ಕಾಸರಗೋಡು: ಹೊಟೇಲ್ ಶೌಚಾಲಯದಲ್ಲಿ ಕ್ಯಾಮೆರಾ - ಯುವಕ ಪೊಲೀಸ್ ವಶಕ್ಕೆ

•   Thu, Dec 12 2019 12:29:19 PM



• ಕಾಸರಗೋಡು, ಡಿ 12(Daijiworld News/MSP): ನಗರದ ಹೋಟೆಲೊಂದರ ಶೌಚಾಲಯದಲ್ಲಿ ರಹಸ್ಯ ಕ್ಯಾಮೆರಾ ಪತ್ತೆಯಾಗಿದ್ದು, ಈ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

  

  ಹೊಟೇಲ್ ನ ಸಿಸಿಕ್ಯಾಮೆರಾದಲ್ಲಿ ದಾಖಲಾದ ದೃಶ್ಯಗಳನ್ನು ಪರಿಶೀಲಿಸಿರುವ ಪೊಲೀಸರು ಸ್ಥಳೀಯ ಬಾಳೆಕಾಯಿ ವ್ಯಾಪಾರಿಯ ಪುತ್ರನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದಾರೆ.

  ಬುಧವಾರ ಮಧ್ಯಾಹ್ನ ಕೆಲವು ಮಹಿಳೆಯರು ಮತ್ತು ಮಕ್ಕಳು ಶೌಚಾಲಯಕ್ಕೆ ತೆರಳಿದ್ದಾಗ ಶೌಚಾಲಯದಲ್ಲಿ ಮೊಬೈಲ್ ಕ್ಯಾಮೆರಾ ಇರಿಸಿದ್ದು ಗಮನಕ್ಕೆ ಬಂದ ತಕ್ಷಣ ಅವರು ಹೋಟೆಲ್’ ಅವರಿಗೆ ಮಾಹಿತಿ ನೀಡಿದರು. ಈ ವೇಳೆ ಅಲ್ಲಿದ್ದ ಯುವಕ ತನ್ನ ಮೊಬೈಲ್ ಫೋನ್ ಹಾಗೂ ಕೀಯನ್ನು ಅಲ್ಲಿಟ್ಟಿದ್ದು ಬಳಿಕ ಮೊಬೈಲ್ ಅಲ್ಲೇ ಮರೆತು ಬಿಟ್ಟಿರುವುದಾಗಿ ಹೇಳಿ ಮೊಬೈಲ್ ಕಿತ್ತುಕೊಂಡು ಪರಾರಿಯಾಗಿದ್ದ.

  ಸಂಶಯಗೊಂಡ ಹೊಟೇಲ್ ಸಿಬ್ಬಂದಿಗಳು ಕೂಡಲೇ ಪೊಲೀಸರಿಗೆ ಮಾಹಿತಿ ನೀಡಿದರು, ಈ ವೇಳೆ ಸ್ಥಳಕ್ಕೆ ಬಂದ ಪೊಲೀಸರು ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸಿದಾಗ ಪರಾರಿಯಾದ ಯುವಕನೂ ಸಮೀಪದ ಬಾಳೆಕಾಯಿ ವ್ಯಾಪಾರಿಯ ಪುತ್ರ ಎಂಬುದು ತಿಳಿದುಬಂದು ತಕ್ಷಣ ಆತನನ್ನು ವಶಕ್ಕೆ ಪಡೆಯಲಾಗಿದೆ.