ಬಾಹುಬಲಿ ಬೆಡಗಿ ತಮನ್ನಾ ಭಾಟಿಯಾರತ್ತ ಚಪ್ಪಲಿ ಎಸೆದ ಯುವಕ

•   Mon, Jan 29 2018 11:51:11 AM



• ಹೈದರಾಬಾದ್ ಜ 29: ದಕ್ಷಿಣ ಭಾರತದ ಖ್ಯಾತ ನಟಿ, 'ಬಾಹುಬಲಿ' ಬೆಡಗಿ ತಮನ್ನಾ ಭಾಟಿಯಾ ಅವರತ್ತ ವ್ಯಕ್ತಿಯೋರ್ವ ಚಪ್ಪಲಿ ಎಸೆದ ಘಟನೆ ಹೈದರಾಬಾದ್‌‌ನಲ್ಲಿ ಜ. 28 ರ ಭಾನುವಾರ ನಡೆದಿದೆ. ನಗರದಲ್ಲಿ ಚಿನ್ನಾಭರಣ ಮಳಿಗೆಯೊಂದರ ಉದ್ಘಾಟನೆಗೆಂದು ನಟಿ ಆಗಮಿಸಿದ್ದರು.ಅತ್ತ ಕಡೆ ತಮ್ಮ ನೆಚ್ಚಿನ ನಟಿಯನ್ನು ನೋಡಲು ಶೋರೂಮ್‌ ಮುಂದೆ ಅಪಾರ ಸಂಖ್ಯೆಯಲ್ಲಿ ಅಭಿಮಾನಿಗಳು ಜಮಾಯಿಸಿದ್ದರು. ತಮನ್ನಾ ಶೋರೂಮ್ ಉದ್ಘಾಟಿಸಿ ತೆರಳುವ ಮೊದಲು ಮಳಿಗೆಯ ಮುಂಭಾಗದಲ್ಲಿ ನೆರೆದಿದ್ದ ಅಭಿಮಾನಿಗಳತ್ತ ಕೈ ಬೀಸಿದ್ದರು. ಇದೇ ಸಂದರ್ಭವನ್ನು ಬಳಸಿಕೊಂಡ ಮುಶೀರಾಬಾದ್ ನಿವಾಸಿ 31 ವರ್ಷದ ಕರಿಮುಲ್ಲಾ ಎಂಬ ಯುವಕ ತಮನ್ನಾರಿಗೆ ಗುರಿಯಿಟ್ಟು ಚಪ್ಪಲಿ ಎಸೆದಿದ್ದಾನೆ. ಆದರೆ, ಅದು ಗುರಿ ತಪ್ಪಿ ಮಳಿಗೆಯ ಸಿಬ್ಬಂದಿ ಮೇಲೆ ಬಿದ್ದಿದೆ. ತಕ್ಷಣವೇ ಸುತ್ತ-ಮುತ್ತಲಿದ್ದ ಇತರರು ಆತನನ್ನು ಹಿಡಿದು ಥಳಿಸಿದ್ದಾರೆ. ನಂತರ ಆರೋಪಿಯನ್ನು ಪೊಲೀಸರ ವಶಕ್ಕೆ ಒಪ್ಪಿಸಲಾಗಿದೆ.

  

  
  ಆರೋಪಿಯ ವಿಚಾರಣೆ ಬಳಿಕ, ಆತ ತಮನ್ನಾರ ಇತ್ತೀಚಿನ ಚಿತ್ರಗಳ ನಟನೆಯ ಬಗ್ಗೆ ಆಕ್ಷೇಪ ಹೊಂದಿದ್ದ ಎಂದು ತಿಳಿದು ಬಂದಿದೆ. ಶೋರೂಮ್‌ನ ಸಿಬ್ಬಂದಿಯ ದೂರಿನ ಮೇರೆಗೆ ಆರೋಪಿ ಕರಿಮುಲ್ಲಾ ವಿರುದ್ಧ ಕೇಸ್‌ ದಾಖಲಾಗಿದೆ ಎಂದು ಪೊಲೀಸ್‌ ಇನ್ಸ್‌ಪೆಕ್ಟರ್‌ ಬಿ.ರವೀಂದ್ರ ತಿಳಿಸಿದ್ದಾರೆ.