ಕುಂದಾಪುರ: ಅಪಘಾತ ವೀಕ್ಷಿಸುತ್ತಿದ್ದ ವಿದ್ಯಾರ್ಥಿಗೆ ಓಮ್ನಿ ಢಿಕ್ಕಿ-ವಿದ್ಯಾರ್ಥಿ ಸಾವು

•   Tue, Jan 16 2018 01:20:49 PM



• ಕುಂದಾಪುರ ಜ 16: ಕುಂದಾಪುರ-ಬಸ್ರೂರು ಮಾರ್ಗದ ಕಾರಂತರ ಮನೆಯ ಹತ್ತಿರ ಜ.15 ರ ರಾತ್ರಿ 10.30ರ ಸುಮಾರಿಗೆ ಬಸ್ ಮತ್ತು ಕಾರು ನಡುವೆ ಅಪಘಾತ ಸಂಭವಿಸಿದ್ದು, ಆ ಸಂದರ್ಭ ಸ್ಥಳೀಯ ನಿವಾಸಿ ನಿತಿನ್ ಪೂಜಾರಿ(20) ಅಪಘಾತ ವೀಕ್ಷಿಸುತ್ತಾ ನಿಂತಿದ್ದು ಈ ಸಂದರ್ಭ ಕುಂದಾಪುರದಿಂದ ವೇಗವಾಗಿ ಬಂದ ಓಮ್ನಿ ವಾಹನ ವಿದ್ಯಾರ್ಥಿ ನಿತಿನ್ ಪೂಜಾರಿಗೆ ಢಿಕ್ಕಿ ಹೊಡೆದ ಪರಿಣಾಮ ತಲೆಗೆ ತೀವ್ರ ಏಟು ಬಿದ್ದು, ತಕ್ಷಣ ಕುಂದಾಪುರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಿದರೂ ಚಿಕಿತ್ಸೆ ಫಲಕಾರಿಯಾಗಿದೆ ಜ.16 ರ ಮುಂಜಾನೆ ನಿಧನರಾಗಿದ್ದಾರೆ.

  

  

  

   

  ಮೃತ ನಿತಿನ್ ಪೂಜಾರಿ ಕೋಣಿ ಬೆಟ್ಟಾಗರ ಕಾರಂತರ ಮನೆ ನಿವಾಸಿ ಸಂಜೀವ ಪೂಜಾರಿ ಅವರ ಪುತ್ರರಾಗಿದ್ದು ಕುಂದಾಪುರದ ಭಂಡಾರ್‌ಕಾರ್‍ಸ್ ಕಾಲೇಜಿನಲ್ಲಿ ತೃತೀಯ ಬಿ.ಸಿ.ಎ ವಿದ್ಯಾರ್ಥಿಯಾಗಿದ್ದಾರೆ. ರಾತ್ರಿ ರಸ್ತೆ ಅಪಘಾತ ಸಂಭವಿಸಿದ ತಕ್ಷಣ ಸ್ಥಳಕ್ಕೆ ಧಾವಿಸಿದ್ದು, ಘಟನೆಯನ್ನು ವೀಕ್ಷಿಸುತ್ತಿದ್ದ ಎನ್ನಲಾಗಿದೆ. ಈ ಸಂದರ್ಭ ಅತೀವೇಗವಾಗಿ ಬಂದ ಓಮ್ನಿ ರಸ್ತೆ ಸಮೀಪ ನಿಂತಿದ್ದ ವಿದ್ಯಾರ್ಥಿಗೆ ಢಿಕ್ಕಿ ಹೊಡೆದಿದೆ. ತಲೆಗೆ ಗಂಭೀರವಾದ ಪೆಟ್ಟು ಬಿದ್ದಿದ್ದು ಕೂಡಲೇ ಕುಂದಾಪುರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ ತೀವ್ರವಾದ ರಕ್ತಸ್ರಾವವಾಗಿದ್ದು, ಮುಂಜಾನೆ ನಿತಿನ್ ಮೃತಪಟ್ಟಿದ್ದಾರೆ.

  
  ಅಪಘಾತಕ್ಕೆ ಕಾರಣನಾದ ಓಮ್ನಿ ಚಾಲಕ ನಾಪತ್ತೆಯಾಗಿದ್ದು ಓಮ್ನಿಯನ್ನು ಪೊಲೀಸ್ ವಶಕ್ಕೆ ಪಡೆಯಲಾಗಿದೆ. ಮೃತ ನಿತಿನ್ ಪೂಜಾರಿ ಪ್ರತಿಭಾನ್ವಿತ ವಿದ್ಯಾರ್ಥಿಯಾಗಿದ್ದು, ಸ್ನೇಹಜೀವಿಯಾಗಿದ್ದರು ಎನ್ನಲಾಗಿದೆ. ಜ.16 ರಂದು ಭಂಡಾರ್‌ಕಾರ್‍ಸ್ ಕಾಲೇಜಿಗೆ ರಜೆ ಸಾರಲಾಗಿದ್ದು, ಸಾಕಷ್ಟು ಸಂಖ್ಯೆಯ ವಿದ್ಯಾರ್ಥಿಗಳು ಶವಗಾರದ ಹತ್ತಿರ ನೆರೆದಿದ್ದು, ಎಲ್ಲರ ಕಣ್ಣುಗಳು ತೇವಗೊಂಡು ಸಹಪಾಠಿಯ ಅಂತಿಮ ದರ್ಶನಕ್ಕೆ ಕಾಯುತ್ತಿದ್ದ ದೃಶ್ಯ ಕಂಡು ಬಂತು. ಪ್ರಕರಣ ಕುಂದಾಪುರ ಸಂಚಾರ ಠಾಣೆಯಲ್ಲಿ ದಾಖಲಾಗಿದೆ.