ಮೂಡುಬಿದಿರೆ: ಮನೆಯ ಗೋಡೆಗೆ ಬಡಿದ ಸಿಡಿಲು-ಆಘಾತಕ್ಕೆ ಮಹಿಳೆ ಸಾವು

•   Thu, Oct 17 2019 07:33:12 PM



• ಮೂಡುಬಿದಿರೆ, ಅ 17 (DaijiworldNews/SM): ಸಿಡಿಲು ಬಡಿದು ಗುರುವಾರ ಸಾಯಂಕಾಲ ವೃದ್ಧೆಯೊಬ್ಬರು ಮೃತಪಟ್ಟಿರುವ ಘಟನೆ ತಾಲೂಕಿನ ಕರಿಂಜೆ ಎಂಬಲ್ಲಿ ನಡೆದಿದೆ. ಇಲ್ಲಿನ ಅಪ್ಪು ಶೆಟ್ಟಿ ಅವರ ಪತ್ನಿ ಅಪ್ಪಿ ಶೆಡ್ತಿ(80) ಮೃತ ಮಹಿಳೆ.

  

  ಗುರುವಾರ ಸಾಯಂಕಾಲ ಭಾರಿ ಮಳೆ ಬರುತ್ತಿದ್ದ ಸಂದರ್ಭ ಅಪ್ಪಿ ಶೆಡ್ತಿ ತನ್ನ ಮಗಳ ಜೊತೆ ಮನೆಯ ಚಾವಡಿಯ ಕಿಟಕಿ ಬಳಿ ಕುಳಿತಿದ್ದರು. ಆ ಸಂದರ್ಭದಲ್ಲಿ ಮಿಂಚು ಗುಡುಗು ಸಹಿತ ಮಳೆ ಜೋರಾಗಿದೆ. ಪರಿಣಾಮ ಮನೆಯ ಗೋಡೆಗೆ ಸಿಡಿಲು ಬಡಿದಿತ್ತೆನ್ನಲಾಗಿದೆ. ಆ ಸಂದರ್ಭದಲ್ಲಿ ಅಲ್ಲೆ ಪಕ್ಕದಲ್ಲಿ ಕುಳಿತಿದ್ದ ಮಹಿಳೆ ನೆಲಕ್ಕೆ ಬಿದ್ದರೆನ್ನಲಾಗಿದೆ. ನೆಲಕ್ಕೆ ಬಿದ್ದ ವೃದ್ದೆಗೆ ಆಘಾತವಾಗಿದ್ದು, ಆಸ್ಪತ್ರೆಗೆ ಕೊಂಡೊಯ್ಯುವ ದಾರಿಯ ಮಧ್ಯೆ ಅವರು ಮೃತಪಟ್ಟರೆನ್ನಲಾಗಿದೆ.

  ಇನ್ನು ಮೂಡುಬಿದಿರೆ ತಹಸೀಲ್ದಾರ್ ಅನಿತಾಲಕ್ಷ್ಮಿ, ಪ್ರಭಾರ ಕಂದಾಯ ನಿರೀಕ್ಷಕ ಶ್ರೀನಿವಾಸ್, ಗ್ರಾಮಕರಣಿಕರಾದ ಭವ್ಯಾ, ಪುರಸಭಾ ಸದಸ್ಯ ಜೊಸ್ಸಿ ಮಿನೇಜಸ್, ಪೊಲೀಸ್ ಉಪ ನಿರೀಕ್ಷಕ ದೇಜಪ್ಪ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.