ಬಂಟ್ವಾಳ: ನಡುರಸ್ತೆಯಲ್ಲಿ ಸಿಡಿದೆದ್ದ ಸಿನಿಮಾ ನಟಿ

•   Wed, Feb 12 2020 08:32:24 PM



• ಬಂಟ್ವಾಳ, ಫೆ 12 (DaijiworldNews/SM): ಕ್ಷುಲ್ಲಕ ಕಾರಣಕ್ಕೆ ಆಕ್ರೋಶಗೊಂಡ ಸಿನಿಮಾನಟಿಯೊಬ್ಬಳು ರಸ್ತೆಯಲ್ಲೇ "ಸಿಡಿದೆದ್ದ ಗಂಡು" ವಿನಂತೆ ವರ್ತಿಸಿದ ವಿಡಿಯೋ ವೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್‌ ಆಗುತ್ತಿದೆ.

  

  ಇನ್ನಷ್ಟೇ ಬಿಡುಗಡೆಯಾಗಬೇಕಿರುವ "ಸಿಡಿದೆದ್ದ ಗಂಡು‌" ಚಿತ್ರದ ನಾಯಕ‌ ನಟಿ, ಮಾಣಿಲ ಗ್ರಾಮದ ಶೋಭಿತಾ ಎಂಬಾಕೆ ಈ ಬಗೆಯ ವರ್ತನೆ ತೋರಿದ್ದು, ಸಿನೆಮಾ ಮಾದರಿಯಲ್ಲಿ ಹೊಡೆದಾಟ ನಡೆಸಿರುವುದು ವಿಡಿಯೋದಲ್ಲಿ ಕಾಣಿಸುತ್ತಿದೆ. ಫೆಬ್ರವರಿ ೧೦ರಂದು ಈ ಘಟನೆ ನಡೆದಿದ್ದು, ವಿಡಿಯೋ ಇದೀಗ ಹರಿದಾಡಲಾರಂಭಿಸಿದೆ.
  
  ವಿಟ್ಲ ಸಮೀಪದ ಪೆರುವಾಯಿ ಎಂಬಲ್ಲಿ ಈ ಘಟನೆ ನಡೆದಿದೆ. ಎರಡು ಕಾರುಗಳು ಒಂದೇ ದಿಕ್ಕಿ ನಡೆಗೆ ಸಂಚರಿಸುವ ಸಂದರ್ಭ ಕಾರಿಗೆ ಸೈಡ್ ಕೊಡುವ ವೇಳೆ‌ ನಟಿಯ ಕಾರು ಗೋಡೆಯೊಂದಕ್ಕೆ ಡಿಕ್ಕಿಯಾಗಿದೆ. ಇದೇ ಸಂದರ್ಭ ನಟಿ ಹಾಗೂ ಇನ್ನೊಂದು ಕಾರಿನವರ ನಡುವೆ ರಸ್ತೆಯಲ್ಲಿ ಸಿನೆಮಾ ಮಾದರಿ ಹೊಡೆದಾಟ ನಡೆದಿದೆ. ಆಕ್ರೋಶಗೊಂಡ ನಟಿ ಸ್ಥಳೀಯ ವ್ಯಕ್ತಿಯೊಬ್ಬರ ಅಂಗಿ ಹಿಡಿದು ಎಳೆದಿದ್ದಾರೆ ಮತ್ತು ಈ ವೇಳೆ ಅವರು ಆಕೆಯನ್ನು ತಳ್ಳಿದ್ದಾರೆ. ವಾಗ್ವಾದ ನಡೆದಿದ್ದು ಮಿತಿಮೀರಿ ಸಾರ್ವಜನಿಕರ ಎದುರೇ ಕೈಕೈ ಮಿಲಾಯಿಸುವ ಹಂತಕ್ಕೆ ತಲುಪಿದೆ. ಪರಿಸ್ಥಿತಿ ವಿಕೋಪಕ್ಕೆ ಹೋಗುತ್ತಿದ್ದನ್ನು ಗಮನಿಸಿದ ಸ್ಥಳೀಯರು ಮಧ್ಯ ಪ್ರವೇಶಿಸಿ ಪರಿಸ್ಥಿತಿ ತಿಳಿಗೊಳಿಸಿದ್ದಾರೆ.

  ಠಾಣೆಗೆ ದೂರು ನೀಡಿಲ್ಲ :
  ಘಟನೆ ನಡೆದ ಬೆನ್ನಲ್ಲೇ ನಟಿ ಶೋಭಿತಾ ವಿಟ್ಲ ಠಾಣೆಯನ್ನು ಸಂಪರ್ಕಿಸಿ, ಠಾಣಾಧಿಕಾರಿಯವರಲ್ಲಿ‌‌ ವಿಚಾರ ತಿಳಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ಠಾಣಾಧಿಕಾರಿ ವಿನೋದ್ ರೆಡ್ಡಿ, ಲಿಖಿತ ದೂರು ನೀಡುವಂತೆ ಸೂಚಿಸಿದ್ದಾರೆ. ಇದಕ್ಕೆ ನಿರಾಕರಿಸಿದ ನಟಿ ಶೋಭಿತಾ, ನಾವು ಊರೂರು ತಿರುಗಾಟ‌ ನಡೆಸುತ್ತಿದ್ದು, ದೂರು ನೀಡುವುದಿಲ್ಲ ಎಂದು ತಿಳಿಸಿದರಲ್ಲದೆ, ಈ ಬಗ್ಗೆ ಲಿಖಿತ ಹೇಳಿಕೆ‌ ನೀಡಿದ್ದಾರೆ. ಅಲ್ಲದೆ ಯಾರೂ ಕೂಡ ದೂರು ದಾಖಲಿಸದ ಹಿನ್ನೆಲೆಯಲ್ಲಿ ಪೊಲೀಸರೂ ಪ್ರಕರಣದ ಬಗ್ಗೆ ಗಮನ‌ನೀಡಿಲ್ಲ ಎಂದು ತಿಳಿದುಬಂದಿದೆ.
  ಆದರೆ ಸಾಮಾಜಿಕ ಜಾಲತಾಣಗಳಲ್ಲಿ ಮಾತ್ರ ಸಿಡಿದೆದ್ದ ಹೆಣ್ಣಿನದೇ ಸದ್ದು.