ಮಂಗಳೂರು: ಬಿ.ಎಲ್ ಸಂತೋಷ್ ಸ್ವಿಚ್ ಹಾಕಿದ್ರೆ ನಳಿನ್ ಕುಮಾರ್ ಕುಣಿಯುತ್ತಾರೆ - ಸಿದ್ದರಾಮಯ್ಯ

•   Fri, Oct 18 2019 04:06:35 PM



• ಮಂಗಳೂರು, ಅ.18(Daijiworld News/SS): ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್'ಗೆ ದೇಶದ ಎಕಾನಮಿಯೇ ಗೊತ್ತಿಲ್ಲ. ನಾನಿದನ್ನು ಅಧಿವೇಶನದಲ್ಲಿ ಪ್ರಸ್ತಾಪ ಮಾಡಿದ್ದೆ ಎಂದು ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದ್ದಾರೆ.

  

  ನಗರದಲ್ಲಿ ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದ ಅವರು, ಯಡಿಯೂರಪ್ಪ ಆರ್ಥಿಕ ಸ್ಥಿತಿ ಚೆನ್ನಾಗಿಲ್ಲ ಎಂದು ಹೇಳೇ ಇಲ್ಲ ಅಂದಿದ್ದರು. ಬೊಕ್ಕಸ ಲೂಟಿ ಮಾಡಿದ್ದಾರೆಂದು ನಳಿನ್ ಹೇಳುತ್ತಾ ಇದ್ದರು. ಆದರೆ ಈ ಬಗ್ಗೆ ಕೇಳಿದರೆ ಯಡಿಯೂರಪ್ಪ ಹಾಗೇನಿಲ್ಲ ಅಂತಾ ಹೇಳಿಬಿಟ್ಟರು ಎಂದು ಹೇಳಿದರು.

  ಈ ನಳಿನ್ ಕುಮಾರ್'ಗೆ ರಾಜ್ಯದಲ್ಲಿ ಜಿಲ್ಲೆಗಳೆಷ್ಟಿವೆ ಅಂತಲೇ ಗೊತ್ತಿಲ್ಲ. ಈ ಪುಣ್ಯಾತ್ಮ ರಾಜ್ಯದಲ್ಲಿ ಎಷ್ಟು ತಾಲೂಕುಗಳಿವೆ ಅಂತ ಹೇಳಲಿ ನೋಡೋಣ ಎಂದು ನಳಿನ್ ಬಗ್ಗೆ ಸಿದ್ದರಾಮಯ್ಯ ಲೇವಡಿ ಮಾಡಿದರು.

  ಸಂತೋಷ ಸ್ವಿಚ್ ಹಾಕಿದ್ರೆ ನಳಿನ್ ಕುಮಾರ್ ಕುಣಿಯುತ್ತಾರೆ. ಬಿ ಎಲ್ ಸಂತೋಷ್ ರಿಮೋಟ್ ಕಂಟ್ರೋಲ್ ಮೂಲಕ ಕೆಲಸ ಮಾಡ್ತಾರೆ. ಡಿಸೆಂಬರ್'ವರೆಗೂ ಸರ್ಕಾರ ಉಳಿಯೋದೆ ಹೆಚ್ಚು. ಅನಂತರ ಚುನಾವಣೆ ಬರುವುದು ಪಕ್ಕಾ. ಯಡಿಯೂರಪ್ಪ ಸಾಂದರ್ಭಿಕ ಶಿಶು ಅಷ್ಟೇ. ಅವರನ್ನ ಸಿಎಂ ಮಾಡುವುದಕ್ಕೆ ಕೇಂದ್ರ ಬಿಜೆಪಿಗೆ ಇಷ್ಟ ಇರಲಿಲ್ಲ. ಅನಿವಾರ್ಯ ಕಾರಣದಿಂದ ಮಾಡಿದ್ದಾರೆ ಎಂದು ಹೇಳಿದರು.