಗಳು ಪೂರ್ಣಗೊಂಡಿವೆ ಎಂಬುದಕ್ಕೆ ಸೂಕ್ತ ಪುರಾವೆಗಳಿಲ್ಲ. ಹೀಗಾಗಿ ಸಾಲವನ್ನು ಸಂಪೂರ್ಣ ಮನ್ನಾ ಮಾಡುವಂತೆ ಕೆಯುಐಡಿಎಫ್‌ಸಿಗೆ ಪತ್ರ ಬರೆಯಲಾಗಿದ್ದು, ಸರ್ಕಾರದ ನಿರ್ದೇಶನಕ್ಕಾಗಿ ಕಾಯುತ್ತಿದ್ದೇವೆ" ಎಂದು ತಿಳಿಸಿದ್ದಾರೆ.

  ಈ ಕುರಿತು ಪ್ರತಿಕ್ರಿಯಿಸಿರುವ ಮಾಜಿ ಮೇಯರ್ ಶಶಿಧರ್ ಹೆಗ್ಡೆ, "ಸಾಮಾನ್ಯವಾಗಿ ಇಂತಹ ಸಾಲಗಳಿಗೆ ರಾಜ್ಯ ಸರ್ಕಾರವೇ ಶೂರಿಟಿ ಇರುತ್ತದೆ. ಸಾಲದ ಮೊತ್ತ ಬಹಳ ದೊಡ್ಡದಾಗಿದ್ದರಿಂದ ಪಾಲಿಕೆಯಲ್ಲಿ ಯಾರೂ ಇದನ್ನು ಮರುಪಾವತಿಸುವ ಸಾಹಸಕ್ಕೆ ಕೈಹಾಕಿರಲಿಲ್ಲ" ಎಂದಿದ್ದಾರೆ.

  ಇನ್ನೋರ್ವ ಮಾಜಿ ಮೇಯರ್ ಪ್ರೇಮಾನಂದ ಶೆಟ್ಟಿ ಮಾತನಾಡಿ, "ಕೆಲವು ವರ್ಷಗಳ ಕಾಲ ಎಡಿಬಿ ಸಾಲ ತೀರಿಸಲು ಬಜೆಟ್‌ನಲ್ಲಿ ಅನುದಾನ ಕಾಯ್ದಿರಿಸಲಾಗಿತ್ತು, ಆದರೆ ಹಣ ಪಾವತಿಯಾಗಿರಲಿಲ್ಲ. ರಾಜ್ಯ ಹಣಕಾಸು ಆಯೋಗದ ಗ್ರಾಂಟ್ ಕಡಿತಗೊಳಿಸಿ ಸಾಲಕ್ಕೆ ಹೊಂದಾಣಿಕೆ ಮಾಡಲಾಗುವುದು ಎಂದೂ ಹೇಳಲಾಗಿತ್ತು. ಆದರೆ ಪ್ರಸ್ತುತ ಮೊತ್ತ ದೊಡ್ಡದಾಗಿರುವುದರಿಂದ ಅಂತಿಮವಾಗಿ ಸರ್ಕಾರವೇ ಇದನ್ನು ಬಗೆಹರಿಸಬೇಕಾಗುತ್ತದೆ" ಎಂದು ಅಭಿಪ್ರಾಯಪಟ್ಟಿದ್ದಾರೆ.