ಕಾಸರಗೋಡು: ಮದ್ಯ ಕಳ್ಳಸಾಗಾಟ ಮಾಡುತ್ತಿದ್ದ ಬೈಕ್ ಅಪಘಾತ - ಸವಾರ ಗಂಭೀರ

•   Mon, Feb 10 2020 11:05:56 AM



• ಕಾಸರಗೋಡು, ಫೆ 10 (Daijiworld News/MSP): ಅಬಕಾರಿ ದಳದ ಸಿಬ್ಬಂದಿಗಳನ್ನು ಕಂಡು ಪರಾರಿಯಾದ ಬೈಕ್ ಅಪಘಾತಕ್ಕೀಡಾಗಿ ಸವಾರ ಗಂಭೀರ ಗಾಯಗೊಂಡ ಘಟನೆ ನಿನ್ನೆ ರಾತ್ರಿ ಪೈವಳಿಕೆ ಸಮೀಪದ ಚೇವಾರಿನಲ್ಲಿ ನಡೆದಿದೆ.

  

  ಬೈಕ್ ನಲ್ಲಿ ಮದ್ಯದ ಪ್ಯಾಕೆಟ್ ಗಳು ಪತ್ತೆಯಾಗಿವೆ. ಗಂಭೀರ ಗಾಯಗೊಂಡ ಕಾಸರಗೋಡು ಚೌಕಿ ಬೆದ್ರಡ್ಕದ ನವೀನ್ ಎಂಬಾತನನ್ನು ಮಂಗಳೂರು ಆಸ್ಪತ್ರೆಗೆ ದಾಖಲಿಸಲಾಗಿದೆ. ನಿನ್ನೆ ರಾತ್ರಿ ಎಂಟು ಗಂಟೆ ಸುಮಾರಿಗೆ ಘಟನೆ ನಡೆದಿದೆ.

  ಅಬಕಾರಿ ದಳದ ಸಿಬ್ಬಂದಿಗಳಿಗೆ ಲಭಿಸಿದ ಖಚಿತ ಮಾಹಿತಿಯಂತೆ ಕಾರ್ಯಾಚರಣೆ ನಡೆಸಲಾಗಿದ್ದು , ಉಪ್ಪಳ ಸೋಂಕಾಲ್ ಎಂಬಲ್ಲಿಗೆ ಬೈಕ್ ನಲ್ಲಿ ಯುವಕ ಮದ್ಯ ಸಾಗಾಟ ಮಾಡುತ್ತಿದ್ದಾನೆ ಎಂಬ ಖಚಿತ ಮಾಹಿತಿಯಂತೆ ಪೆರ್ಮುದೆ ಎಂಬಲ್ಲಿ ಬೈಕನ್ನು ನಿಲ್ಲಿಸಲು ಸೂಚನೆ ನೀಡಿದ್ದು, ಆದರೆ ಬೈಕನ್ನು ನಿಲ್ಲಿಸದೆ ಪರಾರಿಯಾಗಲೆತ್ನಿಸಿದ್ದಾನೆ. ಸಿಬ್ಬಂದಿಗಳು ಬೈಕನ್ನು ಬೆನ್ನಟ್ಟಿದ್ದು , ಚೇವಾರು ಎಂಬಲ್ಲಿ ಆರೋಗ್ಯ ಕೇಂದ್ರದ ಆವರಣ ಗೋಡೆಗೆ ಬಡಿದಿದೆ. ಇದರಿಂದ ಯುವಕ ಗಂಭೀರ ಗಾಯಗೊಂಡಿದ್ದಾನೆ. ಬೈಕ್ ನ್ನು ಪರಿಶೀಲಿಸಿದಾಗ ಬೈಕ್ ನ ಬಾಕ್ಸ್ ಮತ್ತು ಬ್ಯಾಗ್ ನಲ್ಲಿ 72 ಪ್ಯಾಕೆಟ್ ಮದ್ಯ ಪತ್ತೆಯಾಗಿವೆ. ಪ್ರಕರಣದ ಬಗ್ಗೆ ಅಬಕಾರಿ ದಳದ ಸಿಬ್ಬಂದಿಗಳು ಮತ್ತು ಕುಂಬಳೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.