ಉಪ್ಪಿನಂಗಡಿಯಲ್ಲೊಬ್ಬ ಭಗ್ನಪ್ರೇಮಿ – ಬಸ್ಸಿನಿಂದ ಪ್ರೇಯಸಿಯನ್ನು ಎಳೆದು ಹಾಕಿದ ಯುವಕ

•   Sat, Jan 06 2018 03:35:50 PM



• ಉಪ್ಪಿನಂಗಡಿ, ಜ 6: ಇಲ್ಲಿನ ಇಳಂತಿಲ ಗ್ರಾಮದ ನೇಜಿಕಾರ್ ಎಂಬಲ್ಲಿ ಪ್ರಿಯಕರನೊಬ್ಬ ಪ್ರೇಯಸಿಯನ್ನು ಹಿಡಿದು ಬಸ್ಸಿನಿಂದ ಕೆಳಗೆ ಎಳೆದು ಹಾಕಿದ್ದು, ಗಾಯಗೊಂಡ ಯುವತಿಯನ್ನು ಆಸ್ಪತ್ರೆಗೆ ದಾಖಲಿಸಿದ ಪ್ರಸಂಗ ನಡೆದಿದೆ.

  

  ಅಳಕೆ ನಿವಾಸಿ ಕಾರ್ತಿಕ್, ಬೆಳ್ತಂಗಡಿ ಕಾಲೇಜಿನಲ್ಲಿ ಪದವಿ ವ್ಯಾಸಂಗ ಮಾಡುತ್ತಿದ್ದ ವಿದ್ಯಾರ್ಥಿನಿಯನ್ನು ಬಸ್ಸಿನಿಂದ ಎಳೆದು ಹಾಕಿದ್ದಾನೆ. ಕಾಲೇಜಿಗೆ ಹೋಗುವ ಸಲುವಾಗಿ ನೇಜಿಕಾರ್ ಎಂಬಲ್ಲಿ ವಿದ್ಯಾರ್ಥಿನಿ ಬಸ್ಸು ಏರಿದ್ದು, ಅಷ್ಟರಲ್ಲಿ ಸ್ಥಳಕ್ಕೆ ಧಾವಿಸಿ ಬಂದ ಕಾರ್ತಿಕ್ ಬಸ್ಸು ಏರುತ್ತಿದ್ದ ವಿದ್ಯಾರ್ಥಿನಿಯನ್ನು ಎಳೆದು ಹಾಕಿದ್ದಾನೆ. ಗಾಯಗೊಂಡ ವಿದ್ಯಾರ್ಥಿನಿಯನ್ನು ಸ್ಥಳೀಯರು ಆಸ್ಪತ್ರೆಗೆ ದಾಖಲಿಸಿದ್ದಾರೆ.

  ಕಾರ್ತಿಕ್ ಮತ್ತು ವಿದ್ಯಾರ್ಥಿನಿ ಬಹಳ ಆತ್ಮೀಯರಾಗಿದ್ದರು. ಇವರಿಬ್ಬರ ನಡುವೆ ಪ್ರೀತಿ – ಪ್ರೇಮ ಇದ್ದು, ಒಬ್ಬರನ್ನೊಬ್ಬರು ಹಚ್ಚಿಕೊಂಡಿದ್ದರು. ಆದರೆ ವಿದ್ಯಾರ್ಥಿನಿ ಕಾರ್ತಿಕ್ ನನ್ನು ದೂರ ಮಾಡಲು ಮುಂದಾಗಿದ್ದು, ಈ ವೇಳೆ ಕಾರ್ತಿಕ್ ಕ್ರೋಧಗೊಂಡಿದ್ದ. ಇದರಿಂದ ಈ ಅವಾಂತರ ನಡೆದಿದೆ ಎಂದು ತಿಳಿದುಬಂದಿದೆ.

  ಕಾರ್ತಿಕ್ ವಿರುದ್ಧ ಯಾವುದೇ ಪ್ರಕರಣ ದಾಖಲಿಸಿಕೊಳ್ಳುವುದು ಬೇಡ ಎಂದು ವಿದ್ಯಾರ್ಥಿನಿ ವಿನಂತಿಸಿಕೊಂಡಿದ್ದು, ಪೊಲೀಸರು ಈ ಕುರಿತು ಯಾವುದೇ ಪ್ರಕರಣ ದಾಖಲಿಸಿಕೊಂಡಿಲ್ಲ.